Кенжаев Миржалол Эркинжановичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Ангрен каолинини нитрат кислотаси билан парчалаб алюминий оксиди олиш технологиясини яратиш», 02.00.13 – Ноорганик моддалар ва улар асосидаги материаллар технологияси (техника фанлари).
Диссертация мавзуси рўйхатга олинган рақам: B2018.4.PhD/Т862. 
Илмий раҳбар: Мирзакулов Холтура Чориевич, техника фанлари доктори, профессор.
Диссертация бажарилган муассаса номи: Тошкент кимё-технология институти.
ИК фаолият кўрсатаётган муассаса номи, ИК рақами: Қорақалпоқ давлат университети, PhD.03/30.12.2019.Т.20.03.
Расмий оппонентлар: Сейтназаров Атаназар Рейпназарович, техника фанлари доктори; Джуманиязова Дилноза Максудовна, техника фанлари бўйича фалсафа доктори (PhD).
Етакчи ташкилот: Наманган муҳандислик-технология институти.
Диссертация йўналиши: назарий ва амалий аҳамиятга молик.
II. Тадқиқотнинг мақсади: Ангрен кони юқори кремнийли каолин гилларини алюминий нитрат, оксид ва суюқ азотли ўғитларга нитрат кислотали қайта ишлашнинг комплекс, мослашувчан технологиясини ишлаб чиқишдан иборат.
III. Тадқиқотнинг илмий янгилиги:
алюминий бирикмаларининг минерал кислоталарда эрувчан шаклини ҳосил бўлишига ва натижада эритмага алюминий ажралиш даражасининг ошишига олиб келадиган Ангрен кони каолини гилларини куйдириш жараёнининг каолинни структуравий ўзгаришига таъсири қонуниятлари аниқланган;
нитрат кислота эритмаларида алюминийни ажратиб олиш даражасига технологик параметрларнинг таъсири тадқиқ этилган, алюминий ажралишининг максимал даражага етиши таъминлайдиган мақбул шароитлар аниқланган;
газсимон аммиак иштирокида каолиндан ажратиб олинган нитрат кислотали эритмаларни аммонизациялаш даражасининг таъсири аниқланган, алюминийнинг максимал ва темирнинг эса минимал чўкиш даражасини таъминлайдиган шароитлар ўрнатилган, алюминий гидроксид олиш технологик режимининг мақбул меъёрлари аниқланган;
Ангрен кони каолини гилларини алюминий нитрат, гидроксид ва суюқ азотли ўғитлар олиш билан қайта ишлаш технологияси ишлаб чиқилган.
IV. Тадқиқот натижаларининг жорий қилиниши. 
Ангрен кони каолин гилларини алюминий нитрат, оксид, суюқ азотли ўғитларга қайта ишлаш технологиясини ишлаб чиқиш бўйича олинган илмий маълумотлар асосида:
Ангрен кони каолини гилларини нитрат кислотаси иштирокида қайта ишлаб алюминий нитрат ва суюқ азотли ўғитлар олиш технологияси «O’zkimyosanoat» АЖнинг «2020-2025 йилларда амалиётга жорий этиш бўйича истиқболли ишланмалар рўйхати»га киритилган («O’zkimyosanoat» АЖнинг 2020 йил 15 декабрдаги 14-4922-сон маълумотномаси). Натижада, алюминий тутган каолиннинг нитрат кислотали экстрактидан алюминий нитрат ва суюқ азотли ўғитлар олиш имконини берган; 
Ангрен кони каолини гилларидан алюминий гидроксиди ва оксидини олиш технологияси «O’zkimyosanoat» АЖнинг «2020-2025 йилларда амалиётга жорий этиш бўйича истиқболли ишланмалар рўйхати»га киритилган («O’zkimyosanoat» АЖнинг 2020 йил 15 декабрдаги 14-4922-сон маълумотномаси). Натижада, Ангрен кони куйдирилган каолинларидан олинган алюминий оксиди ва гидроксидини хомашё ва тайёр маҳсулот сифатида қўллаш имконини берган.