Иноятходжаев Жамшид Шухратуллаевичнинг

фан доктори (DSc) диссертацияси ҳимояси ҳақида эълон

I. Умумий маълумотлар.

Диссертация мавзуси, ихтисослик шифри (илмий даража бериладиган фан тармоғи номи): «Нейрон тармоқлари орқали двигателни автомобиль мехатрон тизими билан интеграция қилиш усулларини ишлаб чиқиш», 05.08.06–Ғилдиракли ва гусеницали машиналар ва уларни ишлатиш (техника фанлари).

Диссертация мавзуси рўйхатга олинган рақам: В2017.1.DSc/Т61.

Илмий маслаҳатчи: Шермухамедов Абдулазиз Адилхакович, техника фанлари доктори, профессор.

Диссертация бажарилган муассаса номи: Тошкент автомобиль йўлларини лойиҳалаш, қуриш ва эксплуатацияси институти.

ИК фаолият кўрсатаётган муассаса (муассасалар) номи, ИК рақами: Тошкент автомобиль йўлларини лойиҳалаш, қуриш ва эксплуатацияси институти, Тошкент шаҳридаги Турин политехника университети, DSc.27.06.2017.Т.09.01.

Расмий оппонентлар: Мухитдинов Акмал Анварович, техника фанлари доктори, профессор; Арипджанов Мадамин Магрупович, техника фанлари доктори, профессор; Марио Лавелла, фан доктори, профессор (Италия).

Етакчи ташкилот: Тошкент давлат техника университети.

Диссертация йўналиши: назарий ва амалий аҳамиятга молик.

II. Тадқиқотнинг мақсади: нейрон тармоқлари орқали двигателни автомобиль мехатрон тизими билан интеграция қилиш услубларини ишлаб чиқишдан иборат.

III. Тадқиқотнинг илмий янгилиги:

двигателни автомобиль мехатрон тизимига нейрон алоқалар архитектурасига асосланган бошқарув тизими орқали интеграция қилиш услуби ишлаб чиқилган;

двигателни бошқарув тизими маълумотлари таҳлили ва бошқарувчи органларига етказиб беришнинг услуби (нейрон алоқаларнинг диссперсияси) яратилган ва унинг унумдорлиги асосланган;

учинчи авлод – йиғма маълумотларни таҳлиллаш ва оптимал режимларни танлаш турли автомобиль синфлари учун мехатроника тизимига эга бошқарув алгоритми яратилган;

ўт олдириш тизими учун мехатрон адаптор модели ишлаб чиқилган;

нейрон тармоқлари орқали двигателни бошқарув модели ишлаб чиқилган;

бошқарув тизимидаги нейрон алоқаларни интеграция сўровларига асосан танлаш усуллари ишлаб чиқилган.

IV. Тадқиқот натижаларининг жорий қилиниши:

Двигателни автомобиль мехатрон тизимига нейрон алоқалар архитектурасига асосланган бошқарув тизими орқали интеграция қилиш услуби натижалари асосида:

двигателни бошқарув тизими маълумотлари таҳлили ва бошқарувчи органларига етказиб бериш услуби “Дженерал Моторс Пауэртрейн Узбекистан” АЖга жорий этилган (“Ўзавтосаноат” компаниясининг 2017 йил 14 августдаги 45/04-25-2688-сон маълумотномаси; технологик жараён техник шарти (Тs 22596387-01:2015)). Натижада ишлаб чиқариш самарадорлигини 9% ошириш, тажриба ва машиналарнинг завод синовларини ўтказиш харажатларини 6,5% камайтириш, ишлаб чиқаришда меҳнат  унумдорлигини 11% ошириш имконини берган;

ўт олдириш тизими учун ишлаб чиқилган мехатрон адаптор модели ва унинг параметрларини асослаш услуби “Дженерал Моторс Пауэртрейн Узбекистан” АЖга жорий этилган (“Ўзавтосаноат” компаниясининг 2017 йил 14 августдаги 45/04-25-2688-сон маълумотномаси). Илмий тадқиқот натижасида ўт олдириш тизими учун ишлаб чиқилган мехатрон адаптор модели двигателларни синаш жараёнини такомиллаштириш имконини берган;

йиғма маълумотларни таҳлиллаш ва оптимал режимларни танлаш услуби “Ўзавтосаноат” компаниясининг корхоналарига, жумладан “Дженерал Моторс Пауэртрейн Узбекистан” АЖ ва “UzKoji” ҚКга жорий этилган (“Ўзавтосаноат” компаниясининг 2017 йил 14 августдаги 45/04-25-2688-сон маълумотномаси). Ишлаб чиқилган йиғма маълумотларни таҳлиллаш ва оптимал режимлари турли автомобиль синфлари учун мехатроника тизимли J200 автомобили ва L2C BDOHC 1,5 двигателини тажриба-конструкторлик ва завод синовларини ўтказиш жараёнида қўлланилди. Илмий тадқиқот натижасида ишлаб чиқариш жараёнида 48,4 кВт энергияни ва 6400 литр ёқилғи харажатларини қисқартириш, ишлаб чиқаришда меҳнат сарф-харажатларини 800 одам∙соатга камайтириш имконини берган.