Абдуалиев Нуриддин Ҳабибовичнинг
фалсафа доктори (PhD) диссертацияси ҳимояси ҳақида эълон 

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Ғўза қаторлари орасида пол ҳосил қиладиган қурилма зичлагичининг параметрларини асослаш», 05.07.01 – «Қишлоқ хўжалиги ва мелиорация машиналари. Қишлоқ хўжалиги ва мелиорация ишларини механизациялаш» (техника фанлари).
Диссертация мавзуси рўйхатга олинган рақам: В2021.1.PhD/T1465.
Илмий раҳбар: Байбобоев Набижон Ғуломович, техника фанлари доктори, профессор.
Диссертация бажарилган муассаса номи: Тошкент ирригация ва қишлоқ хўжалигини механизациялаш институтининг Бухоро филиали.
ИК фаолият кўрсатаётган муассаса номи, ИК рақами: Наманган муҳандислик-қурилиш институти, PhD.03/30.12.2019.Т.90.01.
Расмий оппонентлар: Мансуров Мухторжон Тохиржонович, техника фанлари доктори; Худояров Анвар Назиржонович, техника фанлари номзоди, профессор.
Етакчи ташкилот: Наманган муҳандислик-технология институти.
Диссертация йўналиши: назарий ва амалий аҳамиятга молик.
II. Тадқиқотнинг мақсади ғўза қаторлари орасида бўйлама пол ҳосил қиладиган қурилма зичлагичининг параметрларини асослаш орқали бўйлама пол ҳосил қилиш технологик жараёнини такомиллаштиришдан иборат.
III. Тадқиқотнинг илмий янгилиги:
ғўза қатор ораларида бўйлама пол ҳосил қиладиган қурилма асосида пол зичлигини таъминловчи катокнинг янги конструкцияси ишлаб чиқилган ва технологик иш жараёни асосланган; 
бўйлама полни талаб даражасида зичланишини таъминлайдиган зичловчи ишчи қисмига бериладиган тик юкланиш кучининг ўзгариш конуниятларини аниқловчи аналитик ифодалар тупроқнинг ҳажмий эзилиш коэффициенти ҳамда қурилманинг ҳаракат тезлигига боғлиқ равишда олинган;
полни талаб даражасида зичлаш учун зичловчи катокка бериладиган тик юкланиш (катокнинг оғирлик кучи, пружинанинг сиқувчи кучи)ни ҳисобга олган ҳолда тупроқнинг физик-механик хоссалари, катокнинг параметрлари, агрегатнинг ҳаракат тезлиги ўртасидаги боғланишларни ифодаловчи аналитик математик моделлар олинган;
ғўза қатор ораларида бўйлама пол ҳосил қиладиган зичловчи катокнинг диаметри, конуслик бурчаги ва катокка бериладиган тик юкланиш кучларининг рационал қийматлари, унинг агротехник ва энергетик иш кўрсаткичларига боғлиқ равишда регрессион таҳлил ёрдамида аниқланган.
IV. Тадқиқот натижаларининг жорий қилиниши.
Ғўза қаторлари орасида бўйлама пол ҳосил қиладиган зичловчи ишчи орган билан жиҳозланган қурилманинг параметрларини асослаш бўйича ўтказилган тадқиқотларда олинган илмий натижалар асосида:  
Ўзбекистон Республикаси Интеллектуал мулк агентлигининг фойдали моделга патенти олинган (FAP 01436 «Ғўза қатор ораларида бўйлама пол ҳосил қилувчи ва зичловчи қурилма», 2019 й.). Натижада ғўза қатор ораларида пол ҳосил қилишда иш сифати ва унумини ошириш ҳамда энергия-материал ҳажмдорликни камайтириш имкониятига эга бўлган зичловчи иш орган билан жиҳозланган қурилма конструкциясини ишлаб чиқиш имконияти яратилган; 
ишлаб чиқилган пол ҳосил қилиш қурилмаси Тошкент ирригация ва қишлоқ хўжалигини механизациялаш мухандислари институтининг Бухоро филиали ўқув – илмий марказида (Когон тумани), Бухоро вилоятининг Бухоро, Жондор ва Вобкент туманлари фермер хўжаликларида жорий қилинган (Қишлоқ хўжалиги вазирлигининг 2021 йил 19 августдаги № 02/023-3416 сон маълумотномаси). Натижада меҳнат сарфи 46,2 фоизга камайган, иш унуми 1,5 мартага оширишга эришилган; 
ғўза қатор ораларида бўйлама пол ҳосил қилиш қурилмасининг конструкцияси “ВМКВ-Agromash” АЖ га ишлаб чиқаришга жорий этиш учун қабул қилинган (Қишлоқ хўжалиги вазирлигининг 2021 йил 19 августдаги № 02/023-3416 сон маълумотномаси). Натижада ғўза қатор ораларида пол ҳосил қиладиган такомиллаштирилган қурилманинг саноат нусхаларини яратиш имконияти яратилган.