Reymbaev Abdulla Kurbanbaevichning
falsafa doktori (PhD) dissertatsiyasi himoyasi haqida e’lon

I.Umumiy ma’lumotlar. Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): “Jinoyat haqida xabar bermaslik yoki uni yashirish uchun javobgarlik”, 12.00.08 – Jinoyat huquqi. Jinoyat-ijroiya huquqi ixtisosligi (yuridik fanlar).
Dissertatsiya mavzusi ro‘yxatga olingan raqam: B2021.2.PhD/Yu561.
Ilmiy rahbar: Najimov Miratdiyin Shamshetdinovich, yuridik fanlar doktori, dotsent.
Dissertatsiya bajarilgan muassasa nomi: Toshkent davlat yuridik universiteti.
IK faoliyat ko‘rsatayotgan muassasa nomi, IK raqami: Toshkent davlat yuridik universiteti, DSc.07/13.05.2020.Yu.22.03.
Rasmiy opponentlar: Abzalova Xurshida Mirziyatovna, yuridik fanlar doktori, professor; Davletmuratov Sultanmurat Rustemovich, yuridik fanlar bo‘yicha falsafa doktori (PhD), dotsent.
Yetakchi tashkilot: O‘zbekiston Respublikasi Sudyalar oliy kengashi huzuridagi Sudyalar oliy maktabi.
Dissertatsiya yo‘nalishi: nazariy va amaliy ahamiyatga molik.
II. Tadqiqotning maqsadi jinoyat haqida xabar bermaslik yoki uni yashirish jinoyatining tarkibini aniqlash, mazkur jinoyatning obektiv va subektiv belgilari mazmun va mohiyatini tushunishga nisbatan to‘g‘ri ilmiy yondashuvni ishlab chiqish, unga doir jinoyat-huquqiy normalarining qo‘llanishi bo‘yicha normativ-huquqiy baza, qonunni qo‘llash amaliyotini takomillashtirishdan iborat.
III.Tadqiqotning ilmiy yangiligi:
xabar qiluvchi shaxslarning va ularning yaqin qarindoshlarining huquqlari va qonuniy manfaatlariga korrupsiyaga oid huquqbuzarliklar to‘g‘risida xabar qilganligi sababli tajovuz qilish qonunga ko‘ra javobgarlikka sabab bo‘lishi zarurligi asoslantirilgan;
ichki ishlar xodimlari o‘z boshlig‘i yoki vakolatli organlarga o‘zlarini boshqa shaxslar huquqbuzarlik sodir etishga undab murojaat qilgan har bir holat, shuningdek, boshqa xodimlar tomonidan sodir etilgan har qanday o‘ziga ma’lum bo‘lgan huquqbuzarliklar haqida xabar berishi zarurligi isbotlangan;
tayyorgarlik ko‘rilayotgan, sodir etilayotgan yoki sodir etilgan korrupsiyaga oid huquqbuzarlik haqida xabar berish yoxud korrupsiyaga oid jinoyatlarni sodir etganligi uchun qonunchilik hujjatlariga muvofiq qidiruv e’lon qilingan shaxslarni topishda yordam ko‘rsatish-korrupsiyaga qarshi kurashishda faol ishtirok etish ekanligi isbotlangan;
huquqbuzarliklar to‘g‘risida xabar bergan shaxslarni rag‘batlantirish huquqbuzarlik bo‘yicha birinchi xabar bergan shaxsga nisbatan qo‘llanilishi asoslantirilgan.
