Sayt test rejimida ishlamoqda

Исматова Раъно Ахадовнанинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Сувда эрувчан табиий ва синтетик полимерлар асосида композициялар олиш ва амалиётда қўллаш», 02.00.14–Органик моддалар ва улар асосидаги материаллар технологияси (техника фанлари).
Диссертация мавзуси рўйхатга олинган рақам: B2020.2.PhD/Т1524. 
Илмий раҳбар: Амонов Мухтар Рахматович, техника фанлари доктори, профессор.
Диссертация бажарилган муассаса номи: Бухоро давлат университети. 
ИК фаолият кўрсатаётган муассаса (муассасалар) номи, ИК рақами: Термиз давлат университети, PhD.03/30.12.2019.Т.78.01.
Расмий оппонентлар: Муҳиддинов Баҳодир Фахриддинович, кимё фанлари доктори, профессор; Тожиев Панжи Жовлиевич, техника фанлари бўйича фалсафа доктори (PhD). 
Етакчи ташкилот: Наманган муҳандислик-технология институти.
Диссертация йўналиши: назарий ва амалий аҳамиятга молик. 
II. Тадқиқотнинг мақсади: сувда эрувчан полимерлар асосида композицияларни олиш технологияларини яратиш ва мавжуд технологияларни такомиллаштириш, шунингдек охорлаш босқичида улар қўлланилишининг самарали усулларини ишлаб чиқишдан иборат.
III. Тадқиқотнинг илмий янгилиги:
илк бор пахта толали калава ипларни охорлаш учун табиий ва синтетик полимерлар – крахмал (4,0; 4,5; 5,0; 5,5%), ПВС (0,1-0,5%) ва ГИПАН (0,1–0,3%) асосида сувда эрувчан полимер таркиблар ишлаб чиқилган;
ишлаб чиқилган охорловчи полимер таркиблардаги компонентларнинг функционал гуруҳлари билан целлюлозанинг ўзаро таъсирлашиш механизми ва унга турли омилларнинг таъсири аниқланган;
охор таркибидаги ПВС охор плёнкасининг эрувчанлик ва сорбцион хоссаларини яхшилаши, ГИПАН эса системанинг қовушқоқлиги ва толага охор адгезиясининг ошириши натижасида калава ипнинг мустаҳкамлиги 30–35% га ортиши ҳамда калава ипларнинг тўқиш дастгохларида узилиши 60–70% га камайиши аниқланган;
ПВС ва ГИПАНнинг озроқ миқдори киритилганда крахмал гелларининг устмолекуляр структураси бузилиши натижасида крахмалли охорловчи композицияларнинг қатламларга ажралишининг камайиши ва технологик қўллаш хусусиятларининг ортиши аниқланган;
ишлаб чиқилган охорловчи полимер таркибларнинг анъанавий охорловчиларга нисбатан кинетик ва агрегатив барқарорлиги юқорилиги ҳамда охорлаш жараёнида крахмал сарфининг 25–30% га камайиши аниқланган;
охорловчи полимер таркибларни қўллашнинг иқтисодий ва экологик самарадорлиги аниқланган ҳамда калава ипларни охорлашда қўллаш технологияси ишлаб чиқилган. 
IV. Тадқиқот натижаларининг жорий қилиниши.
Берилган структура ва физик-кимёвий хоссаларга эга бўлган сувда эрувчан полимер композицияларни яратиш бўйича олинган илмий натижалар асосида: 
табиий ва синтетик полимерлар асосида охорловчи композицияларни олиш ва пахта ипларни охорлаш технологияси “Нақш Ойдин” МЧЖ ва “Севинч текс сервис” МЧЖ корхоналарида амалиётга жорий этилган (Ўзбекистон Республикаси «Ўзтўқимачиликсаноат» уюшмасининг 2020 йил 21 майдаги 04/18-1377-сон маълумотномаси). Натижада, таркибида ПВС ва ГИПАН сақлаган янги охорловчи таркибларнинг охорланган асоснинг сифатини ошириш ҳамда қимматли озиқ-овқат маҳсулоти бўлган крахмал сарфини 25–30% га (56 г/л дан 38 г/л га) камайтириш имконини берган; 
таркибига ПВС ва ГИПАНни киритиш йўли билан ишлаб чиқилган крахмал сақлаган сувда эрувчан полимер таркиблар “Нақш Ойдин” МЧЖ ва “Севинч текс сервис” МЧЖ корхоналарининг тайёрлаш ва тўқиш цехларида амалиётга жорий этилган (Ўзбекистон Республикаси «Ўзтўқимачиликсаноат» уюшмасининг 2020 йил 21 майдаги 04/18-1377-сон маълумотномаси). Натижада, крахмал плёнкаларига нисбатан композицион плёнкаларнинг деформацион хоссаларини яхшилаш, силлиқлигини ошириш ва калава ипларнинг узилишини 0,53 узил/м дан 0,21 узил/м гача камайтириш имконини берган.

 

Yangiliklarga obuna bo‘lish