Юлдашов Абдусаид Абдураимовичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи):
“Юк ҳаракатланувчи таркиби барқарорлигини электродинамик тормозлардан фойдаланиш орқали ошириш”, 05.08.05 – “Темир йўлларнинг ҳаракатланувчи таркиби, поездларни тортиш ва электрлаштириш” (техника фанлари).
Диссертация мавзуси рўйхатга олинган рақам: (B2022.4.PhD/T3369)
Илмий раҳбарнинг Ф.И.Ш., илмий даражаси ва унвони:
Рахимов Рустам Вячеславович, техника фанлари доктори, профессор.
Диссертация бажарилган муассаса номи: Тошкент давлат транспорт университети.
ИК фаолият кўрсатаётган муассаса номи, ИК рақами: Тошкент давлат транспорт университети, DSc.15/31.08.2022.T.73.07.
Расмий оппонентларнинг Ф.И.Ш., илмий даражаси ва унвони:
Хамидов Отабек Рустамович – техника фанлари доктори, профессор;
Турсунов Ҳуршид Маҳмуджанович – техника фанлари номзоди. 
Етакчи ташкилот: Фарғона политехника институти.
Диссертация йўналиши: амалий аҳамиятга молик.
II. Тадқиқотнинг мақсади электродинамик тормоздан фойдаланиш орқали юк поездларининг барқарорлигини ошириш ва вагонлараро уланишларда юзага келадиган бўйлама-динамик кучлар таʼсирини камайтиришдан иборат.
III. Тадқиқотнинг илмий янгилиги қуйидагилардан иборат:
ўзгарувчан профилга эга йўллар ва алоҳида вагонлараро уланишлар элементларини таʼсирини ҳисобга олган ҳолда бир локомотивли тортиш ҳамда электродинамик тормозлаш режимларида поездлар ҳаракати математик моделлари такомиллаштирилган;
вагонлараро уланишларда бўшлиқларни инобатга олган ҳолда ҳосил бўладиган бўйлама-динамик кучларни аниқлаш имконини берувчи математик модел такомиллаштирилган;
ўзгарувчан профилга эга йўллар ва алоҳида вагонлараро уланишлар элементларини таʼсирини ҳисобга олган ҳолда синхрон тортиш ҳамда электродинамик тормозлаш режимларида икки локомотивли поездлар ҳаракатининг математик моделлари ишлаб чиқилган;
электродинамик тормозлаш ва тортиш режимларида ҳаракатланувчи таркибнинг вагонлараро уланишларидаги бўйлама кучлар таʼсирини инобатга олувчи ҳаракат-динамик синовларини ўтказиш дастури ва услубиёти ишлаб чиқилган.
IV. Тадқиқот натижаларининг жорий қилиниши қуйидагилардан иборат:
Электродинамик тормоздан фойдаланиш орқали юк поездларининг барқарорлигини ошириш ва вагонлараро уланишларда юзага келадиган бўйлама-динамик кучлар таʼсирини камайтириш бўйича олиб борилган илмий тадқиқотлар асосида:
юк ҳаракатланувчи таркибининг электродинамик тормозланиш ва тортиш режимларида локомотив ва вагонлараро уланишларда юзага келувчи бўйлама-динамик кучларни инобатга олган ҳолда тормозланиш самарадорлигини оширишда илмий асосланган тавсиялар “Ўзбекистон” локомотив депосида жорий этилган (Ўзбекистон Республикаси Транспорт Вазирлигининг 2023-йил 17-январдаги № Э-53 маʼлумотномаси). Натижада, эксплуатация жараёнида тоғли темир йўл участкаларида юк ҳаракатланувчи таркибига таʼсир этувчи бўйлама динамик кучлар қийматлари 15-20 фоизга камайган.
янги локомотивларнинг электродинамик тормозлаш ва тортиш режимларини инобатга олган ҳолда 72006 русумли динамометрик вагони орқали локомотив ва вагонлараро уланишларда ҳамда янги локомотивларнинг АВ-РТ тизими орқали икки локомотивнинг синхрон электродинамик тормозлаш, тортиш режимларида ҳосил бўлувчи бўйлама динамик кучларни аниқлашга қаратилган тажрибавий синовларни ўтказиш бўйича ишлаб чиқилган дастур ва услубиёт “Ўзбекистон” локомотив депосида синовларни ўтказиш учун жорий этилган (Ўзбекистон Республикаси Транспорт Вазирлигининг 2023-йил 17-январдаги № Э-53 маʼлумотномаси). Натижада, юк ҳаракатланувчи таркиби автотиркамаларини синиш ҳолатлари қисқариши ва нишабликдан пастга тушишларда тормоз колодкаларининг ишлаш муддати узайиши ҳисобига кутилаётган иқтисодий самарадорлик 243 миллион сўмни ташкил этган.