«Ilmiy darajalar berish tartibi to‘g‘risidagi nizom»ning 5-bandiga muvofiq tadqiqotlar amalga oshirilgan muassasa xulosasi va Ilmiy kengash taqdimnomasi asosida salmoqli ilmiy yangiliklar olgan va impakt-faktori tegishli darajada yuqori va ro‘yxat bo‘yicha xalqaro tizimga kirgan ilmiy jurnallarda kamida 12 ta (ijtimoiy-gumanitar fanlar bo‘yicha 8 ta) ilmiy maqola chop ettirgan mutaxassisga eksperiment tariqasida  fan doktori (DSc) ilmiy darajasi (ilmiy natijani amaliyotga joriy qilish bo‘yicha talablar bajarilgan holda), muhim ilmiy yangiliklar olgan va impakt-faktori tegishli darajada yuqori va ro‘yxat bo‘yicha xalqaro tizimga kirgan ilmiy jurnallarda kamida 6 ta (ijtimoiy-gumanitar fanlar bo‘yicha 4 ta) ilmiy maqola chop ettirgan mutaxassisga eksperiment tariqasida falsafa doktori (PhD) ilmiy darajasi OAK Rayosati qarori bilan istisno tariqasida dissertatsiya himoyasisiz ilmiy daraja berilishi mumkinligi belgilangan.
Impakt-faktori tegishli darajasini asoslash maqsadida ro‘yxat bo‘yicha xalqaro tizimga kirgan ilmiy jurnallar impakt-faktorining tegishli darajasini har bir fan tarmog‘ining xususiyatidan kelib chiqqan holda belgilash uchun vazirlik va idoralarga, etakchi oliy va ilmiy-tadqiqot muassasalariga mazkur masala yuzasidan o‘z takliflarini berishni so‘rab murojaat xatlari yo‘llandi.
Mazkur masala yuzasidan iqtisodiyot fanlari bo‘yicha tegishli tashkilotlar, jumladan O‘zbekiston Respublikasi Oliy va o‘rta maxsus ta’lim vazirligi va O‘zbekiston Respublikasi Innovatsion rivojlanish vazirligi tomonidan tegishli takliflar kiritildi.
Mazkur takliflar OAK Iqtisodiyot fanlari bo‘yicha ekspert kengashida muhokama qilindi.
OAK rayosatining 30.11.2020 y.dagi 288/14.6-son qarori bilan iqtisodiyot fanlari bo‘yicha xalqaro ilmiy-texnik bazalar (Scopus, Science Direct va Web of Science) ro‘yxatidagi ixtisoslashgan ilmiy nashrlar impakt-faktorining tegishli darajasi – 1,0 va undan yuqori darajasida belgilandi.