2024 йилнинг 14 март куни Ўзбекистон Республикаси Ҳуқуқни муҳофаза қилиш академиясида “Илм-фан ва илмий фаолиятда коррупция ва бюрократия: муаммо ва унинг ечимлари” мавзусида илмий-амалий давра суҳбати бўлиб ўтди.
Давра суҳбатида Олий таълим, фан ва инновациялар вазирлиги, Олий аттестация комиссияси, Судьялар олий кенгаши ҳузуридаги Судьялар олий мактаби, Инсон ҳуқуқлари бўйича Ўзбекистон Республикаси Миллий маркази, Коррупцияга қарши курашиш агентлиги, Тошкент давлат юридик университети, Ички ишлар вазирлиги академияси, Жамоат хавфсизлиги университети масъуллари ҳамда Академиянинг профессор-ўқитувчилари, мустақил изланувчилари ва таянч докторантлари иштирок этди.

Тадбирни Ўзбекистон Республикаси Ҳуқуқни муҳофаза қилиш академияси бошлиғи ўринбосари М.Мамасиддиқов кириш сўзи билан очиб, мамлакатимиз илм-фани ривожида амалга оширилаётган кенг кўламли ислоҳотлар, ёшларнинг илмий изланишларини қўлаб-қувватлаш борасида яратилаётган шароитлар хусусида фикр юритди.
“Олий малакали илмий ва илмий-педагог кадрларни аттестациядан ўтказишда шаффофликни таъминлаш, коррупция омиллари ва бюрократик тўсиқларни бартараф этиш” мавзусида Олий аттестация комиссияси бош илмий котиби, т.ф.д., профессор А.Шермухамедов сўз юритиб, ОАК фаолиятида очиқлик ва шаффофликни таъминлаш, ахборот алмашинувда рақамлаштириш орқали коррупция омиллларини бартараф этиш борасида олиб борилаётган ишлар ҳақида батафсил маълумот берди.

 
    
Давра суҳбати онлайн тарзда ҳам намойиш этилиб, кенг илмий жамоатчиликнинг ўзаро мулоқоти ва фикр алмашинувига имконият яратилди.
Илм-фан ва илмий фаолиятга доир долзарб мавзуларда фикр-мулоҳоза юритилган давра суҳбати якунида иштирокчилар томонидан йўлланган барча саволларга мутасаддилар томонидан батафсил жавоб берилиб, амалий тавсиялар ишлаб чиқилди.   

ОАК Ахборот хизмати