Шоғўчқоров Санжар Қодир ўғлининг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Фотоэлектрик ва фотоиссиқлик батареялари асосида қуёший когенерацион қурилмаларини ишлаб чиқиш”, 05.05.06-“Қайта тикланадиган энергия турлари асосидаги энергия қурилмалари” ихтисослиги бўйича.
Диссертация мавзуси рўйхатга олинган рақам: В2021.1.PhD/T1641. 
Илмий раҳбар: Юлдошев Исроил Абриевич, техника фанлари доктори, доцент.
Диссертация бажарилган муассаса номи: Физика-техника институти. 
ИК фаолият кўрсатаётган муассаса номи, ИК рақами: Қарши муҳандислик-иқтисодиёт институти, PhD.03/30.09.2020.T.111.03.
Расмий оппонентлар: Пайзуллахонов Мухаммаде-Султанхон Сайдивалихонович, техника фанлари доктори, катта илмий ходим; Хужақулов Сайдулла Мирзаевич, техника фанлари бўйича фалсафа доктори, доцент.
Етакчи ташкилот: Фарғона политехника институти. 
Диссертация иши: назарий ва амалий аҳамиятга молик.
II. Тадқиқотнинг мақсади техник-иқтисодий жиҳатдан рационал кўрсаткичларга эга бўлган фотоиссиқлик батареялари асосида қуёш когенерацион қурилмаларини ишлаб чиқишдан иборат.
III. Тадқиқотнинг илмий янгилиги: 
фотоэлектрик қуёш батареясининг қизиб кетишини камайтириш мақсадида совуқ сув ҳаракатланадиган уяли поликарбонатли абсорбер билан такомиллаштирилган,  бир вақтнинг ўзида ҳам электр ҳам иссиқлик энергиясини олиш имконини берадиган ҳамда юқори ҳароратларда ҳам ишончли ишлайдиган қуёш когенерацион қурилмаси ишлаб чиқилган;
фотоэлектрик батареянинг нур тушадиган юзасини чанг билан ифлосланиш даражасини аниқлайдиган ва сиқилган ҳаво оқими ёрдамида чангдан тозалаш ҳамда чангли шароитда ҳам қурилманинг самарадорлигини таъминлаш имконини берадиган мобиль қурилма ишлаб чиқилган;
комбинациялашган фотоэлектрик батарея-термоэлектрик генератор тизимининг электрофизик ва иссиқлик-техникавий характеристикаларининг сув сарфи ва зичлаштирилган қуёш нурланишининг оқимига боғлиқлигини аниқлаш имконини берувчи математик модель ишлаб чиқилган; 
комбинациялашган фотоэлектрик батарея-термоэлектрик генератор тизимида фотоэлектрик қисми ўлчамларига мос никель қопламали рефлекторларни қўллаш орқали фотоэлектрик батарея максимал қувватининг 1,34 марта, термоэлектрик генераторнинг электр юритувчи кучини 1,7 марта ортиши аниқланган.
IV. Тадқиқот натижаларининг жорий қилиниши. Фотоэлектрик ва фотоиссиқлик батареялари асосида қуёш когенерацион қурилмасини ишлаб чиқиш бўйича олинган илмий натижалар асосида:  
фотоиссиқлик батареялари асосидаги қуёш когенерацион қурилмасининг такомиллаштирилган варианти «All Solar» МЧЖда синовдан ўтказилган («Uzeltexsanoat» уюшмасининг 2021 йил 3 декабрдаги №04-3/2548-сонли маълумотномаси). Натижада, қуёш когенерацион қурилмасининг ФИК анъанавий ФЭБнинг ФИКга нисбатан 2% юқори эканлиги асосланган;
кунлик 2 кВт·соат электр энергияси ва 200 литр иссиқ сув ишлаб чиқариш имкониятига эга фотоиссиқлик батарея асосидаги қуёш когенерацион қурилма Қашқадарё вилояти Нишон тумани «Тошев Шаҳзодбек Бекбўтаевич» фермер хўжалиги ва Қашқадарё вилояти Деҳқонобод тумани “Бойқўрғон сара чорва”  хусусий корхоналарида жорий этилган (Ўзбекистон Республикаси Қишлоқ хўжалиги вазирлигининг 2022 йил 7 апрелдаги №07/30-04/2045 сонли маълумотномаси). Натижада, анъанавий ресурсларни сотиб олиш харажатларини камайтириш, фермер хўжалигини электр энергияси ва иссиқ сув билан таъминлаш ҳисобига йиллик иқтисодий самарадорлик 30 миллион сўмни ташкил этишига эришилган.