Асханов Зафарбек Паттахоновичнинг
фалсафа доктори (PhD) диссертацияси ҳимояси ҳақида эълон

I.Умумий маълумотлар. 
Диссертация мавзуси, ихтисослик шифри (илмий даража бериладиган фан тармоғи номи): «Қўл кафт соҳаси куйик асорати қайд этилган беморларнинг жарроҳлик реабилитацияси», 14.00.27 – Хирургия (тиббиёт фанлари). 
Диссертация мавзуси рўйхатга олинган рақам: B2020.2.PhD/Tib1278.
Илмий раҳбар: Мадазимов Мадамин Муминович, тиббиёт фанлари доктори, доцент. 
Диссертация бажарилган муассаса номи: Андижон давлат тиббиёт институти.
ИК фаолият кўрсатаётган муассаса (муассасалар) номи, ИК рақами: Андижон давлат тиббиёт институти, DSc.04/30.12.2019.Tib.95.01.
Расмий оппонентлар: Фаязов Абдулазиз Джалилович, тиббиёт фанлари доктори; Мусашайхов Хусанбой Таджибаевич, тиббиёт фанлари доктори, доцент.
Етакчи ташкилот: Бухоро давлат тиббиёт институти.
Диссертациянинг йўналиши: амалий аҳамиятга молик.
II.Тадқиқотнинг мақсади: пластиканинг мавжуд усулларини такомиллаштириш ҳамда янги усулларни ишлаб чиқиш орқали қўл кафт куйишлари оқибатларини хирургик даволашнинг функционал ва эстетик натижаларини яхшилашдан иборат.
III.Тадқиқотнинг илмий янгилиги:
реконструкция тури ва реабилитация дастурига ёндошувларнинг хусусиятларига боғлиқ ҳолда, лаҳтак некрози, лаҳтакости гематомаси, ўриндиқ йиринглаши қўл кафтнинг куйишдан кейинги чандиқли деформациялари пластикасининг қониқарсиз функционал ва косметик натижалари ривожланишининг асосий предикторлари эканлиги аниқланган;
қўл кафтнинг кичик чандиқли соҳаларини ўрнини босишда кислород транскутан босимининг маҳаллий кўрсаткичини етарли даражада тиклашни таъминловчи, тўқималарни интраоперацион чўзишнинг оптимал давомийлиги ҳамда чўзиш цикллари орасидаги интервал 4 дақиқа эканлиги аниқланган;
антисептикларнинг кимёвий таъсири натижасида эпидермиснинг қисман ёки тўлиқ кўчиб тушиши хавфи камайишини, шунингдек терининг дермал қаватини шикастламаган ҳолда лахтакни бир текисда кесиб олишни таъминловчи тўлиқ қаватли тери трансплантанти олиш усули ишлаб чиқилган;
транскутан термометрия ва оксиметрия мониторингини мажбурий протоколга киритиш билан бўғимлар контрактураси ва синдактилияда қўл кафтни бир вақтнинг ўзида комбинациялашган ҳамда тўлиқ қаватли тери трансплантатли пластика қилиш усуллари такомиллаштирилган.
IV.Тадқиқот натижаларининг жорий қилиниши. 
Қўл кафтнинг куйишдан кейинги оқибатлари бўлган беморларни хирургик даволаш босқичларида даволаш-профилактика дастурини такомиллаштириш бўйича илмий тадқиқот натижалари асосида:
«Қўл кафт орти юзасининг чандиқли деформацияларини хирургик даволаш усули» ишлаб чиқилган (Иителлектуал мулк агентлиги IAP 07091-сон иҳтиро учун патенти. 20.11.2022). Таклиф этилган усул тўқима чандиқларини тўлиқ қаватли тери лахтакларини қўллаш ҳисобига бир вақтнинг ўзида қўл кафт орти юзасининг кичик чандиқли деформацияларини тиклашга имкон берган;
қўл кафтнинг куйишдан кейинги чандиқли деформацияларини пластика қилишнинг мавжуд усулларини такомиллаштириш бўйича илмий тадқиқот натижалари асосида ишлаб чиқилган «Интраоперацион баллонли чўзиш ёрдамида қўл кафтнинг куйишдан кейинги чандиқли деформацияларини пластика қилиш усули» номли услубий тавсиянома тасдиқланган (Соғлиқни сақлаш вазирлигининг 2022 йил 16 декабрдаги 08-40019-сон маълумотномаси). Таклиф этилган тавсиялар анатомик ва функционал жиҳатдан тўлиқ чўзилган лахтакни олиш ва шу билан пластик амалиётларда ижобий эстетик натижалар улушини яхшилаш имконини берган; 
қўл кафтнинг куйишдан кейинги чандиқли деформацияларини пластика қилишнинг янги усулларини ишлаб чиқиш бўйича илмий тадқиқот натижалари асосида «Қўл кафт орти юзасининг куйишдан кейинги чандиқли деформациялари ва синдактилияларни бир вақтнинг ўзида бартараф этиш усули» номли услубий тавсиянома тасдиқланган (Соғлиқни сақлаш вазирлигининг 2022 йил 16 декабрдаги 08-40019-сон маълумотномаси). Таклиф этилган тавсиялар стационар даволаниш муддатини 9 кундан 6 кунга қисқартириш ва қўл кафт куйиши оқибатлари билан оғриган беморларнинг тикланишини тезлаштириш имконини берган;
қўл кафтнинг куйишдан кейинги оқибатлари бўлган беморларни хирургик даволаш босқичларида даволаш-профилактика дастури сифатини яхшилаш бўйича олинган илмий натижалар соғлиқни сақлашнинг амалий фаолиятига, хусусан, Республика шошилинч тиббий ёрдам илмий маркази Наманган ва Фарғона филиалларига жорий этилган (Соғлиқни сақлаш вазирлигининг 2022 йил 16 декабрдаги 08-40019-сон маълумотномаси). Жорий этиш натижалари қўл кафтнинг куйишдан кейинги чандиқли деформациялари бўлган беморларни хирургик даволашда пластика усулларини такомиллаштиришга, тери қопламининг янада мустаҳкам тикланишига, яхши эластикликни ва остидаги тўқималарга нисбатан ҳаракатчанликни таъминлашга, ташрихдан кейинги яқин ва узоқ муддатли даврда ретракция хавфини ва асоратлар сонини камайтиришга имкон берган.