Мирвалиев Зоид Зоҳидовичнинг
фан доктори (DSc) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган тармоғи номи): «Полимер материаллари учун ресурстежамкор, экологик хавфсиз кимёвий қўшимчалар ишлаб чиқиш, уларнинг олиниш технологияси ва қўлланилиши», 02.00.14 – Органик моддалар ва улар асосидаги материаллар технологияси (техника фанлари).
Диссертация мавзуси рўйхатга олинган рақам: B2021.3.DSc/T452.
Илмий маслаҳатчи: Джалилов Абдулахат Турапович, кимё фанлари доктори, академик.
Диссертация бажарилган муассаса номи: Тошкент кимё-технология илмий-тадқиқот институти.
ИК фаолият кўрсатаётган муассаса номи, ИК рақами: Тошкент кимё-технология илмий-тадқиқот институти, DSc.16/30.12.2019.Т.87.01.
Расмий оппонентлар: Мухиддинов Баҳодир Фаҳриддиннович, кимё фанлари доктори, профессор; Қодиров Тўлқин Жумаевич, техника фанлари доктори, профессор; Каримов Масъуд Убайдулла ўғли, техника фанлари доктори, катта илмий ходим.
Етакчи ташкилот: Ўзбекистон миллий университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади: полимер материалларида қўлланиладиган стабилизатор-антиоксидант ва тўлдирувчилар сифатида ресурстежамкор, экологик хавфсиз  кимёвий қўшимчаларнинг технологияларини ишлаб чиқишдан иборат.
III. Тадқиқотнинг илмий янгилиги:
илк бор госсипол азометинлар мисолида кенг доирадаги полимерларда термооксидланиш стабилизациясининг илмий ёндашувини инобатга олган ҳолда, госсиполдаги азометин гуруҳларининг ингибирлаш таъсир механизми аниқланган;
полиолефин системаларида термооксидланиш деструкциясига госсипол гидроксил гуруҳларининг ингибирлаш фаоллигини белгилайдиган қиёсий таҳлилнинг сифат ва миқдорий кўрсатгичлари аниқланган;
полимерларнинг термооксидланиш деструкция жараёнида госсипол азометинларининг кинетик қонуниятлари ва ингибирлаш механизми ва ингибирлаш фаоллиги госсипол азометин ўриндош амин гуруҳлари ҳисобига содир бўлиши исботланган;
полифункционал таъсирга эга иккиламчи технолик ресурслардан фойдаланган ҳолда полимер материалларига стабилизатор-антиоксидант сифатида ресурстежамкор ва экологик ҳавфсиз кимёвий қўшимчаларни ишлаб чиқишнинг оптимал шароит аниқланган;
кимёвий қўшимчаларнинг тури ва таркибини полимер (эластомер) материалларининг эксплуатацион ва махсус хусусиятларини (оксидланишнинг индукцион даври, термик ва термооксидланишдаги дегидрогалогенланиш тезлиги ва бошқалар) технологик хусусиятларига боғлиқлик қонуниятлари аниқланган;
илк бор термопластлар ҳамда эластомерлар термостабилизациясида синтез қилинган  ва саноатдаги классик стабилизатор – антиоксидантларнинг аралашмаси асосида синергик таъсирнинг фаоллигини намоён қилувчи ингибирлаш жараёни механизми аниқланган.
IV. Тадқиқот натижаларининг жорий қилиниши.
Полимер материаллари учун полифункционал кимёвий қўшимчаларни ишлаб чиқиш бўйича олинган илмий натижалар асосида:
ПВХ канализация қувурларини ишлаб чиқариш учун техник шарт Ўзбекистон илмий – синов ва сифат назорати маркази «UzTest» томонидан тасдиқланган (TSh 46-149267741-01.2005). Мазкур техник шарт маҳсулотнинг сифати ва технологик жараённи назорат қилиш имконини берган;
«Электр кабел химоя қопламалари учун антикоррозион компаунд»га Россия Федерацияси Роспатент Интеллектуал мулк бўйича Федерал хизматининг ихтирога патенти олинган (RU №2296788). Натижада, кабеллар тайёрлашда антикоррозион химоя қопламаси сифатида қўлланиладиган антикоррозион компаундларни ишлаб чиқариш  турларини кенгайтириш имконини берган;
полифункционал олигомер кимёвий қўшимчалари «Биринчи резина заводи»да резинатехника маҳсулотлари рецептураси таркибига киритишда жорий этилган («Биринчи резина заводи»нинг 2021 йил10 декабрдаги 07-221830-сон маълумотномаси). Натижада, локализация дастури доирасида маҳаллий хомашёлар асосида резина қоришмалари учун ингредиентлар ишлаб чиқиш имконини берган;
ишлаб чиқилган кўп мақсадли самарали кимёвий қўшимчаларни полимер материаллари (ПВХ) Шуртан ГКМнинг «Қаршитермопласт» корхонаси маҳсулотлари рецептураси таркибида амалиётга жорий этилган («Шуртан ГКМ»нинг 2021йил 26 июлдаги 15УМ-054/178-сон маълумотномаси). Натижада, кўп тоннажли техноген маҳсулотларини ишлаб чиқаришга жалб қилиш орқали полимер материаллари учун ресурстежамкор ва экологик хавфсиз кимёвий қўшимчалар ишлаб чиқиш имконини берган.