Олий аттестация комиссиясида педагогика ва филология (21.11.2024) фанлари йўналишида олий малакали илмий ва илмий-педагог кадрлар аттестацияси натижалари таҳлили ҳамда илмий кенгашлар фаолияти самарадорлигини оширишга бағишланган йиғилиш бўлиб ўтди. Унда тегишли фанларга ихтисослашган илмий кенгашлар раҳбарлари иштирок этди.
Жамиятнинг ижтимоий-маданий, маънавий-маърифий, илм-фан бўйича юксалишида педагогика ва филология фанларининг ўрин муҳим. Зеро, мамлакатимизда ёш авлод таълим-тарбияси, уларнинг баркамол вояга етиши йўлида кенг кўламли янгиланишлар амалга оширилмоқда.
Куни кеча Ўзбекистон Республикаси Президенти иштирокида бўлиб ўтган Олий Мажлис Қонунчилик палатасининг сайловдан кейинги биринчи мажлисида ҳам Юртбошимиз томонидан таълим сифатини янада ошириш, ёшларимизни ҳар томонлама етук инсонлар этиб тарбиялашга қаратилган сиёсат изчил давом эттирилиши таъкидланди.  
Шу маънода, дунёда глобаллашув жараёни асосида илм-фанда кескин юксалиш кузатилаётган бугун кунда юртимиз олимларининг илм-фан ва таълим-тарбия соҳасида олиб борилаётган илмий тадқиқотлари самарадорлигини ошириш, илмий мактаблар яратиш, илм-фан соҳасига кириб келаётган ёш олимларни қуллаб-қувватлаш долзарб аҳамият касб этмоқда.
Йиғилишда Янги Ўзбекистонда таълим ислоҳотларига ҳамоҳанг тарзда  олий малакали илмий ва илмий-педагогик кадрлар соҳасидаги янгиланишлар хусусида ҳам ахборот берилиб, навбатдаги вазифалар белгилаб олинди. Илмий тадқиқотлар амалий самарадорлигини ошириш, инновацион ва илғор халқаро тадқиқот услубларини кенг жорий этиш ҳамда соҳада шаффофликни таъминлашга доир амалий тавсиялар берилди.
Йиғилиш сўнггида Илмий кенгашлар фаолиятини низом талабларига кўра ташкил қилиш ҳамда ахборот-таҳлил хулосалари бўйича саволларга атрофлича жавоб олинди.

Ахборот хизмати