Зиямухамедов Жавохирбек Улугбековичнинг 
диссертация ҳимоясисиз ихтиро патенти (селекция ютуғи) асосида 
фалсафа доктори (PhD) илмий даражасини бериш бўйича эълон матни 

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Нефт-газни йиғиш конструкцияларининг эксплуатацион ишончлилигини органоминерал материаллар қўллаш билан ошириш», 02.00.14 - Органик моддалар ва улар асосидаги материаллар технологияси (техника фанлари).
Диссертация мавзуси рўйхатга олинган рақам: В2022.2.PhD/Т2773.
Илмий раҳбар: Таджиходжаев Закирходжа Абдусаттарович, техника фанлари доктори, профессор.
Илмий тадқиқот иши бажарилган муассаса номи: Тошкент кимё-технология илмий тадқиқот институти. 
ИК фаолият кўрсатаётган муассаса номи, ИК рақами: Тошкент кимё-технология илмий тадқиқот институти, DSc.16/30.12.2019.К/Т.87.01.
Ўзбекистон Республикаси Интеллектуал мулк агентлигининг ихтирога патенти: «Полимер композицияси» (№IAP 07000).
II. Тадқиқотнинг мақсади полиэтилен (ПЭНП ва ПЭВП) боғловчилар асосида нано ўлчамли Ангрен каолини ва пластинасимон қатламли  графитни механик фаоллаштириб, қоришмани дисперсиялаш усулида табиий ипак толаси чиқиндиси билан синчланган юқори мустаҳкамликка эга ва релаксацияга бардошли полимер композитларни яратишдан иборат.
III. Тадқиқотнинг илмий янгилиги: 
полиэтиленнинг (ПЭНП ва ПЭВП) наноўлчамдаги механик фаоллашган маҳаллий каолин ва пластинасимон қатламли графит қоришмаси билан тўлдирилганда олинган полимер композитнинг мустаҳкамлиги ва релаксацияга барқарорлиги аниқланган;
нефть ва газни элтиш қувурлари учун полиэтилен (ПЭНП ва ПЭВП) боғловчили композитларни наноўлчамдаги механик фаоллаштирилган маҳалий каолин ва пластинасимон қатламли  графит қоришмаси билан тўлдирилган ва ипак чиқиндиси толаси билан синчланган деформацияга бардошли таркиблар яратилган;
механик фаоллаштириш натижасида дисперс компонентларнинг фаол сирти ҳосил бўлиши табиий толали тўлдирувчини структуравий модификациялаш эвазига  органоминерал композитларда зарбий қовушқоқлигини 25%, чўзилишдаги мустаҳкамлигини 1,6 мартага ошириш ва бикирлигининг кескин кўпайишига олиб келиши аниқланган;
яратилган таркиблар нефтгазни йиғиш, сақлаш ва элтиш технологик воситаларининг эксплуатацион ишончлилигини ошириш ва триботехник хоссаларини яхшиланиши исботланган. 
IV. Тадқиқот натижаларининг жорий қилиниши.
Нефтгаз маҳсулотларини йиғиш, сақлаш ва элтиш технологик воситаларининг эксплуатацион ишончлилигини полиэтилен (ПЭВП ва ПЭНП) асосидаги органоминерал материаллар қўллаш билан ошириш бўйича олинган илмий натижалар асосида:
нефть, газ ва нефтгаз маҳсулотларини йиғиш конструкциялари учун диаметри 50-330 (Ду42-300 мм)ли қувурлар «Шўртан газ кимё мажмуаси» МЧЖнинг «Қаршитермопласт» цехида жорий этилган («O‘zbekneftgaz» АЖ «Шўртан газ кимё мажмуаси» МЧЖнинг 2023 йил 24 январдаги 9/23-131-сон маълумотномаси). Натижада, эксплуатацион хоссалари бўйича металл конструкцияларни алмаштиришга имкон берадиган маҳсулот ишлаб чиқариш имконини берган; 
«Шўртан газ кимё мажмуаси» МЧЖнинг  «Қаршитермопласт» цехида янги яратилган полимер композитлар  ишлаб чиқилган диаметри 50-330 мм (Ду42-300)ли нефть, газ ва нефтгаз маҳсулотларини йиғиш конструкциялари қувурларини ишлаб чиқариш шароитида қўллаш бўйича «O‘zbekneftgaz» АЖ «Шўртан нефть ва газ қазиб чиқариш бошқармаси» корхонасида жорий этилди («O‘zbekneftgaz» АЖ «Шўртан нефт ва газ қазиб чиқариш бошқармаси»нинг 2023 йил 24 январдаги 11/2-1080-сон маълумотномаси). Натижада, яратилган янги полимер композитлар таркиблари асосида ишлаб чиқарилган нефть маҳсулотларини элтувчи қувурларнинг релаксацион барқарорлиги (σр)  1,2-1,6 марта, механик мустаҳкамлиги 6,5 МПа дан 8,1 МПага, ейилишга бардошлилиги 50-60 %га оширилган, ҳажмий электр қаршилиги 25-30%га камайганлиги «Нефть маҳсулотларини қуйиб жўнатиш» цехи резервуарларида қўлланилиши натижасида технологик жиҳозларнинг эксплуатацион ишончлилигини таъминлаш имконини берган.