Юлдашева Матлуба Ашуралиевнанинг
фалсафа доктори (РhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Ўрмон хўжалик плантацияларида ерларни экишга тайёрлайдиган комбинациялашган агрегат ротацион юмшаткичининг параметрларини асослаш”, 05.07.01 – Қишлоқ хўжалиги ва мелиорация машиналари. Қишлоқ хўжалиги ва мелиорация ишларини механизациялаш (техника фанлари). 
Диссертация мавзуси рўйхатга олинган рақам: В2021.3.PhD/Т2414
Илмий раҳбар: техника фанлари номзоди, профессор Худояров Анвар Назиржонович
Диссертация бажарилган муассаса (муассасалар) номи:  Андижон қишлоқ хўжалиги ва агротехнологиялар институти.
ИК фаолият кўрсатаётган муассаса номи, ИК рақами: Андижон қишлоқ хўжалиги ва агротехнологиялар институти, PhD.05/30.06.2021.T.126.02
Расмий оппонентлар: Бойбобоев Набижон Ғуломович, техника фанлари доктори, профессор;  Насиров Илхам Закирович, техника фанлари номзоди, доцент.
Етакчи ташкилот:  Фарғона политехника институти   
Диссертация йўналиши: назарий ва амалий аҳамиятга молик.
II. Тадқиқотнинг мақсади ўрмон хўжалик плантацияларида ерларни экишга тайёрлашни даладан бир ўтишда амалга оширадиган комбинациялашган агрегат ротацион юмшаткичининг турини танлаш ва параметрларини асослаш йўли билан иш сифатини ошириш ва сарф-харажатларни камайтиришдан иборатдир.
III. Тадқиқотнинг илмий янгилиги:
комбинациялашган агрегатнинг конструкцияси ўрмон хўжалиги плантацияларида манзарали дарахт ва ноёб гул кўчатларини экишдан олдин ерларни тайёрлашга қўйиладиган талабларни ҳисобга олган ҳолда ишлаб чиқилган;
ротацион юмшаткичнинг радиуси, кинематик режими, айланишлар сони ҳамда талаб этиладиган қувватни аниқлаш имконини берадиган аналитик ифодалар тупроқнинг хоссалари ва агрегат ҳаракат тезлигини ҳисобга олган ҳолда олинган ва уларнинг ўзгариш чегаралари аниқланган;
комбинациялашган агрегат ротацион юмшаткичининг параметрлари тупроқ хоссалари, унинг уваланиш даражаси белгиланган меъёрдан кам бўлмаслиги ҳамда энергия сарфи ва тортишга қаршилик минимал бўлиши ҳисобга олинган ҳолда асосланган;
ротацион юмшаткич параметрларининг мақбул қийматлари унинг агротехник ва энергетик иш кўрсаткичларини баҳоловчи регрессия тенгламаларини биргаликда ечиш орқали аниқланган.
IV. Тадқиқот натижаларининг жорий қилиниши. Республикамиз ўрмон хўжалик плантация ерларини экишга тайёрлашда қўлланиладиган комбинациялашган агрегат ротацион юмшаткичининг параметрларини асослаш бўйича олинган натижалар асосида:
комбинациялашган агрегатга дастлабки талаблар ва техник топшириқ ишлаб чиқилган (Ўрмон хўжалиги давлат қўмитасининг 2021 йил 20 сентябрдаги №04-231-3799-сон маълумотномаси). Натижада юмшатилган, майин ва талаб даражасидаги тупроқ қатламини ҳосил қилиш билан бирга экишга тайёрлаш имконини берадиган комбинациялашган агрегат яратилган; 
ишлаб чиқилган комбинациялашган агрегатнинг тажрибавий нусхаси Андижон давлат ўрмон хўжалигида, Андижон вилояти фермер хўжаликларида ва «Андижонйўлкўкалам» унитар корхонасига қарашли кўчатхонасида жорий этилган (Ўрмон хўжалиги давлат қўмитасининг 2021 йил 20 сентябрдаги №04-231-3799-сон маълумотномаси). Натижада ишлаб чиқилган ротацион юмшаткич билан жиҳозланган комбинациялашган агрегат қўлланилганда меҳнат сарфи 14,53% га ва гектарига сарфланадиган эксплуатацион харажатлар эса 30,3% га камайишига эришилган;
комбинациялашган агрегатнинг саноат нусхаларини ишлаб чиқиш ва тайёрлаш учун унинг лойиҳа-конструкторлик ҳужжатлари (техникавий топшириқ ва чизмалар) «Андижон механика заводи» шўба корхонасида лойиҳалаш жараёнига жорий этилган (“Ўзбекистон темир йўллари” АЖ, “Ўзтемирйўлмаштаъмир” УК “Андижон механика заводи” ШК сининг 2021 йил 19 августдаги №1660-сон маълумотномаси). Натижада асосланган параметрларга эга бўлган ротацион юмшаткичлар билан жиҳозланган комбинациялашган агрегатни ишлаб чиқиш имкони яратилган.