Олий аттестация комиссиясида педагогика, тиббиёт (05.01.2024), тарих ва филология (26.01.2024) фанлари йўналишида олий малакали илмий ва илмий-педагог кадрлар аттестацияси натижалари таҳлили ҳамда илмий кенгашлар фаолияти самарадорлигини оширишга бағишланган йиғилиш бўлиб ўтди. Унда тегишли фанларга ихтисослашган илмий кенгашлар раҳбарлари иштирок этди.
Жамиятнинг ижтимоий-маданий, маънавий-маърифий, илм-фан бўйича юксалишида педагогика, тарих, филология ҳамда тиббиёт фанларининг ўрин муҳим. Зеро, дунёда глобаллашув жараёни шиддатли ва кескин тус олган бугун кунда мазкур фанлар бўйича олиб борилаётган илмий тадқиқотлар самарадорлигини ошириш, илмий мактаблар фаолиятини кучайтириш, илм-фан соҳасига кириб келаётган ёш олимларни қуллаб-қувватлаш долзарб аҳамият касб этмоқда.

Йиғилишда Янги Ўзбекистонда олий малакали илмий ва илмий-педагогик кадрлар соҳасидаги кенг кўламли ислоҳотлар хусусида ахборот берилиб, навбатдаги вазифалар белгилаб олинди. Илмий тадқиқотлар амалий самарадорлигини ошириш, инновацион ва илғор халқаро тадқиқот услубларини кенг жорий этиш ҳамда соҳада шаффофликни таъминлашга доир амалий тавсиялар берилди.
Йиғилиш сўнггида Илмий кенгашлар фаолиятини низом талабларига кўра ташкил қилиш ҳамда ахборот-таҳлил хулосалари бўйича саволларга атрофлича жавоб олинди.

Ахборот хизмати