Ўзбекистон Республикаси ОАК
Раёсатининг 2013 йил 11 апрелдаги
197/3-сон қарори билан тасдиқланган
Докторлик диссертацияларининг асосий илмий натижалари эълон қилиниши лозим бўлган республика ва хорижий мамлакатларнинг нуфузли ихтисослашган илмий журналларини ОАК рўйхатига киритиш учун
ТАЛАБЛАР
Республика журналлари учун талаблар
1. Журналнинг белгиланган тартибда рўйхатдан ўтказилган бўлиши.
2. Журналнинг тегишли фан соҳаси йўналишида ихтисослашган бўлиши.
3. Тегишли ҳолларда илмий мақолаларни чоп этиш бўйича илмий рукннинг мавжудлиги.
4. ISSN (серияли нашрнинг халқаро стандарт рақами) рўйхатга олиш рақамининг мавжудлиги.
5. Журналнинг расмий веб-сайти ёки веб-саҳифасининг мавжудлиги.
6. Чоп этиладиган материалларни тақриздан ўтказишнинг мажбурийлиги (зарур ҳолларда ОАК сўрови асосида тегишли тақризни тақдим этишнинг мажбурийлиги).
7. Таҳририят аъзолари таркибида тегишли фан соҳаси бўйича камида 3 нафар фан доктори илмий даражасига эга мутахассиснинг мавжудлиги.
8. Чоп этиладиган илмий мақола қуйидаги талабларга жавоб бериши керак:
- фойдаланилган асосий адабиётлар рўйхатининг келтирилиши ва илмий мақоланинг камида 0,25 босма табоқ ҳажмда бўлиши;
- илмий мақолада муаммонинг қўйилиши; материалнинг назарий-методологик ва услубий жиҳатдан пухталиги; манбаларнинг ишончлилиги; муаммо, хулоса, таклиф ва тавсияларнинг етарлича асосланганлиги.
9. Нашрни баҳолаш бўйича тегишли илмий-ўқув тузилмаларнинг (кафедра ёки лаборатория) мавжудлиги.
10. Олий таълим ва илмий ташкилот кенгашининг тавсияси бўлиши. Бошқалар томонидан тавсия этилган журналлар бўйича таъсисчилар таркибида олий таълим ёки илмий ташкилотнинг бўлиши.
Хорижий журналлар учун талаблар
1. Журналнинг тегишли фан соҳаси йўналишида ихтисослашган бўлиши.
2. ISSN рўйхатга олиш рақамининг мавжудлиги.
3. Журналнинг расмий веб-сайти ёки веб-саҳифасининг мавжудлиги.
4. Чоп этиладиган материалларни тақриздан ўтказилиши.
5. Журнал таҳририяти аъзолари таркибида тегишли фан соҳаси бўйича мутахассисларнинг мавжудлиги.
6. Чоп этиладиган илмий мақолада муаммонинг қўйилиши; материалнинг назарий-методологик ва услубий жиҳатдан пухталиги; манбаларнинг ишончлилиги; муаммо, хулоса, таклиф ва тавсияларнинг етарлича асосланганлиги.
Изоҳ: Импакт-факторга эга журналларда чоп этилган илмий мақолалар ОАК рўйхатидаги журналларда чоп этилган мақолалар сифатида қабул қилинади.
