Олий аттестация комиссиясида 2024 йилнинг 29 май куни Ўзбекистон Республикаси Президентининг “Ўзбекистон - 2030” Стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида”ги фармони асосида белгиланган вазифалар доирасида мамлакат илм-фани ривожида муҳим ўрин тутувчи математика фанлари йўналишида олий малакали илмий ва илмий-педагог кадрлар аттестацияси таҳлилига бағишланган йиғилиш бўлиб ўтди.
Унда республикамиз олий таълим муассасалари ва илмий тадқиқот марказларидаги илмий кенгашлар раҳбарияти иштирок этди.

– Математика ва механика соҳаларда амалга оширилаётган илмий тадқиқотлар Янги Ўзбекистонни барпо этиш жараёнида реал иқтисодиёт ва ижтимоий соҳаларни ривожлантиришга ҳам ҳисса қўшмоқда, – дейди ўз нутқида физика-математика фанлари доктори Гулнора Раимова. – Хусусан, чизиқли ва ночизиқли моделларни сонли ечиш алгоритмлари дастурий таъминотидан қурилиш ташкилотларида биноларни лойиҳалашда, мустаҳкамлик ва ишончлилик захираларини аниқлашда фойдаланилмоқда.
Дарҳақиқат, бугунги кунда республикамизда математика фанлари бўйича 11 та илмий даражалар берувчи илмий кенгаш фаолият кўрсатмоқда. Сўнгги йилларда Илмий кенгашларда “Ахборотларни ҳимоялаш усуллари ва тизимлари. Ахборот хавфсизлиги” каби янги ихтисослик бўйича ҳам ҳимоялар амалга оширилмоқда. 2023 йил ва 2024 йилнинг дастлабки чорагида 10 нафар талабгор фан доктори (DSc), 78 нафар талабгор фалсафа доктори (PhD) илмий даражаларда тасдиқланди.
2023-2024 йилларда фан доктори (DSc) илмий даражаси олиш учун ҳимоя қилинган диссертациялар асосий илмий натижалари 500 дан зиёд, жумладан WoS, Scopus базаларида индексланадиган 200 дан зиёд нашрларда чоп этилган.  Мазкур даврда фалсафа доктори (PhD) илмий даражаси олиш учун ҳимоя қилинган диссертациялар асосий илмий натижалари 550 дан зиёд нашрларда, жумладан, WoS, Scopus базаларида индексланадиган 120 дан зиёд нашрларда чоп этилган.
Йиғилишда олий малакали илмий ва илмий-педагогик кадрлар соҳасида амалга оширилаётган ислоҳотлар асосида галдаги вазифалар белгилаб олинди. Айниқса, Янги Ўзбекистон тараққиётига ҳамоҳанг тарзда амалга оширилаётган илмий-тадқиқот ишлари мазмун-моҳияти, илмий янгилига ва амалиётга жорий этилиши ҳамда илғор халқаро тадқиқот услубларидан фойдаланишга катта эътибор қаратилаётгани эътироф этилди. Шунингдек, илмий тадқиқотларда салмоқли фундаментал (назарий) натижалар билан бирга амалий аҳамиятга молик натижалар мамлакат иқтисодиётини юксалтиришга хизмат қилаётгани таъкидланди.
Бу борада ОАК томонидан соҳада ахборот алмашинувини тўлиқ рақамлаштириш орқали очиқлик ва шаффоф тизимни яратиш борасида амалга оширилаётган чора-тадбирлар алоҳида эътироф этилди.
Шунга кўра, илмий кенгашлар фаолиятини ташкил этишда меъёрий тартиб-қоидаларга қатъий риоя қилиш, илмий-тадқиқот ишларининг сифатини таъминлаш юзасидан вазифалар белгиланиб, амалий тавсиялар берилди.

Муҳокамаларга бой бўлган йиғилишда Илмий кенгашлар фаолиятини низом талабларига кўра ташкил қилиш ҳамда ахборот-таҳлил хулосалари бўйича қўшимча саволларга мутахассислар томонидан батафсил жавоб берилди.

ОАК Ахборот хизмати