Ходжиметова Шахноза Хасановнанинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Янги туғилган чақалоқларда гипоксик-ишемик энцефалопатия ривожланишининг молекуляр генетик жиҳатлари», 14.00.36 – Аллергология ва иммунология; 14.00.09 – Педиатрия  (тиббиёт фанлари).
Диссертация мавзуси рўйхатга олинган рақам: В2021.1.PhD/Tib1795.
Илмий раҳбарлар: Камалов Зайнитдин Сайфутдинович, тиббиёт фанлари доктори, профессор; Рахманкулова Зухра Жандаровна, тиббиёт фанлари доктори, доцент
Диссертация бажарилган муассаса номи: Иммунология ва инсон геномикаси институти
ИК фаолият кўрсатаётган муассаса (муассасалар) номи, ИК рақами:  Иммунология ва инсон геномикаси институти, DSc.02/30.12.2019.Tib.50.01
Расмий оппонентлар: Зиядуллаев Шухрат Худойбердиевич, тиббиёт фанлари доктори, доцент;  Абдужабарова Зульфия Муратходжаевна, тиббиёт фанлари доктори, доцент.
Етакчи ташкилот: Ташкент тиббиёт академияси.
Диссертация йўналиши: амалий аҳамиятга молик.
II. Тадқиқотнинг мақсади: янги туғилган чақалоқларда гипоксик-ишемик энцефалопатия ривожланишининг клиник-иммунологик ва молекуляр генетик жиҳатларини аниқлашдан иборат.
III. Тадқиқотнинг илмий янгилиги:
илк бор янги туғилган чақалоқларда 3-даражали гипоксик-ишемик энцефалопатия ривожланиши перинатал хавф омиллари (эклампсия, хомилани  тушиб қолиш таҳдиди, фетоплацентар етишмовчилик, йўлдошни аввал кўчиши, киндик ўқини ўралиши) ва онанинг касалликлари (анемия, TORCH-инфекция, CОVID-19) билан узвий боғлиқлиги аниқланган;
илк бор гипоксик-ишемик энцефалопатиянинг ўткир даврида умумий сўниш доминантлиги, оғир холатларида эса талваса синдроми, гипертензион-гидроцефаллик синдром, мия шиши, вентрикуломегалиянинг  пайдо бўлиши салбий прогностик омил эканлиги исботланган;
илк бор гипоксик-ишемик энцефалопатияли янги туғилган чақалоқларда киндик  ва веноз қондаги яллиғланишга хос ва қарши цитокинлар (ИЛ-1β, TNFα ва ИЛ-10) миқдорларининг соғлом чақалоқларга нисбатан ишонарли юқорилиги яллиғланиш фаоллиги кучайиши ва нейрозарарланиш ривожланишига тўғри пропорционал боғлиқлиги исботланган;
илк бор янги туғилган чақалоқларда ИЛ-1-511Т/C  Т ва Т/Т хамда TNF-α -308(G/А) А ва G/А аллел ва генотипларининг учраши оғир мия ишемиясининг ривожланишида салбий прогностик омил, аксинча, шу генларнинг С аллели ва GG генотипининг учраши гипоксик-ишемик энцефалопатия ривожланишига резистентлик  омилларидан эканлиги исботланган;
илк бор гипоксик-ишемик энцефалопатияда ИЛ-10 G-1082A (rs1800896) генининг полиморф аллеллари ва генотиплари тақсимланишида GА генотипи учраши даражасининг ортиши, касалликнинг оғир шакли ривожланишига, аксинча, GG генотипи эса касалликка резистентлик ривожланиши билан узвий боғлиқлиги аниқланган.
IV. Тадқиқот натижаларининг жорий қилиниши.
Янги туғилган ақалоқларда гипоксик-ишемик энцефалопатия ривожланишининг молекуляр генетик жиҳатлари бўйича олинган илмий натижалар асосида:
янги туғилган чақалоқларда гипоксик-ишемик энцефалопатия шаклланишини прогнозлаш бўйича олиб борилган тадқиқотнинг илмий натижалари асосида ишлаб чиқилган «Муддатидан олдин туғилган чақалоқларда турли даражадаги гипоксик-ишемик энцефалопатия шаклланишининг прогностик хавф омиллари» номли услубий тавсиянома тасдиқланган (Соғлиқни сақлаш вазирлигининг 2022 йил 26 апрелдаги 8н-з/195-сон маълумотномаси). Илмий натижаларнинг жорий қилиниши янги туғилган чақалоқларда гипоксик-ишемик энцефалопатия шаклланиш хавфи пайдо бўлиши ва ривожланишини эрта ташҳислаш ва олдини олишга  хизмат қилган;
янги туғилган чақалоқларда гипоксик-ишемик энцефалопатия ривожланишининг молекуляр генетик жиҳатлари бўйича олинган илмий натижалар соғлиқни сақлаш амалиётига, жумладан, Республика перинатал маркази ва Бухоро вилояти перинатал маркази амалий фаолиятига жорий қилинган (Соғлиқни сақлаш вазирлигининг 2022 йил 29 ноябрдаги 08-37849-сон маълумотномаси). Илмий натижаларнинг клиник амалиётга жорий этилиши янги туғилган чақалоқларда гипоксик-ишемик энцефалопатияни ривожланиш хавфини иммуногенетик кўрсаткичлар асосида эрта ташҳислаш ва олдини олиш, олиб бориш тактикасини такомиллаштириш, тўғри даволаш тактика¬сини қўллаш ҳисобига асоратларини камайтириш хамда иқтисодий самарадорликка эришишга имкон яратган.