«Ilmiy darajalar berish tartibi to‘g‘risidagi nizom»ning 5-bandiga muvofiq tadqiqotlar amalga oshirilgan muassasa xulosasi va Ilmiy kengash taqdimnomasi asosida salmoqli ilmiy yangiliklar olgan va impakt-faktori tegishli darajada yuqori va ro‘yxat bo‘yicha xalqaro tizimga kirgan ilmiy jurnallarda kamida 12 ta (ijtimoiy-gumanitar fanlar bo‘yicha 8 ta) ilmiy maqola chop ettirgan mutaxassisga eksperiment tariqasida  fan doktori (DSc) ilmiy darajasi (ilmiy natijani amaliyotga joriy qilish bo‘yicha talablar bajarilgan holda), muhim ilmiy yangiliklar olgan va impakt-faktori tegishli darajada yuqori va ro‘yxat bo‘yicha xalqaro tizimga kirgan ilmiy jurnallarda kamida 6 ta (ijtimoiy-gumanitar fanlar bo‘yicha 4 ta) ilmiy maqola chop ettirgan mutaxassisga eksperiment tariqasida falsafa doktori (PhD) ilmiy darajasi OAK Rayosati qarori bilan istisno tariqasida dissertatsiya himoyasisiz ilmiy daraja berilishi mumkinligi belgilangan.
Impakt-faktori tegishli darajasini asoslash maqsadida ro‘yxat bo‘yicha xalqaro tizimga kirgan ilmiy jurnallar impakt-faktorining tegishli darajasini har bir fan tarmog‘ining xususiyatidan kelib chiqqan holda belgilash uchun vazirlik va idoralarga, etakchi oliy va ilmiy-tadqiqot muassasalariga mazkur masala yuzasidan o‘z takliflarini berishni so‘rab murojaat xatlari yo‘llandi.
Mazkur masala yuzasidan Fizika, kimyo va biologiya fanlari bo‘yicha tegishli tashkilotlar, jumladan O‘zbekiston Respublikasi Fanlar akademiyasi tomonidan tegishli takliflar kiritildi.
Mazkur takliflar rasmiy ravishda manfaatdor vazirliklar hamda etakchi oliy ta’lim va ilmiy-tadqiqot muassasalari bilan muhokama qilindi, shuningdek mustaqil ekspertlar hamda OAK ekspert kengashlari tavsiyalari olindi.
OAK rayosatining 28.08.2020 y.dagi 285/8.1-son qarori bilan fizika, kimyo va biologiya fanlari bo‘yicha xalqaro ilmiy-texnik bazalar ro‘yxatidagi ixtisoslashgan ilmiy nashrlar impakt-faktorining tegishli darajasi – 1,0 va undan yuqori darajasida belgilandi.