IV. Tadqiqot natijalarini joriy qilinishi. Tadqiqot ishi bo‘yicha olingan ilmiy natijalardan quyidagilarda foydalanilgan:
xabar qiluvchi shaxslarning va ularning yaqin qarindoshlarining huquqlari va qonuniy manfaatlariga korrupsiyaga oid huquqbuzarliklar to‘g‘risida xabar qilganligi sababli tajovuz qilish qonunga ko‘ra javobgarlikka sabab bo‘lishi haqidagi takliflardan O‘zbekiston Respublikasining 2021-yil 18-noyabrdagi  O‘RQ-729-sonli “O‘zbekiston Respublikasida korrupsiyaga qarshi kurashish tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunning 9-moddasi 6-bandini shakllantirishda foydalanilgan (O‘zbekiston Respublikasi Oliy Majlis Senatining Sud-huquq masalalari va korrupsiyaga qarshi kurashish qo‘mitasining 2023-yil 8-noyabrdagi 75-son dalolatnomasi). Ushbu taklifning qabul qilinishi korrupsiyaga oid huquqbuzarlik haqida xabar bergan shaxslarni va ularning yaqin qarindoshlari huquqlari va qonuniy manfaatlari davlat himoyasi ostida bo‘lishiga xizmat qiladi;
ichki ishlar xodimlari o‘z boshlig‘i yoki vakolatli organlarga o‘zlarini boshqa shaxslar huquqbuzarlik sodir etishga undab murojaat qilgan har bir holat, shuningdek, boshqa xodimlar tomonidan sodir etilgan har qanday o‘ziga ma’lum bo‘lgan huquqbuzarliklar haqida xabar berishi haqidagi takliflardan O‘zbekiston Respublikasi Prezidentining 2023-yil 20-yanvardagi PQ-10-son qarori bilan tasdiqlangan “Ichki ishlar organlari xodimlarining kasbiy madaniyat va xizmat intizomi Kodeksi”ning 6-bandi 2-xatboshisini shakllantirishda foydalanilgan (O‘zbekiston Respublikasi Ishki ishlar vazirligi tashkiliy departamenti yuridik taminlash boshqarmasining 2023-yil 15-noyabrdagi 33/03-01/2248-son dalolatnomasi). Ushbu taklifning qabul qilinishi ichki ishlar organlarida huquqbuzarliklar haqida xabar berish tizimini yo‘lga qo‘yish orqali jinoyatchilikka qarshi kurashish tizimini yanada samarali rivojlantirishga xizmat qilgan;
tayyorgarlik ko‘rilayotgan, sodir etilayotgan yoki sodir etilgan korrupsiyaga oid huquqbuzarlik haqida xabar berish yoxud korrupsiyaga oid jinoyatlarni sodir etganligi uchun qonunchilik hujjatlariga muvofiq qidiruv e’lon qilingan shaxslarni topishda yordam ko‘rsatish-korrupsiyaga qarshi kurashishda faol ishtirok etish ekanligi haqidagi takliflardan O‘zbekiston Respublikasi Vazirlar Mahkamasining 2020-yil 31-dekabrdagi 829-son qarori bilan tasdiqlangan Korrupsiyaga oid huquqbuzarlik haqida xabar bergan yoki korrupsiyaga qarshi kurashishga boshqa tarzda ko‘maklashgan shaxslarni rag‘batlantirish tartibi to‘g‘risidagi Nizomning 3-bandini ishlab chiqishda foydalanilgan (O‘zbekiston Respublikasi Vazirlar Mahkamasining 2023-yil 13-noyabrdagi 12-15-116-son dalolatnomasi). Ushbu taklifning qabul qilinishi jinoyatlar haqida xabar berish tushunchasini to‘liqroq ochib berish orqali jinoyatchilikka qarshi kurashish tizimini yanada samarali rivojlantirishga xizmat qilgan;
huquqbuzarliklar to‘g‘risida xabar bergan shaxslarni rag‘batlantirish huquqbuzarlik bo‘yicha birinchi xabar bergan shaxsga nisbatan qo‘llanilishi haqidagi takliflardan Vazirlar Mahkamasining 2023-yil 16-oktyabrdagi 541-son qarori bilan tasdiqlangan Elektr, issiqlik energiyasi, gazdan foydalanish qoidalarini buzish bilan bog‘liq huquqbuzarliklar to‘g‘risidagi fotosuratlar va (yoki) videoyozuvlarni qabul qilish, ko‘rib chiqish hamda ularni taqdim etgan shaxslarni rag‘batlantirish tartibi haqidagi Nizomning 17-bandini ishlab chiqishda foydalanilgan (O‘zbekiston Respublikasi Vazirlar Mahkamasining     2023-yil 13-noyabrdagi 12-15-115-son dalolatnomasi). Ushbu taklifning qabul qilinishi jinoyatlar haqida xabar berish tushunchasini to‘liqroq ochib berish hamda jinoyatlar haqida xabar bergan fuqarolarni rag‘batlantirishni joriy etish orqali jinoyatchilikka qarshi kurashish tizimini yanada samarali rivojlantirishga xizmat qilgan.