Қосимов Каримжоннинг
фан доктори (DSс) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Қишлоқ хўжалик техникалари деталлари ресурсини оширишнинг технология ва воситаларини такомиллаштириш”, 05.07.02–Қишлоқ хўжалиги ва мелиорация техникаларини ишлатиш, тиклаш ва таъмирлаш (техника фанлари).
Диссертация мавзуси рўйхатга олинган рақам: В2020.4.DSc/Т314.
Илмий маслаҳатчи:Худойбердиев Толибжон Солиевич, техника фанлари доктори, профессор.
Диссертация бажарилган муассаса номи: Андижон машинасозлик институти.
ИК фаолият кўрсатаётган муассаса номи, ИК рақами: Тошкент ирригация ва қишлоқ хўжалигини механизациялаш муҳандислари институти, DSс.03/30.12.2019.Т.10.01.
Расмий оппонентлар: Нуриев Карим Катибович, техника фанлари доктори, профессор; Абралов Маҳмуд Абралович, техника фанлари доктори, профессор; Рустамов Раҳматали Муродович, техника фанлари доктори, доцент. 
Етакчи ташкилот: Тошкент давлат транспорт университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади қишлоқ хўжалиги техникалари ейилган деталларининг ишчи юзаларига кукунсимон композицион материалларни контакт пайвандлаб қоплаб, уларнинг ресурсини оширишнинг технология ва воситаларини такомиллаштиришдан иборат. 
III. Тадқиқотнинг илмий янгилиги: 
ейилган деталларнинг ишчи юзаларига кукунсимон композицион материаллар асосида контакт пайвандлаб қоплаш технологияси ишлаб чиқилган;
ейилган деталларнинг ишчи юзаларини пайвандлаб қоплаш учун кукунсимон композицион материал таркиби пайванд қатлам қалинлигини бошқаришни ҳисобга олган ҳолда асосланган;
қишлоқ хўжалиги техникаларининг айланувчи деталлари юзасини қаттиқ қотишмали кукунсимон композицион материаллар асосида пайвандлаб тиклаш усули ишлаб чиқилган;
деталлари юзасини контакт пайвандлаб тиклашда ролик-электрод ишчи юзасининг эни шакллантирилган кукунсимон композицион материалдан олинган лентанинг кенглигига боғлиқ ҳолда аниқланган;
қишлоқ хўжалиги техникалари деталларининг ресурсини орттирувчи кукунсимон композицион материаллардан олинган пайванд қатламнинг гетероген структураси асосланган;
қишлоқ хўжалиги техникалари ейилган деталлари ресурсини машинанинг таъмирлашлараро ресурсига боғлиқ ҳолда ортишини аниқлаш услуби ишлаб чиқилган.
IV. Тадқиқот натижаларининг жорий қилиниши.
Қишлоқ хўжалиги техникалари деталлари ресурсини ошириш бўйича олинган натижалар асосида: 
кукунсимон композицион материалларни ейилган деталларнинг ишчи юзаларига контакт пайвандлаб қоплаш технологияси Андижон вилоятининг Андижон туман МТП ва “Оқ-ёр XXΙ” МЧЖда жорий этилган (Қишлоқ хўжалиги вазирлигининг 2020 йил 10февралдаги 02/023-433-сон маълумотномаси). Натижада, қишлоқ хўжалиги техникаларини таъмирлашда, уларнинг тез ейилиб ишдан чиққан деталларини тиклаш ва ресурсини ошириш имконияти яратилган;
қишлоқ хўжалик техникаларининг ейилган деталларини контакт пайвандлаб тиклаш технологияси Андижон вилоятининг Пахтаобод ва Избоскан туманлари МТПларида жорий этилган (Қишлоқ хўжалиги вазирлигининг 2020 йил 10февралдаги 02/023-433-сон маълумотномаси). Натижада, тикланган деталларнинг таннархини янги эҳтиёт қисмга нисбатан 20-60 фоизга камайтириш, тикланган деталларнинг ресурсини 2-3 марта орттириш имконияти яратилган;
шакллантирилган кукунсимон композицион материалларни контакт пайвандлаб қоплаш усулига ихтирога муаллифлик гувоҳномаси олинган («Кукунсимон материалларни электр-контакт пайвандлаб қоплаш усули»,М.Г. №1459859–1988 й.). Натижада, бу валсимон ейилган деталларнинг ишчи юзаларини шакллантирилган кукунсимон композицион материаллар билан контакт пайвандлаб тиклаш технологиясини яратиш имконини берган; 
пайвандлаб қоплаш материалининг таркибига ихтирога муаллифлик гувохномаси олинган («Пайвандлаб қоплаш материалининг таркиби»,М.Г. №1584276–1990 й.). Натижада, бу ишқаланиш жуфтидаги пайвандлаб қопланган деталнинг ресурсини 6 мартагача орттириш, пайвандлаб қоплаш материалининг сарфини 3-4 мартагача камайтириш имконини берган; 
ейилган деталларнинг ишчи юзаларига кукунсимон композицион материалларни контакт пайвандлаб қоплаш технологияси “BMKB-Agromash” АЖда жорий этилган (Қишлоқ хўжалиги вазирлигининг 2020 йил 10февралдаги 02/023-433-сон маълумотномаси). Натижада, қишлоқ хўжалик техникалари конструкциясини яратишда ишқаланиш шароитида ишлайдиган деталларини ресурси оширилган ҳолда лойиҳалаш ва ишлаб чиқариш имконияти яратилган.