Ҳикматов Фарҳод Фазлиддин ўғлининг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи): “Динамометрик вагоннинг параметрларини танлаш ва асосий техник ечимларини илмий асослаш”, 05.08.05 – “Темир йўлларнинг ҳаракатланувчи таркиби, поездларни тортиш ва электрлаштириш” (техника фанлари).
Диссертация мавзуси рўйхатга олинган рақам:  В2022.4.PhD/Т3207.
Илмий раҳбар: Рахимов Рустам Вячеславович, техника фанлари доктори, доцент.
Диссертация бажарилган муассаса номи: Тошкент давлат транспорт университети.
ИК фаолият кўрсатаётган муассаса номи, ИК рақами: Тошкент давлат транспорт университети, РhD.15/31.08.2022.T.73.02.
Расмий оппонентлар: Третьяков Александр Владимирович, техника фанлари доктори, профессор (Россия); Зайниддинов Нуриддин Савранбекович, техника фанлари номзоди.
Етакчи ташкилот: Жиззах политехника институти.
II. Тадқиқотнинг мақсади: конструкция ва техник ҳолатига кўра юк ва йўловчи поездлари таркибида фойдаланиш учун зарур бўлган ҳаракатланиш хавфсизлиги даражасига жавоб берадиган махсус-техник мақсадлар учун мўлжалланган динамометрик вагон параметрларини танлаш ва илмий асосланган техник ечимларни ишлаб чиқиш.
III. Тадқиқотнинг илмий янгилиги қуйидагилардан иборат:
йўловчи вагон кузовини такомиллаштириш мақсадида, унинг конструктив хусусиятларини ўзгартириш ҳисобига асосланган техник ечимларини танлаш имконини берувчи чекли элементли модели ишлаб чиқилган;
йўловчи вагони мустаҳкамловчи элементларининг мақбул ўлчамларини асосли танлашда, кузовга тушадиган юкламалар эътиборга олиниб, вагон конструкцияси элементларининг кучланиш-деформация ҳолати унинг геометрик ўлчамларига боғлиқлигини аниқлаш асосланган;
йўловчи вагон конструкциясини такомиллаштириш мақсадида уни элементларининг геометрик ўлчамларини ўзгартириш асосида махсус-техник мақсадлар учун мўлжалланган динамометрик вагон кузови ишлаб чиқилган;
динамометрик вагон тажрибали намунасининг мустаҳкамлигини баҳолаш учун турли кучлар таъсирини инобатга олувчи статик синовларини ўтказиш дастури ва услубиёти ишлаб чиқилган.
IV. Тадқиқот натижаларининг жорий қилиниши Махсус-техник мақсадлар учун мўлжалланган динамометрик вагон учун асосий техник ечимларни ишлаб чиқиш бўйича олиб борилган илмий тадқиқотлар асосида:
61-907 русумли йўловчи вагон кузовининг такомиллаштирилган конструкцияси асосида махсус-техник мақсадлар учун мўлжалланган динамометрик вагоннинг ишлаб чиқилган кузови конструкцияси “Тошкент йўловчи вагонларини қуриш ва таъмирлаш заводи” АЖда 61-907-ДМ русумли махсус-техник мақсадлар учун мўлжалланган динамометрик вагонни қуриш жараёнида жорий этилган (Ўзбекистон Республикаси Транспорт Вазирлигининг 2022 йил 13 сентябрдаги 2/5466-сон маълумотномаси). Натижада, темир йўлнинг тоғли участкаларида поездларнинг эксплуатацияси учун мақбул локомотив тортишини танлаш, вагон ва локомотивларнинг кўтарилиш ва тушиш вақтида юзага келадиган бўйлама динамик улашиш кучларини аниқлаш ҳамда поездларни ўтказиш учун критик масса нормалари ва шартларини текшириш имконияти ортган;
махсус-техник мақсадлар учун мўлжалланган динамометрик вагоннинг сиқилиш ва чўзилишга мустаҳкамлиги статик синовларини ўтказиш бўйича ишлаб чиқилган дастур ва услубиёт “Тошкент йўловчи вагонларини қуриш ва таъмирлаш заводи” АЖда 61-907-ДМ русумли махсус-техник мақсадлар учун мўлжалланган динамометрик вагон тажрибали намунасининг статик мустаҳкамлиги синовларини ўтказишда жорий этилган (Ўзбекистон Республикаси Транспорт Вазирлигининг 2022 йил 13 сентябрдаги 2/5466-сон маълумотномаси). Натижада, вагонларни лойиҳалаштириш ва қуриш харажатларини камайтириш ҳисобига кутилаётган иқтисодий самарадорлик 840 млн сўмни ташкил этган.