Ilmiy tadqiqotlar natijalarini chop etish tavsiya etilgan ilmiy nashrlar ro‘yxati oliy ta’lim va ilmiy tashkilotlarning tavsiyasiga ko‘ra fan tarmoqlari bo‘yicha shakllantiriladi. Ro‘yxat 2015-2019 yillarda har yili nashr qilingan. Ro‘yxat to‘liq formati OAK veb-saytiga joylashtirilgan.
Mamlakatimizda axborot ochiqligi va shaffofligini ta’minlash hamda ilmiy kengashlarning akademik mustaqilligini kengaytirish maqsadida ilmiy jamoatchilik bilan kelishilgan holda Ro‘yxatni bekor qilish bo‘yicha taklif ishlab chiqilgan. Shunga ko‘ra, 2020 yildan beri Ro‘yxat kitobcha shaklida chop etilmagan. Barcha o‘zgartirishlar muntazam ravishda OAK veb-saytida e’lon qilib borilishi yo‘lga qo‘yilgan.
Tavsiya etilgan ilmiy nashrlar ro‘yxati doimiy ravishda takomillashtirib borilmoqda. Jumladan, 2015-2022 yillarda ikki mingdan ortiq ilmiy jurnalda maqolalar chop etmaslik yuzasidan murojaatlarga ko‘ra takliflar kiritilgan va barcha ma’lumotlar OAK veb-saytiga joylashtirilgan.
“Berlin Studies Transnational Journal of Science and Humanities” jurnali 2016 yilda oliy ta’lim muassasalarining tavsiyasiga asosan Ro‘yxatga kiritilgan. Ilmiy jamoatchilik tomonidan ushbu jurnal haqida ijtimoiy tarmoqlarda va O‘zbekiston telekanali “Munozara maydoni” ko‘rsatuvida bildirilgan tanqidiy fikrlar va e’tirozlar ham tartibga ko‘ra o‘rganilib chiqildi.
“Berlin Studies Transnational Journal of Science and Humanities” jurnali faoliyatini o‘rganish jarayonida uning veb-saytida ko‘rsatilgan manziliga bir necha bor bog‘lanishga urinib ko‘rildi, lekin bog‘lanishning iloji bo‘lmadi.
Ilmiy jamoatchilik tomonidan ushbu jurnal haqida ijtimoiy tarmoqlarda va O‘zbekiston telekanali “Munozara maydoni” ko‘rsatuvida bildirilgan tanqidiy fikrlar va e’tirozlarni hamda tahririyat bilan mualliflar o‘rtasida bog‘lanishning imkoni yo‘qligi sabab maqolalar chop etish va savollarga javob olishda muammolar kelib chiqayotganligini inobatga olib “Berlin Studies Transnational Journal of Science and Humanities” jurnali 2022 yilning dekabr` oyidan boshlab OAK Rayosatining qarori bilan ro‘yxatdan chiqarildi.
Ushbu jurnalda ilmiy natijalarni chop etmaslik tavsiya etiladi.
OAK Axborot xizmati
