Titova Janna Olegovnaning

doktorlik dissertatsiyasi himoyasi haqida e’lon

    I. Umumiy ma’lumotlar.

Dissertatsiya mavzusi, ixtisoslik shifri (ilmiy daraja beriladigan fan tarmog‘i): «Nasos stansiyalarining holatlarini rostlash algoritmlari va usullari», 05.05.01–Energetika tizimlari va majmualari (texnika fanlari).

Talabgorning ilmiy va ilmiy-pedagogik faoliyat olib borishga layoqati bo‘yicha test sinovidan o‘tgani haqida ma’lumot: 2013 yil 11 oktyabrdagi LA0000618-son guvohnoma, qayd raqami №746.

Dissertatsiya mavzusi ro‘yxatga olingan raqam: 30.09.2014/B2014.3-4.T174.

Dissertatsiya bajarilgan muassasa nomi: Toshkent davlat texnika universiteti.

IK faoliyat ko‘rsatayotgan muassasa (muassasalar) nomi, IK raqami: Toshkent davlat texnika universiteti va «Ilmiy-texnika markazi» MChJ, 14.07.2016.T.02.01.

Ilmiy maslahatchi: Allaev Kaxramon Raximovich, texnika fanlari doktori, professor.

Rasmiy opponentlar: Tyagunov Mixail Georgievich, texnika fanlari doktori, professor (Rossiya Federatsiyasi); Xashimov Arifjan Adilovich, texnika fanlari doktori, professor; Kamalov Tolyagan Sirojiddinovich, texnika fanlari doktori, professor.

Yetakchi tashkilot:«Gidroloyiha» aksiyadorlik jamiyati.

Dissertatsiya yo‘nalishi: nazariy va amaliy ahamiyatga molik.

    II. Tadqiqotning maqsadi: nasos va gidroelektrik stansiyalarning asosiy va yordamchi energetik jihoz va quvurlaridagi behosdan o‘tish jarayonlari hamda beqaror rejimlariga salbiy ta’siri va oqibatlarini pasaytiruvchi algoritm, usul, uslub va qurilmalarini yaratishdan iborat.

    III. Tadqiqotning ilmiy yangiligi:

nasos stansiyalarining energetik jihozlaridan foydalanish muddatini hisobga olgan holda elektromexanik va gidromexanik o‘tish jarayonlarini bosqichma-bosqich echish algoritmi ishlab chiqilgan;

nasos stansiyalarining beqaror rejimlaridagi energiya tizimlarining o‘tish jarayonlarini tadqiq qilish imkoniyatini beruvchi «quvur-nasos-elektrdvigatel`-elektr tarmoq» tizimi elementlarini hisoblashning umum-lashtirilgan matematik modeli va dasturiy majmualari ishlab chiqilgan;

nasos stansiyalarining energetik jihozlari va quvurlarini gidravlik zarbadan himoyalash uchun qayta ishga tushirish qurilmasini qo‘llashning yangi usulari ishlab chiqilgan;

nasos stansiyalarining energetik jihozlari ishonchliligini oshirish  uchun nasosning diskli zanjirini proporsional boshqarish qurilmasi ishlab chiqilgan;

rostlash tizimli purkovchi nasos yordamida turli xil balandlikdagi  drenaj va oqova suvlarni bir vaqtda chiqarish uslubi ishlab chiqilgan;

binodan fil`tratsiyali, drenaj va yomg‘ir suvlari hamda nasos stansiyasi hududiga tutashgan qismdagi suvlarni purkovchi nasos yordamida bir vaqtda olib tashlashning rostlash tizimi yaratilgan.

    IV. Tadqiqot natijalarining joriy qilinishi:

Nasos stansiyalari ish rejimlarining algoritmi va usullarini yaratish bo‘yicha olingan natijalar asosida: 

nasos stansiyalari va nasoslarni beqaror ish rejimlarini rostlashning energiyatejamkor vosita va usullari, nasos stansiyalari quvurlariga gidravlik zarbani kamaytirishning samarali tizimlari qishloq va suv xo‘jaligi tizimidagi qator, jumladan Qarshi magistral kanali foydalanish boshqarmasining 1−4 KMK, «Mirzacho‘l» nasos stansiyalarini ekspluatatsiya qilishda viloyatlararo boshqarmasining DNS-1, DNS-2, DNS-3 va «Xovost-G‘allakor» nasos stansiyalarida joriy qilingan (Qishloq va suv xo‘jaligi vazirligining 2016 yil 28 iyundagi 04/31-700-son  ma’lumot-nomasi). Ilmiy natijalarni qo‘llanilishida nasos stansiyalari shaxsiy ehtiyojlariga elektr energiya sarfini o‘rtacha 4% ga kamaytirish imkoniyatini berdi;

binodan fil`tratsiyali, drenaj va oqova suvlari hamda nasos stansiyasi hududiga tutashgan qismdagi suvlarni purkovchi nasos yordamida bir vaqtda chiqarib tashlash uchun rostlash tizimlari qishloq va suv xo‘jaligi tizimidagi qator, jumladan Namangan nasos stansiyasi, energetika va aloqa boshqarmasining «Turkiston 1-1» va «Turkiston 1-2», Qashqadaryo nasos stansiyalari, energetika va aloqa boshqarmasining «Paxtakor», «Guvalak», Jizzax nasos stansiyalari energetika va aloqa boshqarmasining “Qorayantoq” va “DM-1”, Qarshi kichik nasos stansiyalarini ekspluatatsiya qilish boshqarmasining “M-2-2” nasos stansiyalarida joriy qilingan (Qishloq va suv xo‘jaligi vazirligining 2016 yil 28 iyundagi 04/31-700-son ma’lumotnomasi). Ilmiy natijalarni qo‘llanilishida 1 yil muddat ichida sarflarni qoplaydigan, shuningdek sarflarni qoplash normatividan 6,5 barobar energiya samarador purkovchi nasoslarni ishlab chiqish imkoniyatini bergan;

nasos stansiyalarining energetik jihozlaridan foydalanish muddatining davomiyligini hisobga olgan holda elektromexanik va gidromexanik o‘tish jarayonlarining bosqichma-bosqich echish algoritmi, bosim hosil bo‘ladigan nasos stansiya quvurlaridagi gidravlik zarbalarni aniqlash va hisoblash dasturlari, «quvur-nasos-elektrdvigatel`-elektr tarmoq» tizim elementlarining o‘zaro bog‘liqlik umumlashtirilgan matematik modeli OT-F5-036 «Energetikada elektromexanik va gidromexanik o‘tish jarayonlarning o‘zaro bog‘liqliklarini formallashtirish» grant loyihasida (2007–2011) o‘tish jarayonlaridagi energetik parametrlarni aniqlash uchun foydalanilgan (Fan va texnologiyalarni rivojlantirishni muvofiqlashtirish qo‘mitasining 2016 yil 20 oktyabrdagi FTK-03-13/700-son ma’lumotnomasi). Tadqiqot ilmiy-tadqiqot natijalarining qo‘llanilishi nasos stansiyalarining asosiy va yordamchi energetik jihozlari va quvurlaridagi behosdan o‘tish jarayoniga tushish va beqaror rejimlardagi salbiy ta’sirlarni kamaytirish imkoniyatini bergan. Gidravlik zarb 40% ga, bosim tushishining davomiyligi 1,5 martaga kamaygan.