O‘zbekiston Respublikasi OAK
Rayosatining 2018 yil 6 yanvardagi
248/2-son qaroriri bilan tasdiqlangan

O‘zbekiston Respublikasi Vazirlar Mahkamasi huzuridagi Oliy attestatsiya komissiyasi faoliyati bo‘yicha ma’lumotlarni olish TARTIBI
 
1. “O‘zbekiston Respublikasi Vazirlar Mahkamasi huzuridagi Oliy attestatsiya komissiyasi (OAK) faoliyati bo‘yicha ma’lumotlarni olish tartibi” O‘zbekiston Respublikasining “Davlat hokimiyati va boshqaruvi organlari faoliyatining ochiqligi to‘g‘risida”, “Ommaviy axborot vositalari to‘g‘risida”, “Jismoniy va yuridik shaxslarning murojaatlari to‘g‘risida”gi qonunlar va boshqa tegishli normativ-huquqiy hujjatlar asosida ishlab chiqilgan.
2. OAK faoliyati bo‘yicha ma’lumotlarni olish O‘zbekiston Respublikasining “Davlat hokimiyati va boshqaruvi organlari faoliyati-ning ochiqligi to‘g‘risida”, “Ommaviy axborot vositalari to‘g‘risida”, “Jismoniy va yuridik shaxslarning murojaatlari to‘g‘risida”gi qonunlar va boshqa tegishli normativ-huquqiy hujjatlar asosida tartibga solinadi.
3. Mazkur tartib o‘rnatilgan tartibda OAK faoliyati to‘g‘risidagi axborotdan foydalanishi va axborot olish huquqining kafolatlarini ta’minlash; qabul qilinayotgan qarorlar uchun mas’uliyatni oshirish hamda belgilangan tartibda axborotni tarqatish uchun xizmat qiladi.
4. OAK faoliyati ochiqligi quyidagi prinsiplar asosida amalga oshiriladi: taqdim etiladigan axborotdan hammaning foydalanishi mumkinligi, uning o‘z vaqtida berilishi va ishonchliligi; faoliyatning oshkoraligi va shaffofligi; faoliyat to‘g‘risidagi axborotni izlash, olish va tarqatish erkinligi; faoliyat to‘g‘risida axborot taqdim etishda fuqarolarning o‘z sha’ni va qadr-qimmatini tajovuzlardan, o‘z shaxsiy hayotiga aralashuvlardan himoya qilishga bo‘lgan huquqlari va qonuniy manfaatlariga, shuningdek fuqarolar va yuridik shaxslarning o‘z ishchanlik obro‘sini himoya qilishga bo‘lgan huquqlariga rioya etish.
5. OAK faoliyati to‘g‘risidagi axborotlar jumlasiga quyidagilar kiradi:
OAKning tarkibiy bo‘linmalarining huquqiy maqomini belgilovchi normativ-huquqiy hujjatlar;
qabul qilingan normativ-huquqiy hujjatlar va boshqa hujjatlar, shuningdek ularning ijro etilishining borishi to‘g‘risidagi ma’lumotlar;
qabul qilingan normativ-huquqiy hujjatlarga va boshqa hujjatlarga o‘zgartish va qo‘shimchalar kiritish, shuningdek ushbu hujjatlarni o‘z kuchini yo‘qotgan deb topish to‘g‘risidagi ma’lumotlar;
ishlab chiqilayotgan normativ-huquqiy hujjatlarning va boshqa hujjatlarning loyihalari to‘g‘risidagi ma’lumotlar;
davlat dasturlari hamda boshqa dasturlarning amalga oshirilishi to‘g‘risidagi ma’lumotlar;
o‘tkaziladigan ommaviy tadbirlar (majlislar, kengashlar, uchrashuvlar, matbuot konferensiyalari, brifinglar, seminarlar, davra suhbatlari va boshqalar) to‘g‘risidagi ma’lumotlar;
davlat hokimiyati va boshqaruvining boshqa organlari, jismoniy va yuridik shaxslar, shuningdek xorijiy va xalqaro tashkilotlar bilan hamkorligi to‘g‘risidagi ma’lumotlar;
amalga oshirilishida davlat hokimiyati va boshqaruvi organlari ishtirok etayotgan O‘zbekiston Respublikasining xalqaro shartnomalari to‘g‘risidagi ma’lumotlar;
oliy malakali ilmiy va ilmiy-pedagog kadrlar attestatsiyasi holatini va uning rivojlanish sur’atini tavsiflovchi asosiy ko‘rsatkichlar haqidagi ma’lumotlar;
OAK tomonidan o‘tkaziladigan (tashkil etiladigan) ochiq tanlovlar (tenderlar) va kimoshdi savdolari to‘g‘risidagi ma’lumotlar;
bo‘sh ish o‘rinlari, ishga qabul qilish shartlari va bo‘sh ish o‘rinlarini egallash uchun nomzodlarga qo‘yiladigan talablar to‘g‘risidagi ma’lumotlar;
