Дониёров Шохрух Зафаровичнинг 
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Пробиотик қўлланилган бройлер жўжалар эркин оёқ суякларининг постнатал морфогенези”, 16.00.02–Ҳайвонлар патологияси, онкологияси ва морфологияси. Ветеринар акушерлиги ва ҳайвонлар репродукцияси биотехникаси (ветеринария фанлари).
Диссертация мавзуси рўйхатга олинган рақам: В2022.2.PhD/V60.
Илмий раҳбар: Дилмуродов Насриддин Бабакулович, ветеринария фанлари доктори, профессор.
Диссертация бажарилган муассаса номи: Cамарқанд давлат ветеринария медицинаси, чорвачилик ва биотехнологиялар университети.
ИК фаолият кўрсатаётган муассаса номи, ИК рақами: Cамарқанд давлат ветеринария медицинаси, чорвачилик ва биотехнологиялар университети, DSc.06/30.12.2019.V.12.01.
Расмий оппонентлар: Эшбуриев Бахтияр Маматкулович, ветеринария фанлари доктори, профессор; Турсагатов Жахонгир Маматович, ветеринария фанлари номзоди.
Етакчи ташкилот: Ветеринария илмий-тадқиқот институти.
Диссертация йўналиши: назарий ва амалий аҳамиятга молик.
II. Тадқиқотнинг мақсади «РОСС 308» кроссига мансуб бўлган бройлер жўжалар постнатал онтогенезининг турли физиологик босқичларида пробиотик таьсирида олдинги (қанот) ва орқа оёқ суякларининг морфометрик, микроанатомик ўлчамлари, гистологик ҳамда кимёвий таркибининг ўзгариш динамикасини аниқлашдан иборат.
III. Тадқиқотнинг илмий янгилиги:
илк бор пробиотик қўлланилган ва қўлланилмаган бройлер жўжалар олдинги (қанот) ва орқа оёқ эркин суяклари макроанатомик кўрсаткичлари постнатал онтогенезнинг 14 кунлигига қадар жадал ривожланиши аниқланган;
пробиотик қўлланилган ва қўлланилмаган бройлер жўжалар постнатал онтогенезида олдинги (қанот) ва орқа оёқ стилоподий суякларининг микроанатомик кўрсаткичларидаги тафовутлар исботланган;
пробиотик қўлланилган бройлер жўжаларда олдинги (қанот) ва орқа оёқ суяклари макро- ва микроанатомик ўлчамларининг ўсиш коэффициентининг юқори бўлиши аниқланган;
пробиотик қўлланилган ва қўлланилмаган бройлер жўжалар стилоподий суяклари таркибидаги кул, умумий органик модда, кальций ва фосфор миқдорларининг ўзгариш хусусиятлари илмий асосланган;
суткада 2 мл пробиотик қабул қилган бройлер жўжаларда стилоподий суяклари эпифизидаги остеобластлар, қизил илик, қизил илик синусоиди капиллярлари диаметрининг юқорилиги аниқланган;
бройлер жўжалар олдинги (қанот) ва орқа оёқ эркин суякларининг макро-микроанатомик, кимёвий ва гистологик кўрсаткичларининг постнатал онтогенезда ўзгариш хусусиятлари, уларга пробиотикнинг таъсирини эътиборга олиб, уларнинг 7-кунига қадар бир кунда 2 мл (1,0 x 109 КҲБ) миқдордаги пробиотикни ичимлик сувига қўшиб бериш бўйича тавсия ишлаб чиқилган.
IV. Тадқиқот натижаларининг жорий қилиниши. Пробиотик қўлланилган ва қўлланилмаган бройлер жўжалар эркин оёқ суякларининг постнатал морфогенези бўйича олиб борилган илмий тадқиқот натижалари асосида:
«Бройлер жўжалар постнатал онтогенезида суяклар морфогенезига пробиотикларнинг таъсири» бўйича тавсиянома тасдиқланган ва ўқув жараёнига жорий этилган (Ветеринария ва чорвачиликни ривожлантириш давлат қўмитасининг 2022 йил 12 cентябрдаги 02/23-395-сон маълумотномаси). Ушбу тавсияларнинг қўлланилиши натижасида паррандалар биологияси бўйича мавжуд маълумотларни бойитиш, ветеринария ва чорвачилик соҳасида кадрлар тайёрлашда «таянч-ҳаракат» тизимини постнатал онтогенездаги ривожланиш қонуниятлари, пробиотиклар таъсирида уларнинг морфологик хусусиятларини аниқлаш имконини берган;
пробиотиклар бройлер жўжаларнинг ошқозон-ичак йўли микрофлорасини яхшилаши ҳисобига улар организмида моддалар алмашинуви жараёнини кучайтириши ҳамда суяклар таркибида айниқса, кальций ва фосфор макроэлементлари заҳирасининг ортишини таъминлаши асосида жўжалар постнатал онтогенезининг дастлабки кунидан 7-кунига қадар бир кунда 2 мл (1,0 x 109 КҲБ) миқдорда пробиотик ичимлик сувига қўшиб бериш усули ишлаб чиқилган ва ветеринария амалиётига жорий қилинган (Ветеринария ва чорвачиликни ривожлантириш давлат қўмитасининг 2022 йил 12 cентябрдаги 02/23-395-сон маълумотномаси). Натижада паррандалар морфологияси янги илмий асосланган маълумотлар билан бойитилган ҳамда пробиотик қўлланилган бройлер жўжаларнинг тирик вазнининг ошишига эришилган.