Ubaydullaev Sarvarbek Sheralievichning 
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): “G‘o‘zani har xil qator oraliqlarida parvarishlashning maqbul agrotexnologiyalarini takomillashtirish”, 06.01.01 – Umumiy dehqonchilik. Paxtachilik (qishloq xo‘jaligi fanlari).
Dissertatsiya mavzusi ro‘yxatga olingan raqam: B2017.2.PhD/Qx85.
Ilmiy rahbar: Xalikov Baxodir Meylikovich, qishloq xo‘jaligi fanlari doktori, professor.
Dissertatsiya bajarilgan muassasa nomi: Paxta seleksiyasi, urug‘chiligi va etishtirish agrotexnologiyalari ilmiy-tadqiqot instituti.
IK faoliyat ko‘rsatayotgan muassasa nomi, IK raqami: Andijon qishloq xo‘jaligi va agrotexnologiyalar instituti, PhD.05/30.10.2020.Qx.126.01.
Rasmiy opponentlar: Xoshimov Ibroxim Nabievich, qishloq xo‘jaligi fanlari doktori, katta ilmiy xodim; Negmatova Surayyo Teshaevna, qishloq xo‘jaligi fanlari doktori, katta ilmiy xodim.
Etakchi tashkilot: Toshkent davlat agrar universiteti.
Dissertatsiya yo‘nalishi: nazariy va amaliy ahamiyatga molik.
II. Tadqiqotning maqsadi Andijon viloyatining och tusli bo‘z tuproqlari sharoitida Andijon-36 g‘o‘za navini 60 sm, 90 (60x30), 80x40 va 80x60 sm qator oraliqlarida etishtirishda maqbul ko‘chat qalinligini, qator oralariga ishlov berishning maqbul soni va chuqurligini ma’dan o‘g‘itlar me’yoriga bog‘liq holda takomillashtirishdan iborat.
III. Tadqiqotning ilmiy yangiligi:
ilk bor och tusli bo‘z tuproqlar sharoitida g‘o‘za 80x40 sm, 80x60 sm qator oraliqlarida parvarishlanganda tuproqning agrofizikaviy va agrokimyoviy xossalariga o‘g‘itlar me’yorlarining ijobiy ta’siri aniqlangan;
N-150, P2O5-105, K2O-75; N-200, P2O5-140, K2O-100 va N-250, P2O5-175, K2O-125 kg/ga ma’dan o‘g‘it me’yorlarida 60, 90(60x30), 80x40 va 80x60 sm qator oraliqlarida chigitlarning unib chiqish dinamikasi hamda g‘o‘zaning o‘sishi va rivojlanishi yuqori bo‘lganligi isbotlangan;
g‘o‘zani gullashi, ko‘saklarni ochilishi hamda quruq massa to‘plashiga o‘g‘it me’yorlariga bog‘liq holda 80x40 sm qator oralig‘ida (40 sm), 80x60 sm qator oralig‘ida (60 sm) qo‘shqatorlar orasiga berilgan ishlovlarning ijobiy ta’siri isbotlangan;
g‘o‘za hosildorligi va tola sifatining yaxshilanishiga 80x40 sm qator oralig‘ida, N-200, P2O5-140, K2O-100 kg/ga o‘g‘it me’yorida qo‘shqator (40 sm ) orasiga shonalash davrida bir marta 5-7 sm chuqurlikda ishlov berishning ijobiy ta’siri aniqlangan.
IV. Tadqiqot natijalarining joriy qilinishi.
G‘o‘zani har xil qator oraliqlarida parvarishlash agrotexnologiyalarini takomillashtirish bo‘yicha olib borilgan tadqiqot natijalari asosida:
paxtachilikka ixtisoslashgan fermer xo‘jaliklari uchun “Turli qator oraliqlarida g‘o‘za parvarishlash agrotexnologiyasi bo‘yicha tavsiyalar” tasdiqlangan (Qishloq xo‘jaligi vazirligining 2019 yil 4 oktyabrdagi 02/020-2802-son ma’lumotnomasi). Ushbu tavsiyanoma bugungi kunda fermer xo‘jaliklari va paxtachilik klasterlari uchun g‘o‘za qator oralariga sifatli ishlov berishda qo‘llanma sifatida xizmat qilmoqda. 
Andijon viloyatining och tusli bo‘z tuproqlari sharoitida 80x40 sm qo‘shqator sxemada ekilgan Andijon-36 g‘o‘za navi ma’dan o‘g‘itlar, sof holda azot-200 kg/ga, fosfor-140 kg/ga, kaliy-100 kg/ga oziqlantirib, ko‘chat qalinligi 120-140 ming dona/gani tashkil qilgan maydonlarda g‘o‘zani shonalash davrida suv yurmaydigan (40 sm) qator orasiga 5-7 sm chuqurlikda bir marta naral`nik bilan ishlov berish agrotexnologiyasi Qo‘rg‘ontepa, Jalaquduq, Izboskan tumanlarida jami 239 gektar maydonga joriy etilgan (Qishloq xo‘jaligi vazirligining 2019 yil 4 oktyabrdagi 02/020-2802-son ma’lumotnomasi). Natijada, har gektar maydondan 39,8-40,5 sentner paxta hosili olinib, boshqa qator oraliqlarida parvarishlangan g‘o‘za maydonlariga nisbatan 3-4 s/ga qo‘shimcha hosil olishga erishilib, rentabellik darajasi 23,5% ni tashkil etgan.