Сотволдиев Акмалжон Иброхимовичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Бошқарувлар аралаш чегараланишларга эга ҳолда чизиқли ва ночизиқли динамик системалар учун бошқарув ва қувиш масалалари”, 01.01.02 – Дифференциал тенгламалар ва математик физика (физика-математика фанлари).
Диссертация мавзуси рўйхатга олинган рақам: В2020.2.PhD/FM10.
Илмий раҳбар: Саматов Бахром Таджиахматович, физика-математика фанлари доктори, доцент.
Диссертация бажарилган муассаса номи: ЎзР ФА Математика институти.
ИК фаолият кўрсатаётган муассаса номи, ИК рақами: Фарғона давлат университети, PhD.03/30.12.2019.FM.05.04.
Расмий оппонентлар: Тўхтасинов Муминжон, физика-математика фанлари доктори, профессор; Каримов Камолиддин Тўйчибоевич, физика-математика фанлари номзоди, доцент.
Етакчи ташкилот: Самарқанд давлат университети.
Диссертация йўналиши: назарий аҳамиятга молик.
II. Тадқиқотнинг мақсади: бошқарувларга мос равишда интеграл ва йиғинди чекловлар қўйилган чизиқли дифференциал ва дискрет системаларда бошқарувчанлик ва қувиш масалалари ўртасида боғлиқлик ўрнатиш, ҳамда ночизиқли дифференциал қувиш ўйинларини параллел яқинлашиш методи орқали ечишдан иборат.
III. Тадқиқотнинг илмий янгилиги:
бошқарувига интеграл чеклов қўйилган чизиқли дифференциал системаларда, шунингдек, йиғинди чеклов қўйилган дискрет системаларда бошқарувчанлик масалаларини ечиш усуллари ишлаб чиқилган;
бошқарувига йиғинди чеклов қўйилган чизиқли дискрет системаларда 0-бошқарувчанлик масаласини ечиш учун зарур ва етарли шартлар олинган;
йиғинди чекловлар билан зиддиятли ҳолатларда чизиқли дискрет системалар учун бошқарувчанлик масаласи ўрганилган ва ўйинни тугатиш учун етарли шартлар олинган;
ўйинчиларнинг бошқарувига координатали интеграл чекловлар қўйилган жамоавий қувиш масаласида ўйинни тугатиш учун етарли шартлар олинган;
ночизиқли дифференциал ўйиннинг бир синфи учун параллел қувиш стратегияси қурилган;
ночизиқли дифференциал қувиш ўйинини ечиш учун оддий ҳаракатли ўйинда параллел яқинлашишнинг классик усулини умумлаштирувчи самарали усул таклиф қилинган.
IV. Тадқиқот натижаларининг жорий қилиниши. Бошқарувлар аралаш чегараланишларга эга ҳолда чизиқли ва ночизиқли динамик системалар учун бошқарув ва қувиш масалаларига оид илмий натижалар асосида:
бошқарувига интеграл чеклови қўйилган чизиқли дифференциал системаларнинг ечимлари, бу системаларда ифодаланган қувиш масаласининг глобал ечими ва 0-бошқарувчанлик орасидаги боғлиқлиқдан 01-01-16-1840FR рақамли фундаментал тадқиқот лойиҳасида Гильберт фазосида ўйинчиларнинг бошқарув параметрларига интеграл чекловлар қўйилганда кўп қувловчили қувиш масаласини ечишда, ҳамда қувиш-қочиш масаласи ўйинида иккита қувловчи ва битта қочувчи бўлган ҳолда ўйинчиларнинг бошқарувига координатали интеграл чеклов қўйилган холда ечишда қўлланилган (Путра Малайзия университетининг 2020 йил 4 февралдаги PM.02.04/1/3-сон маълумотномаси). Илмий натижаларнинг қўлланилиши чизиқли ва ночизиқли бошқарилувчи дифференциал ўйинларни ечишнинг янги усулларини яратиш имконини берган;
бошқарувига йиғинди чеклови қўйилган чизиқли дискрет системаларнинг ечимларидан математика ва компьютер моделлаштириш лабораторияси АААА-Б19-219021990010-4 рақамли “EYETRACKING технологияси асосида тасвирни қайта ишлаш” илмий-тадқиқот лойиҳасида қўлланилган (Витус Беринг номидаги Камчатка давлат университетининг 2020 йил 26 февралдаги 111-01-сон маълумотномаси). Илмий натижаларнинг қўлланилиши чизиқли дискрет системаларни ечиш усуллари ёрдамида тасвирни қайта ишлаш ва сифатини ошириш имконини берган.