Олий аттестация комиссиясида 2024 йил 12 февралда Ўзбекистон Республикаси Вазирлар Маҳкамасининг “Аҳоли орасида касалликларни эрта аниқлаш, уларнинг олдини олиш юзасидан 2024 йил соғлиқни сақлаш соҳасида амалга оширилиши зарур бўлган устувор вазифалар тўғрисида”ги 21-сон мажлиси баёнида белгилаб берилган вазифалар ижроси муҳокамаси юзасидан йиғилиш ўтказилди.
Йиғилишда Соғлиқни сақлаш вазирлиги масъул ходимлари ҳамда  тиббиёт фанлари йўналишига ихтисослашган илмий кенгашлар раҳбарлари иштирок этди.

Янги Ўзбекистонда тиббиёт тизимида амалга оширилаётган кенг кўламли ислоҳотлар шароитида соҳада олиб борилаётган илмий изланишлар амалий самарадорлигини ошириш, ёш тадқиқотчиларни қўллаб-қувватлаш, амалиётга инновацион ва илғор халқаро тадқиқот услубларини кенг жорий этиш ҳамда шаффофликни таъминлашга устувор аҳамият қаратиб келинмоқда.
Шунга кўра, йиғилишда тиббиёт соҳасида илмий изланиш олиб бораётган тадқиқотчиларнинг диссертацияларини қабул қилишда асосий эътиборни илмий муаммоларнинг долзарблиги, илмий ишларнинг амалий жиҳати ҳамда қўйилган вазифаларнинг ечимига йўналтирилганлигини қатъий назоратга олиш юзасидан долзарб вазифалар белгилаб олинди.

Бу борада тиббиёт соҳасидаги илмий даражалар берувчи илмий кенгашлар фаолиятини тиббий соҳадаги илмий-амалий муаммолар ечимига қаратиш чораларини кўришдаги устувор вазифалар асосида амалий тавсиялар берилди.

Йиғилиш сўнггида Илмий кенгашлар фаолияти самарадорлигини янада ошириш, уни низом талабларига кўра ташкил қилиш ҳамда ахборот-таҳлил хулосалари бўйича саволларга атрофлича жавоб олинди.

ОАК Ахборот хизмати