OAK tomonidan tuzilgan muvofiqlashtiruvchi organlar to‘g‘risidagi ma’lumotlar;
OAK Rayosati ochiq majlislarini o‘tkazish rejalari, shu jumladan majlislarning kun tartibi loyihalari, ular o‘tkaziladigan sana, joy va vaqt, majlislarda hozir bo‘lish tartibi;
qonun hujjatlariga muvofiq boshqa ma’lumotlar ham kiritilishi mumkin;
o‘z faoliyati to‘g‘risidagi axborotlarni o‘z vaqtida e’lon qilish.
6. OAK faoliyati bo‘yicha foydalanilishi cheklab qo‘yilgan axborotlar quyidagilardan iborat:
ekspert kengashlari faoliyati va a’zolari faoliyati to‘g‘risidagi xizmat hujjatlari;
apellyasiya komissiyasi faoliyati va a’zolari faoliyati to‘g‘risidagi xizmat hujjatlari;
yopiq attestatsiya ishlari hamda shunga muvofiq tegishli tuzilmalar faoliyati;
Tartib-qoida komissiyasi faoliyati to‘g‘risidagi xizmat hujjatlari;
OAK apparati ichki xizmat hujjatlari;
OAK Rayosati faoliyati va a’zolari faoliyati to‘g‘risidagi xizmat hujjatlari;
ilmiy darajalar talabgori va tasdiqlanganlarning attestatsiya ishiga oid shaxsiy ma’lumotlari;
ilmiy unvonlar talabgori va tasdiqlanganlarning attestatsiya ishiga oid shaxsiy ma’lumotlari;
davlat siri yoki qonun bilan qo‘riqlanadigan boshqa sirni tashkil etuvchi ma’lumotlar.
7. Axborotdan foydalanuvchi va uning huquqlari hamda OAK rahbarlarining davlat hokimiyati va boshqaruvi organlari faoliyatining ochiqligini ta’minlash sohasidagi vakolatlari qonun hujjatlariga muvofiq amalga oshiriladi.
8. OAK faoliyatining ochiqligini ta’minlash usullari quyidagilardan iborat: axborotni e’lon qilish (chop etish); axborotni veb-saytga joylashtirish va yangilab borish; axborotni tegishli joylarga joylashtirish hamda yangilab borish; axborotni axborot-kutubxona va arxiv fondlari orqali taqdim etish; OAK Rayosati ochiq majlislarida axborotdan foydalanuvchilarning hozir bo‘lishi uchun sharoitlar yaratish; so‘rov asosida ularga OAK faoliyati to‘g‘risida og‘zaki va yozma shaklda (shu jumladan elektron hujjat shaklida) axborot taqdim etish.
OAK faoliyatining ochiqligini ta’minlash qonun hujjatlariga muvofiq boshqa usullar bilan ham amalga oshirilishi mumkin.
9.Ommaviy axborot vositalari vakillarining OAK faoliyati to‘g‘risidagi axborotdan foydalanishini ta’minlashda:
o‘z faoliyatining ochiqligini ta’minlash maqsadida ommaviy axborot vositalari vakillarining OAK huzurida akkreditatsiya qilinishini amalga oshiradi;
ommaviy axborot vositalarining akkreditatsiya qilingan vakillarini o‘tkaziladigan tadbirlar to‘g‘risida oldindan xabardor qiladi, ularga o‘z kasbiga doir vazifalarini bajarishda ko‘maklashadi.
10. OAK faoliyati to‘g‘risida axborot olishga doir so‘rov og‘zaki yoki yozma shaklda (shu jumladan elektron hujjat shaklida) bo‘lishi mumkin.
So‘rov ro‘yxatdan o‘tkazilgan kundan e’tiboran ko‘pi bilan o‘n besh kunlik muddatda ko‘rib chiqilishi kerak. Ommaviy axborot vositasining OAK faoliyati to‘g‘risida axborot olishga doir, shuningdek mansabdor shaxslarning interv`yusini tashkil etish to‘g‘risidagi so‘rovi ko‘pi bilan etti kunlik muddatda ko‘rib chiqiladi.
Agar axborotdan foydalanuvchining so‘rovini ko‘rib chiqish OAK vakolatlariga kirmasa, so‘rov so‘ralayotgan axborotni taqdim etish vakolatiga kiritilgan organga ro‘yxatdan o‘tkazilgan kundan e’tiboran uch ish kuni ichida yuboriladi, axborotdan foydalanuvchi esa bu haqda xabardor qilinadi.
11. OAK faoliyatining ochiqligi sohasidagi nizolar qonun hujjatlarida belgilangan tartibda hal etiladi hamda qonun hujjatlarini buzganlikda aybdor shaxslar belgilangan tartibda javobgar bo‘ladi. 

Yuklab olish: OAK_faoliyat_tartib.pdf