Ўғлонов Илдамжон Мамасолиевичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар. 
Диссертация мавзуси, ихтисослик шифри (илмий даража бериладиган фан тармоғи номи): «Болаларда ўпканинг бактериал деструкцияси ўткир асоратли шаклларини жаррохлик даволаш усулларини такомиллаштириш», 14.00.35 – Болалар хирургияси (тиббиёт фанлари). 
Диссертация мавзуси рўйхатга олинган рақам: В2021.2.PhD/Tib2012.
Илмий раҳбар: Оллабергенов Одилбек Тожиддинович, тиббиёт фанлари доктори, доцент.
Диссертация бажарилган муассаса номи: Тошкент педиатрия тиббиёт институти.
ИК фаолият кўрсатаётган муассаса (муассасалар) номи, ИК рақами: Болалар миллий тиббиёт маркази, dsc.04/01.02.2022.tib.147.01.
Расмий оппонентлар: Акилов Хабибулла Атауллаевич, тиббиёт фанлари доктори, профессор; Саттаров Жамолиддин Бахранович, тиббиёт фанлари доктори, доцент.
Етакчи ташкилот номи: Самарқанд давлат тиббиёт университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади болаларда ўпка бактериал деструкцияси ўткир асоратли шаклларини ташхислаш ва жарроҳлик даволаш усулларини такомиллаштиришдан иборат.
III. Тадқиқотнинг илмий янгилиги:
болаларда ўпканинг бактериал деструкцияси ўткир асоратли шаклларида жарроҳлик даволашнинг тактикаси, усуллари ва кетма-кетликларини танлашда самарали ёндашувни оқилона ва изчил ташхислаш имконини берувчи оптимал ташхислаш алгоритми ишлаб чиқилган;
болаларда бактериал деструкциянинг ўткир асоратли ўпка ва ўпка-плеврал шаклларини даволашда дастурлаштирилган санацион бронкоскопиясининг ўрни исботланган;
бактериал деструкцияси бўлган болаларда турғин бронхоплеврал оқмаларни даволашда стерил пресланган микроғовакли губка киритиш натижасида герметиклик ҳосил қилиш орқали лобар ёки сегментар бронхларни дастлабки қисқа муддатли окклюзия қилиш усули такомиллаштирилган;
болаларда анъанавий даволаш усулларига муқобил равишда бактериал деструкциянинг ўткир асоратли шаклларида чекланган йирингли ўпка ва плевра бўшлиқларини минимал инвазив-бронкоскопик аралашувлар ва видеоторакоскопик санацияни эрта амалга оширишнинг самарадорлиги исботланган.
IV. Тадқиқот натижаларининг жорий қилиниши. 
Болаларда ўпка бактериал деструкцияси ўткир асоратли шаклларини жарроҳлик даволаш усулларини такомиллаштириш бўйича олинган натижалар асосида:
болаларда ўпка бактериал деструкцияси ўткир асоратли шаклларини жарроҳлик даволаш усулларини такомиллаштириш натижасида «Болаларда ўпка бактериал деструкцияси ўткир асоратли шаклларида эндоскопик ва минимал инвазив аралашувлар» номли услубий тавсияномаси тасдиқланган (Соғлиқни сақлаш вазирлигининг 2021 йил 13 декабрдаги 8н-з/547-сон маълумотномаси). Натижада минимал инвазив ва эндоскопик аралашувлар уларни кенг қўллаш истиқболларини белгилайди, чунки улар юқори аниқлик ва минимал инвазивликка эга, оғир асоратларнинг олдини олишга ва касалликнинг сурункали шаклга ўтмаслигига ёрдам беради ва шу билан анъанавий даволанишга сарфланадиган маблағни деярли икки марта камайтириш имконини берган;
болаларда ўпка бактериал деструкцияси ўткир асоратли шаклларини самарали даволаш алгоритмини ишлаб чиқиш натижасида «Болаларда ўпканинг бактериал деструкцияларини ташхислаш алгоритми ва даволаш усулларини танлаш» услубий тавсияномаси тасдиқланган (Соғлиқни сақлаш вазирлигининг 2021 йил 13 декабрдаги 8н-з/547-сон маълумотномаси). Олинган натижалар беморларда касалликка эрта ташхис қўйиш ва даволаш усулини тўғри танлаш самарадорлигини яхшилаш имконини берган;
болаларда ўпка бактериал деструкцияси ўткир асоратли шаклларини жарроҳлик даволаш усулларини такомиллаштиришга қаратилган тадқиқот натижалари соғлиқни сақлаш амалиётига, жумладан, Навоий, Сурхондарё ва Андижон вилоятларнинг болалар кўп тармоқли тиббиёт марказларининг клиник амалий фаолиятига тадбиқ этилган (Соғлиқни сақлаш вазирлигининг 2022 йил 19 июлдаги 08-20750-сон маълумотномаси). Олинган натижаларнинг амалиётга жорий қилиниши таклиф этилаётган комплекс ёндашувдан фойдаланиш ўпка бактериал деструкцияси билан хастланган болаларни ташхислаш ва даволаш сифатини ошириш, асоратлар сонини 3,5 баробар, даволаш давомийлилигини 14,4% га, даволаш харажатларини 2 баробаргача камайтиришга эришиш натижасида болаларнинг ҳаёт сифатини яхшилаш имконини берган.