Джураев Курбон Салихджановичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Гидроаккумуляцион электр станциялар параметрларини танлаш ва асослаш ҳамда улардан Ўзбекистон энергетика ва сув хўжалиги тизимида фойдаланиш шартлари”, 05.05.06 – “Қайта тикланадиган энергия турлари асосидаги энергия қурилмалари” (техника фанлари).
Диссертация мавзуси рўйхатга олинган рақам: В2021.3.PhD/Т774 Илмий раҳбар: Мухаммадиев Мурадулла Мухаммадиевич, техника фанлари доктори, профессор.
Диссертация бажарилган муассаса номи: Ислом Каримов номидаги Тошкент давлат техника университети.
ИК фаолият кўрсатаётган муассаса (муассасалар) номи, ИК рақами: Тошкент давлат техника университети ҳузуридаги DSc.03/10.12.2019.Т.03.03.
Расмий оппонентлар: Авезова Нилуфар Раббанакуловна, техника фанлари доктори, етакчи илмий ходим; Елистратов Виктор Васильевич, техника фанлари доктори, профессор (Россия). 
Етакчи ташкилот: Тошкент ирригация ва қишлоқ хўжалигини механизациялаш муҳандислари институти. 
Диссертация йўналиши: назарий ва амалий аҳамиятга молик.
II. Тадқиқотнинг мақсади: гидроаккумуляцион электр станциялардан электр энергетика ва қайта тикланувчи энергия манбалари асосидаги тизимлар учун манёврчан манба сифатида фойдаланишнинг хусусиятларини ҳисобга олган ҳолда уларнинг параметрларини танлаш ва асослашдан иборат.
III. Тадқиқотнинг илмий янгилиги:
гидроаккумуляцион электр станциясининг технологик схемаси кунлик ва мавсумий иш режимларини ҳисобга олган ҳолда ишлаб чиқилган;
гидроаккумуляцион электр станциясининг асосий параметрлари ва иш режимларини ҳисоблаш усули паст напорли шароит учун такомиллаштирилган; 
гидроаккумуляцион электр станциянинг конструкцияси гидротаран асосида такомиллаштирилган ва гидротараннинг чегаравий фойдали иш коэффициенти сув кўтариш баландлигига боғлиқ бўлмаган ҳолда 75% га тенглиги аниқланган;
паст напорли гидроаккумуляцион энергетик қурилманинг турбина режимида Банки турбинасидан фойдаланиш самарадорлиги экспериментал тадқиқотлар асосида исботланган.
IV. Тадқиқот натижаларининг жорий қилиниши. 
Ўзбекистон энергетика ва сув хўжалиги тизимида гидроаккумуляцион электр станциялардан фойдаланишнинг хусусиятларини ҳисобга олган ҳолда уларнинг параметрларини танлаш ва асослаш бўйича тадқиқот натижалари асосида:
гидроаккумуляцион электр станциясидан гидротаранларни қўллаш орқали фойдаланиш усули такомиллаштирилган (Интеллектуал мулк агентлигининг фойдали модел учун патенти, №FAP 01018, 15.06.2015 й.). Ишлаб чиқилган усул гидроаккумуляцион электр станциялар насос режимидаги электр энергияси истеъмолини 30 % гача камайтиришга имкон берган;
гидроаккумуляцион электр станцияларининг энергетик-гидравлик параметрларини аниқлаш усули «Гидропроект» АЖда жорий қилинган («Ўзбекгидроэнерго» АЖнинг 2020 йил 30 декабрдаги  №02-14/3851-сонли маълумотномаси). Натижада, Туямўйин гидроузелида, Арнасой, Талимаржон ва Ходжикент сув омборларида гидроаккумуляцион электр станцияларни яратиш бўйича ҳисоблаш ишларида фойдаланган ва йилига қўшимча равишда 930,0 млн. кВт·соат электр энергияси ишлаб чиқаришга  имкон берган;
гидроаккумуляцион электр станцияларининг энергетик-иқтисодий кўрсаткичларини аниқлаш дастури «Гидропроект» АЖда жорий қилинган («Ўзбекгидроэнерго» АЖнинг 2020 йил 30 декабрдаги  №02-14/3851-сонли маълумотномаси). Натижада, Ўзбекистон Республикасининг тўртта энергетика ва сув хўжалиги объектларида гидроаккумуляцион электр станцияларни яратиш бўйича ҳисоблаш натижалари асосида йилига 139 минг т.ш.ё. ёқилғи ресурсларини тежашга имкон берган.