Ибрагимов Улуғбек Мурадиллоевичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи): “Олий таълим муассасаларида моделлаштириш дастурларидан фойдаланиб умумкасбий фанлари ахборот-методик таъминотини такомиллаштириш”, 13.00.06 – Электрон таълим назарияси ва методикаси (педагогика фанлари).
Диссертация мавзуси рўйхатга олинган рақам: В2020.4.PhD/Ped1044    
Илмий раҳбар: Олимов Қаҳрамон Танзилович – педагогика фанлари доктори, профессор.
Диссертация бажарилган муассаса номи: Бухоро муҳандислик-технология институти
ИК фаолият кўрсатаётган муассаса (муассасалар) номи: Педагогик инновациялар, касб-ҳунар таълими бошқарув ҳамда педагог кадрларини қайта тайёрлаш ва уларнинг малакасини ошириш институти, DSc.03/30.12.2019.Ped 48.01.
Расмий оппонентлар: Ҳамидов Жалил Абдурасулович, педагогика фанлари доктори, профессор; Мўминов Баҳодир Болтаевич, техника фанлари доктори, профессор.
Етакчи ташкилот: Урганч Давлат университети.
Диссертация йўналиши: амалий ва назарий аҳамиятга молик.
II. Тадқиқотнинг мақсади техника йўналишдаги олий таълим муассасаларида умумкасбий фанларни моделлаштириш дастурларидан фойдаланиб ўқитишнинг ахборот-методик таъминотини такомиллаштиришдан иборат. 
III. Тадқиқотнинг илмий янгилиги:
техника йўналишидаги олий таълим муассасаларида ахборот таълим муҳитининг комплексивлик, кўргазмалилик ва объективлик тамойиллари асосида умумкасбий фанлар мазмунини моделлаштириш дастурлари билан интеграциялаш орқали муҳандислик таълимининг имитацион-вариативлик ва визуал-амалий йўналганлик имкониятлари кенгайтирилган; 
умумкасбий фанлардан амалий ва тажриба машғулотларини ташкил этишда касбий муаммоларга амалий ечим топишга қаратилган дастурий воситалар асосида график ҳисоблашларни моделлаштириш орқали талабаларнинг технологик жараёнларни лойиҳалаш ва бошқариш кўникмаларини ривожлантириш методикаси такомиллаштирилган; 
синергетик ва фаолиятли ёндашувлар асосида умумкасбий фанлардан мустақил таълим олишнинг ахборот-методик таъминотини (ижтимоий видео канал, топшириқлар тизими платформаси ва мессенжер ботлар) ишлаб чиқиш орқали муҳандислик таълимининг лойиҳавий, ташкилий ва натижавий компонентларининг мазмуни (катта ҳажмдаги техник маълумотларга ишлов бериш ва тизимлаштириш) такомиллаштирилган;
кибернетик қонуниятлар ва ахборот коммуникацион технологиялари асосида ишлаб чиқилган JSON (Java Script Object Notation) форматидан умумкасбий фанларни ўқитиш жараёнида фойдаланиш орқали талабаларнинг ўзлаштириш натижаларини баҳолаш тизими (ОТМ-Moodle-Мессенжер бот-Буюртмачи) такомиллаштирилган.
IV. Тадқиқот натижаларининг жорий қилиниши. Техника йўналишидаги олий таълим муассасаларида моделлаштириш дастурларидан фойдаланиб умумкасбий фанларнинг ахборот-методик таъминотини такомиллаштириш бўйича ишлаб чиқилган методик ва амалий таклифлар асосида:
техника йўналиши олий таълим муассасаларида умумкасбий фанларни ўқитишда моделлаштириш дастурларидан фойдаланишнинг имитацион-вариативлик ва визуал-амалий йўналганлик имкониятларига оид таклифлардан 5321700 – Технологик жараёнларни бошқаришниниг ахборот-коммуникация тизимлари бакалавриат таълим йўналиши малака талабларини ишлаб чиқишда фойдаланилган (Ўзбекистон Республикаси Олий ва ўрта махсус таълим вазирлигининг 2021 йил 08 январдаги  89-03-100-сон маълумотномаси). Мазкур таклифлар олий таълимда бўлажак муҳандисларни касбий фаолиятга тайёрлаш жараёнини такомиллаштиришга хизмат қилади; 
умумкасбий фанлардан мустақил таълим олишнинг ахборот-методик таъминоти (ижтимоий видео канал, топшириқлар тизими платформаси ва мессенжер ботлар) ишлаб чиқилган ва Наманган муҳандислик-технология институти, Фарғона политехника институти, Жиззах политехника институти ҳамда Бухоро муҳандислик-технология институтининг бакалавриат таълим йўналишлари ўқув жараёни амалиётида жорий қилинган (Ўзбекистон Республикаси Олий ва ўрта махсус таълим вазирлигининг 2021 йил 08-январдаги  89-03-100-сон маълумотномаси). Мазкур ахборот-методик таъминот бўлажак муҳандисларнинг моделлаштириш дастурларидан фойдаланиш кўникмаларини ривожлантиришга хизмат қилади;
талабаларнинг технологик жараёнларни лойиҳалаш ва бошқариш кўникмаларини ривожлантириш методикасига оид методик тавсиялар AIF 2/20 - “Техник йўналишдаги олий ўқув юртларида шахсга йўналтирилган инновацион технологиялар асосида малакали муҳандисларни тайёрлаш сифатини ва ўқитувчилар малакасини ошириш” (2019-2021 йй) мавзусидаги  халқаро грант лойиҳасини амалга оширишда фойдаланилган (Ўзбекистон Республикаси Олий ва ўрта махсус таълим вазирлигининг 2021 йил 18 сентабрдаги 89-03-3554-сон маълумотномаси). Мазкур методик тавсиялар муҳандислик таълими жараёнида талабаларнинг мустақил таълимини самарали ташкил қилиш ва ўтказишга хизмат қилади; 
техника йўналишидаги олий таълим муассасасалари бўлажак муҳандисларнинг умумкасбий фанлардан ўзлаштириш натижаларини баҳолаш тизимини қамраб олувчи JSON (Java Script Object Notation) форматидан фойдаланишга оид таклифлар “Дастурлаш тиллари базасида техник иловалар” номли дарслик, “Муҳандисликда моделлаштириш дастурлари (CAD/CAM/CAE)” бўйича мультимедиали электрон ўқув қўлланма ва “Дастурлаш тиллари базасида техник иловалар” фанидан электрон дарслик мазмунига сингдирилган (Ўзбекистон Республикаси Олий ва ўрта махсус таълим вазирлигининг 2021 йил 08 январдаги 89-03-100-сон маълумотномаси). Мазкур ахборот-дидактик материаллар бўлажак муҳандисларнинг касбий компетенцияларини ривожлантириш ва касбий тайёргарлик даражаларини объектив баҳолашга хизмат қилади.