Soyibboev O‘lmasjon Boyqo‘zi o‘g‘lining
falsafa doktori (PhD) dissertatsiyasi himoyasi haqidagi e’lon

I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): “Boshqaruvlari turli chegaralanishga ega ikkinchi tartibli differensial o‘yinlar uchun quvish-qochish masalalari”, 01.01.02 – Differensial tenglamalar va matematik fizika (fizika-matematika fanlari).
Dissertatsiya mavzusi ro‘yxatga olingan raqam: № B2021.1.PhD/FM560
Dissertatsiya bajarilgan muassasa nomi: Namangan davlat universiteti.
IK faoliyat ko‘rsatayotgan muassasa nomi, IK raqami: V.I.Romanovskiy nomidagi Matematika instituti huzuridagi DSc.02/30.12.2019.FM.86.01 raqamli Ilmiy kengash.
Ilmiy rahbar: Samatov Baxrom Tadjiaxmatovich, fizika-matematika fanlari doktori, professor.
Rasmiy opponentlar: Ashurov Ravshan Radjabovich, fizika-matematika fanlari doktori, professor; Axmedov Odiljon Soxibjonovich, fizika-matematika fanlari nomzodi, dotsent.
Yetakchi tashkilot: O‘zbekiston Milliy universiteti.
Dissertatsiya yo‘nalishi: nazariy va amaliy ahamiyatga molik.
II. Tadqiqotning maqsadi obektlarning boshqaruv parametrlari geometrik cheklovlarga bo‘ysinuvchi o‘lchovli funksiyalar oilasidan tanlab olingan holda ikkinchi tartibli differensial o‘yinlar uchun quvish, qochish va “Qutulish chizig‘i” masalalarini hal qilishdan iborat.
III. Tadqiqotning ilmiy yangiligi quyidagilardan iborat:
obektlarning bir xil boshlang‘ich tezliklari holidagi inersion harakatli differensial o‘yinda quvish, qochish va “Qutulish chizig‘i” masalalarining echi-lish shartlari topilgan va quvlovchining parallel quvish strategiyasi optimal ekanligi ishbotlangan;
obektlarning boshlang‘ich vaziyatlari ayirmasini ularning boshlang‘ich tezliklari ayirmasiga chiziqli bog‘liqligi holida inersion harakatli differensial o‘yinda quvish masalasining echilishi va obektlarning uchrashish sohasi ichma-ich joylashishga nisbatan monotonligi isbotlangan;
obektlarning boshlang‘ich vaziyatlari ayirmasini ularning boshlang‘ich tezliklari ayirmasiga chiziqsiz bog‘liqligi holida inersion harakatli differensial o‘yinda quvish masalasining echilish shartlari aniqlangan va obektlarning uchrashish sohasi uchun oshkor ko‘rinishdagi formula hosil qilingan;
bir xil boshlang‘ich tezliklar va ishqalanish koeffisientlari bilan berilgan obektlarning bir xil tipdagi harakat tenglamalari orqali ifodalangan Pontryagin misoli uchun quvish, qochish va “Qutulish chizig‘i” masalalarining echilish shartlari topilgan va obektlarning uchrashish sohasi uchun oshkor ko‘rinishdagi formula aniqlangan.
IV. Tadqiqot natijalarining joriy qilinishi. Turli chegaralanishli boshqaruvlarga ega ikkinchi tartibli differensial o‘yinlar bo‘yicha olingan natijalar asosida:
obektlarning boshqaruvlari geometrik cheklovlar ostidagi inersion harakatli differensial o‘yinda quvish, qochish va Ayzeksning “Qutulish chizig‘i” masalalari echilish shartlaridan OT-F4-33 raqamli “Differensial tenglamalar bilan tavsiflanuvchi ziddiyatli boshqaruv uchun yangi usullarni ishlab chiqish va ularning sonli tadbiqi” mavzusidagi fundamental loyihada boshqaruvlari holat cheklovlariga ega dinamik tenglamalar bilan tasvirlangan qarama-qarshi holatlarni boshqarish masalalarni echishda foydalanilgan (O‘zbekiston Milliy universitetining 2024-yil 6-fevraldagi 04/11-1004-sonli ma’lumotnomasi). Ilmiy natijaning qo‘llanishi geometrik cheklovlarga bo‘ysinuvchi va ikkinchi tar-tibli dinamik tenglamalar bilan ifodalangan qarama-qarshi holatlarni boshqarish masalalarining to‘liq echimlarini ko‘rsatish imkonini bergan;
bir xil boshlang‘ich tezliklar va ishqalanish koeffisientlari bilan berilgan obektlarning bir xil tipdagi harakat tenglamalari orqali ifodalangan Pontryagin boshqaruv misoli uchun quvish, qochish va “Qutulish chizig‘i” masalalarining echilish shartlaridan OT-F4-28 raqamli “Giperbolik sistemalar uchun adekvat hisoblash modellarini qurish” mavzusidagi fundamental loyihada boshqaruvlari turli cheklovlarga ega bir xil tipdagi ikkinchi tartibli xususiy hosilali tenglamalar bilan tavsiflanuvchi ziddiyatli jarayonlarni optimal boshqarish masalalarini hal qilishda foydalanilgan (O‘zbekiston Milliy universitetining 2024-yil 28-fevraldagi 04/11-1578-sonli ma’lumotnomasi). Ilmiy natijaning qo‘llanishi ikkinchi tartibli giperbolik sistemalar uchun adekvat hisoblash modellarini qurish imkonini bergan.