Тошева Хакима Бекмуродовнанинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Сурункали юрак етишмовчилиги камқонлик билан кечганда комплекс даволаш негизида буйрак фиброз маркерларининг динамикаси» 14.00.05 – Ички касалликлар (тиббиёт фанлари).
Диссертация мавзуси рўйхатга олинган рақам: В2020.2.PhD/Tib1156.
Илмий раҳбар: Гадаев Абдигаффар Гадаевич, тиббиёт фанлари доктори, профессор.
Диссертация бажарилган муассаса номи: Бухоро давлат тиббиёт институти.
ИК фаолият кўрсатаётган муассаса (муассасалар) номи, ИК рақами: Тошкент тиббиёт академияси, DSc.04/30.12.2019.Tib.30.02. 
Расмий оппонентлар: Нуриллаева Наргиза Мухтархановна, тиббиёт фанлари доктори; Абдуллаев Акбар Хатамович, тиббиёт фанлари доктори.
Етакчи ташкилот: Андижон давлат тиббиёт институти.
Диссертация йўналиши: амалий аҳамиятга молик.
II. Тадқиқоднинг мақсади: сурункали юрак етишмовчилиги  камқонлик билан кечган беморларда буйрак фиброз маркерлари динамикаси ва феррокинетик кўрсаткичларига комплекс стандарт муолажалар негезида ўтказилган антианемик даво самарадорлигини баҳолашдан иборат.
III. Тадқиқотнинг илмий янгилиги:
илк маротаба камқонлик билан биргаликда кечган СЮЕ мавжуд беморларда камқонлик кўрсаткичлари ва буйрак фаолияти ҳолати қон зардобидаги темир, трансферрин, ферритин, TGF β1 ва β2 микроглобулин ёрдамида комплекс баҳоланган;
СЮЕ камқонлик билан кечганда касалликнинг оғирлик даражаси унинг функционал синф ортиши ва гемоглобин кўрсатгичининг пасайишига боғлиқ ҳолда кучайиши исботланган;
СЮЕ  камқонлик билан кечган беморларда буйрак коптокчалари фаолияти цистатин-С, проксимал  каналчалари функционал ҳолати β2-микроглобулин, тубулоинтерстициал фиброз жараёнлари ТGF-β1 ёрдамида аниқланиши исботланган;
биринчи маротаба СЮЕ камқонлик билан кечганда комплекс даво негезида антианемик терпиянинг буйрак дисфункциясига ижобий таъсири, яъни коптокчалар фильтрацияси тезлигининг ошиши, цистатин С кўрсаткичларининг камайиши такомиллаштирилган.  
IV. Тадқиқот натижаларининг жорий қилиниши. СЮЕ камқонлик билан кечганда комплекс даволаш негизида буйрак фиброз маркерларини динамикаси ва унинг амалий аҳамияти бўйича олиб борилган илмий тадқиқот натижалари асосида:
кардиоренал анемик синдром ва унда буйракдаги фиброз жараёнларни эрта ташхислашнинг амалий аҳамияти бўйича олинган илмий натижалар асосида ишлаб чиқилган «Кардиоренал анемик синдром ва унда буйракдаги фиброз жараёнларни эрта ташхислашни амалий аҳамияти» номли услубий тавсияномаси тасдиқланган (Соғлиқни сақлаш вазирлиги илмий фаолиятни мувофиқлаштириш бўлимининг 2021 йил 12 мартдаги 8н-д/96-сонли маълумотномаси). Мазкур услубий тавсиянома СЮЕ негизида ривожланган камқонлик мавжуд беморларда стандарт даво негизида антианемик муолажалар биргаликда олиб борилганда буйракдаги фиброз жараёнларини секинлаштириш имконини берган;
кардиоренал анемик синдром ва унда буйракдаги фиброз жараёнларни эрта ташҳислаш алгоритми бўйича олинган илмий натижалар асосида ишлаб чиқилган «Кардиоренал анемик синдром ва унда буйракдаги фиброз жараёнларни эрта ташҳислаш алгоритми» номли услубий тавсияномаси тасдиқланган (Соғлиқни сақлаш вазирлигининг 2021 йил 12 мартдаги 8н-д/96--сонли маълумотномаси). Мазкур услубий тавсиянома СЮЕ камқонлик билан кечганда буйракдаги фиброз жараёнларини эрта аниқлаш ва асоратларини камайтириш имконини яратган.
СЮЕ камқонлик билан кечганда буйракдаги фиброз жараёнларни ривожланиш профилактикасини оптималлаштириш тамойиллари ҳамда даво-профилактик чора-тадбирларининг асосланганлиги соғлиқни сақлаш амалиёти, жумладан, Когон туман тиббиёт бирлашмаси, Бухоро туман тиббиёт бирлашмаси, Бухоро вилоят кўп тармоқли тиббиёт маркази, Республика ихтисослаштирилган кардиология илмий-амалий тиббиёт маркази амалиётига жорий этилган (Соғлиқни сақлаш вазирлигининг 2021 йил 13 июлдаги 08-09/8144 - сон маълумотномаси). Олинган тадқиқот натижаларининг клиник амалиётга жорий қилинишида ташҳислаш жараёнини аниқ ва тез бажарилиши, СЮЕ камқонлик билан кечганда буйракдаги фиброз жараёнларни стандарт даво негизида антианемик терапия билан даволашда асоратлар сонининг қисқариш имконини берган.