Джаббаров Ойбек Рахмановичнинг
фалсафа доктори (PhD) диссертация ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи): «Демпфирланиш таъсирида ночизиқли параболик тенгламалар орқали тавсифланадиган диффузия жараёнларни математик моделлаштириш», 05.01.07 – Математик моделлаштириш. Сонли усуллар ва дастурлар мажмуи (физика-математика фанлари).
Диссертация мавзуси рўйхатга олинган рақам: B2022.2.PhD/FM528.
Илмий раҳбар: Арипов Мерсаид Мирсиддиқович, физика-математика фанлари доктори, профессор.
Диссертация бажарилган муассаса номи: Қарши давлат университети.
ИК фаолият кўрсатаётган муассаса (муассасалар) номи, ИК рақами: Ўзбекистон миллий университети, DSc.03/30.12.2019.FM.01.02. 
Расмий оппонентлар: Тахиров Жозил Останович, физика-математика фанлари доктори, профессор; Равшанов Нормахмат, техника фанлари доктори, профессор.
Етакчи ташкилот: Термиз давлат университети. 
Диссертация йўналиши: назарий ва амалий аҳамиятга молик.
II. Тадқиқотнинг мақсади: ўзгарувчан коэффициентли икки карра ночизиқли параболик тенгламалар билан тавсифланадиган демпфирлаш таъсиридаги диффузия масалаларини сонли-аналитик ечиш усуллари ва алгоритмларини қуриш ҳамда дастурий таъминотини яратишдан иборат.
III. Тадқиқотнинг илмий янгилиги: 
демпфирлаш таъсиридаги ночизиқли иссиқлик тарқалиш, диффузия жараёнлар математик моделларининг иссиқлик тарқалиш тезлигининг чеклилиги, фазовий локаллашиш хоссалари аниқланган;
умумлашган Эмден-Фаулер тенгламаси билан тасвирланувчи математик моделнинг регуляр, чегараланмаган ва финит ечимларининг асимптотикалари топилган;
коэффициенти ўзгарувчан демпфирлаш таъсиридаги иссиқлик тарқалиш масаласининг глобал ечими ва иссиқлик тарқалиш фронтининг баҳоси олинган;
ўзгарувчан коэффициентли демпфирланиш таъсиридаги ночизиқли диффузия тенгламаси учун Коши масаласининг ечимлари баҳоси, автомодел ечимларининг тез, суст диффузия ва критик ҳолларда асимптотикалари топилган;
коэффициенти ўзгарувчан бўлган демпфирли икки карра ночизиқли параболик тенгламанинг стационар ҳоли учун хусусий ҳолда мавжуд асимптотик формулаларни қамраб олувчи ВКБ усул таклиф этилган ва асосланган, унинг асосида ечимнинг янги асимптотик формулалари олинган;
ўзгарувчан коэффициентли демпфирланиш таъсиридаги ночизиқли диффузия масаласини сонли ечиш схемалари ва алгоритмлари ишлаб чиқилган ва сонли ҳисоблаш учун муҳим бўлган бошланғич яқинлашишни топиш масаласи ҳал қилинган.
IV. Тадқиқот натижаларининг жорий қилиниши. Ўзгарувчан коэффициентли демпфирли ночизиқли параболик тенгламалар билан ифодаланувчи диффузия масалаларини сонли ва аналитик ечиш бўйича олинган илмий натижалар асосида:
бошланғич шартли ўзгарувчан коэффициентли демпфирли ночизиқли диффузия масалаларини сонли ечиш алгоритмлари ва глобал ечимнинг мавжудлик шартларидан №BV-Aтех-2018(399+487) “Икки компанентли муҳитда диффузион жараёнларни сонли моделлаштириш учун амалий дастурлар пакетини яратиш” грант лойиҳасида диффузион жараёнларни сонли моделлаштиришда фойдаланилган (Тошкент ахборот технологиялари университетининг 2022 йил 18 апрелдаги №1140/15-01-сон маълумотномаси). Натижада диффузион жараёнларни сонли моделлаштириш учун амалий дастурлар пакетини яратиш имконини берган.
бошланғич шарт билан берилган ўзгарувчан коэффициентли демпфирлаш таъсирида икки карра ночизиқли параболик тенгламалар билан тавсифланадиган диффузия масаласини аналитик ва сонли ечиш алгоритмлари ва усуллари ҳамда ишлаб чиқилган дастурий таъминотидан № I-AT-2021-493 “Ер ости сувларини сатҳини, ҳароратини ва электр ўтказувчанлигини масофадан аниқловчи инновацион ускуна яратиш” мавзусидаги грант лойиҳасида фойдаланилган (Тошкент ахборот технологиялари университетининг 2022 йил 18 апрелдаги №1141/15-01-сон маълумотномаси).  Натижада ер ости сувлари сатҳини, ҳароратини аниқлаш имконини берган.