Холбоева Гулҳаё Холбоевнанинг
фалсафа доктори (PhD) диссертацияси ҳимояси ҳақида эълон

I. Умумий маълумотлар. Диссертация мавзуси, ихтисослик шифри (илмий даража бериладиган фан тармоғи номи): “Мактабгача ёшдаги болаларнинг ҳаракат фаоллигини ноанъанавий жисмоний машқлар воситаси ёрдамида такомиллаштириш (гимнастика машқлари мисолида)”, 13.00.04 – Жисмоний тарбия ва спорт машғулотлари назарияси ва методикаси (педагогика фанлари).
Диссертация мавзуси рўйхатга олинган рақам: В2019.1.PhD/Ped827.
Диссертация бажарилган муассаса номи: Самарқанд давлат университети.
ИК фаолият кўрсатаётган муассаса (муассасалар) номи, ИК рақами: Ўзбекистон давлат жисмоний тарбия ва спорт университети, DSc.03/30.12.2019.Ped.28.01.
Илмий раҳбар: Ҳайдаров Бахтиёр Тожиевич, педагогика фанлари номзоди, профессор.
Расмий оппонентлар: Ханкельдиев Шер Хакимович, педагогика фанлари доктори, профессор; Холмуродов Лазиз Зарифбоевич, педагогика фанлари бўйича фалсафа доктори (PhD), доцент.
Етакчи ташкилот: Ўзбекистон миллий университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади ноанъанавий гимнастика воситалари ёрдамида мактабгача ёшдаги болаларнинг ҳаракат фаоллигини ошириш бўйича таклиф ва тавсиялар ишлаб чиқишдан иборат.
III. Тадқиқотнинг илмий янгилиги:
мактабгача ёшдаги болаларнинг ҳаракат фаоллигини ошириш учун таянч-ҳаракат тизимидаги мушакларни (бўғинлар ва бойламлар) ривожланганлик даражаларидан келиб чиққан ҳолда мувозанат сақлаш ҳамда реаблитацияга йўналтирилган ноанъанавий аутомануал гимнастика машқларини тана қисмларига танлаб йўналтириш ҳисобига ёшга мос ҳаракат кўникмаларини шакллантириш имконияти кенгайтирилган;
мактабгача ёшдаги болаларни жисмоний фаоллик даражасини инобатга олиб индивидуал ёндошув орқали мушаклар ҳаракатчалигини уйғун тарбиялашга қаратилган логоритмик гимнастикада нутқ ва ҳаракатни бир хил ритм ҳамда темпда бажартириш ҳисобига болалар аеробика машғулотларидан фойдаланиш имконияти кенгайтирилган;
мактабгача ёшдаги болалар организмининг функционал ва адаптив имкониятларидан келиб чиқиб статик режимда умуртқа поғонаси мушак қайишқоқлигини ривожлантиришга қаратилган спринг эластика микромашғулотларини ишлаб чиқиш ҳисобига машғулотларни ўз вақтида тезкор коррекциялаш услубияти такомиллаштирилган;
мактабгача ёшдаги болаларни мушак эластиклигини ошириш учун диққатни жамлаш, машқлар орасида мувозанат сақлаш интервалини узайтириш даражасидан келиб чиқиб “Ҳатҳа” ёга асаналари машқларида ҳаракатни ассиметрик ва асинхрон йўналишини киритиш ҳисобига ҳаракат фаоллигини ошириш имконияти кенгайтирилган.
IV. Тадқиқот натижаларининг жорий қилиниши: Мактабгача ёшдаги болаларнинг ҳаракат фаоллигини ошириш учун ишлаб чиқилган машқлар асосида:
реаблитацияга йўналтирилган ноанъанавий (аутомануал) гимнастика воситаларини тана қисмларига танлаб йўналтириш бўйича таклифлар “Мактабгача таълим ташкилотларида жисмоний тарбия назарияси” номли ўқув қўлланма мазмунига сингдирилган (Самарқанд давлат университети кенгашининг 2020 йил 29 февралдаги 7-сон қарорига асосан 140 рақамли нашр рухсатномаси). Натижада 3-7 ёшли болаларнинг ҳаракат фаоллиги кўрсаткичлари 11,32% га ортган;
мактабгача ёшдаги болаларни жисмоний сифатларни ривожлантириш ҳамда мушакларни ҳаракатчанлигини уйғун тарбиялашга қаратилган логоритмик гимнастика, болалар аеробикаси машғулотлари ташкил қилиш бўйича таклифлар “Мактабгача таълим ташкилотларида жисмоний тарбия назарияси ва методикаси” номли дарслик мазмунига сингдирилган (Самарқанд давлат университети кенгашининг 2020 йил 29 сентябрдаги 2-сон қарорига асосан 217 рақамли нашр рухсатномаси). Натижада болаларнинг жисмоний сифатлари 14-16% га яхшиланган;
мактабгача ёшдаги болалар организмининг функционал ва адаптив имкониятларидан келиб чиқиб статик режимда спринг эластика микромашғулотларини қўллаш бўйича таклифлар “Мактабгача таълим ташкилотларида жисмоний тарбия назарияси” номли ўқув қўлланма мазмунига сингдирилган (Самарқанд давлат университети кенгашининг 2020 йил 29 февралдаги 7-сон қарорига асосан 140 рақамли нашр рухсатномаси). Натижада болаларнинг эгилувчанлик имкониятлари 18% га яхшиланган;
мактабгача ёшдаги болаларни “Ҳатҳа” ёга асаналари воситасида ҳаракатни ассиметрик ва асинхрон йўналишини киритиш бўйича таклифлар асосида мактабгача ёшдаги болалар учун “Ёш гимнастикачилар” жисмоний тарбия ва спорт йўналиши бўйича қўшимча умумий ривожланиш дастури амалиётга жорий этилган (Ўзбекистон Республикаси Жисмоний тарбия ва спорт вазирлигининг 2021 йил 9 мартдаги 03-07-08-846-сон маълумотномаси).  Натижада 6-7 ёшли болаларда функционал кўрсаткичлар-5,46% га ривожланган.