Daminova Nazokat Erkinboyevnaning
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar.
Dissertasiya mavzusi, ixtisoslik shifri (ilmiy daraja beriladigan tarmog‘i nomi): «Farg‘ona vodiysi dendroflorasi», 03.00.05–Botanika (biologiya fanlari).
Dissertasiya mavzusi ro‘yxatga olingan raqam: B2022.2.PhD/B726.
Ilmiy rahbar: Tojibayev Komiljon Sharobitdinovich, biologiya fanlari doktori, professor, akademik.
Dissertasiya bajarilgan muassasalar nomi: Botanika instituti.
IK faoliyat ko‘rsatayotgan muassasa nomi, IK raqami: Botanika instituti, DSc.02/30.12.2019.B.39.01.
Rasmiy opponentlar: Xasanov Furqat Orunboyevich, biologiya fanlari doktori, professor; Baysunov Babir Xidirovich, biologiya fanlari nomzodi, dotsent.
Yetakchi tashkilot: Namangan davlat universiteti.
Dissertasiya yo‘nalishi: nazariy va amaliy ahamiyatga molik. 
II. Tadqiqotning maqsadi: Farg‘ona vodiysining O‘zbekiston Respublikasi qismidagi dendroflora tarkibini taksonomik inventarizatsiyalash, turlarning tarqalishini aks ettiruvchi GAT xaritalarini tuzish va keng ko‘lamli tahlillarni amalga oshirishdan iborat.
III. Tadqiqotning ilmiy yangiligi:
Farg‘ona vodiysining O‘zbekiston Respublikasi qismi dendroflorasi 32 oila, 60 turkumga oid 165 turni o‘z ichiga qamrab olishi aniqlangan, konspekti tuzilgan va ekogeografik tahlillari amalga oshirilgan;
O‘zbekiston florasi uchun yangi bo‘lgan 2 tur, Farg‘ona vodiysi dendroflorasi uchun 4 tur keltirilgan;
O‘zbekiston Respublikasi Qizil kitobiga kiritilgan ayrim kamyob va endem turlarning yangi populyasiyalari aniqlangan hamda ularning holati IUCN mezonlari bo‘yicha baholangan;
dendroflora tarkibidagi kamyob va ayrim subendem turlarni bioiqlimiy modellashtirish asosida kelajakdagi potensial tarqalish maydonlarini ifodalovchi GAT xaritalari yaratilgan hamda global iqlim o‘zgarishining turli ssenariylariga ta’sir etuvchi bioiqlim omillari baholangan;
Farg‘ona vodiysi dendroflorasining zamonaviy holatini aks ettiruvchi ma’lumotlarning elektron bazasi yaratilgan.
IV. Tadqiqot natijalarining joriy qilinishi. 
Farg‘ona vodiysi dendroflorasini tarkibini tadqiq qilishda olingan ilmiy natijalar asosida:
Farg‘ona vodiysi dendroflorasining kamyob va yo‘qolib ketish xavfi ostida qolgan turlarning yangi o‘sish maydonlari, populyasiyalarining holati, tarqalishini aks ettiruvchi GAT xaritalari hamda muhofaza qilish chora-tadbirlar rejasi O‘zbekiston Respublikasi Tabiat resurslari vazirligining Namangan viloyati Ekologiya va atrof-muhitni muhofaza qilish boshqarmasiga hamda O‘rmon xo‘jaligi agentligining O‘rmon xo‘jaligi ilmiy-tadqiqot instituti Andijon filialining amaliy faoliyatiga joriy etilgan. (O‘zbekiston Respublikasi Tabiat resurslari vazirligining 2023 yil 19 apreldagi 03-01/21-416-son ma’lumotnomasi). Natijada, “Qizil kitob”ga kiritilgan turlarning yangi joylashuv maydonlarini aniqlash, holatini monitoring qilish va populyasiyalarini muhofaza qilish chora-tadbirlarini amalga oshirish imkonini bergan; 
Farg‘ona vodiysining O‘zbekiston hududidan yig‘ilgan 150 dan ortiq dendroflora turlarining 3650 dan ortiq gerbariy namunalari O‘zbekiston Milliy gerbariy (TASH) noyob ilmiy obyekti fondiga topshirilgan (O‘zbekiston Respublikasi Fanlar akademiyasining 2023-yil 9-yanvardagi 4/1255-45-son ma’lumotnomasi). Natijada, G‘arbiy Tiyonshon, Farg‘ona, Farg‘ona-Oloy va Markaziy Farg‘ona botanik-geografik okruglari floralariga oid yangi gerbariy namunalari TASH fondining O‘rta Osiyo bo‘limini boyitgan; dendroflora turlarining taksonomiyasi, biogeografiyasi bo‘yicha olingan natijalar va dala tadqiqotlari davomida to‘plagan geobog‘langan ma’lumotlar O‘zbekiston florasi bo‘yicha axborot-tahlil tizimini to‘ldirish imkonini bergan.