Отемуратов Байрамбай Пердебаевичнинг
фан доктори (DSc) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Кўп ўлчамли комплекс анализда бир ўлчамли голоморф давом эттириш хоссасига эга функциялар ва чегаравий Морера теоремаси», 01.01.01 – Математик анализ (физика-математика фанлари).
Диссертация мавзуси рўйхатга олинган рақам: В2020.2.DSc/FM152.
Диссертация бажарилган муассаса номи: Қорақалпоқ давлат университети.
ИК фаолият кўрсатаётган муассаса номи, ИК рақами: Ўзбекистон Миллий университети, DSc.03/30.12.2019.FM.01.01.
Илмий маслаҳатчи: Китманов Александр Мечиславович, физика-математика фанлари доктори, профессор.
Расмий оппонентлар: Рахимов Абдуғофур Абдумажидович, физика-математика фанлари доктори, профессор; Имомкулов Севдиёр Акрамович, физика-математика фанлари доктори; Джумабаев Давлатбой Халилаевич физика-математика фанлари доктори.
Етакчи ташкилот: Қарши давлат университети.
Диссертация йўналиши: назарий аҳамиятга молик.
II. Тадқиқотнинг мақсади интегралланувчи функциялар учун кўп ўлчамли Мореранинг чегаравий теоремаларини олиш ва бир ўлчамли голоморф давом эттириш хоссасига эга интегралланувчи функциялар учун олинган натижаларни фукцияларни голоморф давом эттириш масалаларига қўллашдан иборат.
III. Тадқиқотнинг илмий янгилиги:
бир ўлчамли голоморф давом эттириш хоссасига эга интегралланувчи функциялар синфи учун Стаут теоремаси умумлаштирилган; 
берилган очиқ тўпламдан ўтувчи комплекс тўғри чизиқлар бўйлаб бир ўлчамли голоморф давом эттириш хоссасига эга `интегралланувчи функциялар учун Аграновский ва Семенов теоремасининг умумлашмаси олинган;
ҳосил қилувчи кўпҳиллик ўсмасидан ўтувчи комплекс тўғри чизиқлар оиласи бўйлаб бир ўлчамли голоморф давом эттириш хоссасига эга интегралланувчи функциялар, Харди синфидаги функциягача голоморф давом эттирилиши исботланган;
берилган очиқ тўпламдан ўтувчи комплекс тўғри чизиқлар бўйлаб интегралланувчи функциялар учун Морера теоремаси исботланган;
комплекс эгри чизиқлар бўйлаб интегралланувчи функциялар учун Морера теоремасининг кўп ўлчамли аналоги олинган;
классик соҳаларда интегралланувчи функциялар учун чегаравий Морера теоремасининг кўп ўлчамли аналоглари исботланган.
Тадқиқот натижаларининг жорий қилиниши. Кўп ўлчамли комплекс анализда бир ўлчамли голоморф давом эттириш хоссасига эга функциялар ва чегаравий Морера теоремаси тадқиқоти жараёнида олинган илмий натижалар асосида:
Гартогс-Бохнернинг классик теоремасини умумлаштирувчи бир ўлчамли голоморф давом эттириш хоссасига эга интегралланувчи функцияларни соҳа чегарасидан голоморф давом эттириш шартлари РФФИнинг «Кўп ўлчамли комплекс анализ» мавзусидаги 18-51-41011 рақамли гранти доирасидаги узлуксиз функциялар учун олинган натижаларни кенгайтиришда қўлланилган (Сибир федерал университетининг 2020 йил 25 майдаги 178-сон маълумотномаси, Россия). Илмий натижанинг қўлланилиши Бохнер-Мартинелли интеграли билан ифодаланувчи функцияларни голоморф давом эттириш ҳақидаги теоремаларни умумлаштириш имконини берган; 
соҳа чегарасида интегралланувчи функцияларни голоморф давом эттириш «Ноалгебраик тенгламалар системалари, илдизларнинг даражали йиғиндилари ва компьютер алгебраси» мавзусидаги 15-01-00277 рақамли грантда соҳа чегарасидаги мураккаброқ махсус ҳолатлар ҳақидаги масалаларни ечишда қўлланилган (Сибир федерал университетининг 2020 йил 25 майдаги 176-сон маълумотномаси, Россия). Соҳа чегарасида интегралланувчи функцияларни голоморф давом эттириш ноалгебраик тенгламалар системаси нолларининг даражалар йиғиндисини қуриш имкониятини берган;
чегаравий Морера теоремалари «Кўп ўлчамли интеграл алмаштиришлар ва уларнинг  комплекс аналитик геометрия ва дифференциал ва айирмалар тенгламалари назариясига қўлланилиши» мавзусидаги 14-01-00544 рақамли грантда чегарада берилган функциялар учун Бохнер-Мартинелли интеграли хоссаларини ўрганишда қўлланилган (Сибир федерал университетининг 2020 йил 25 майдаги 177-сон маълумотномаси, Россия). Натижада чегаравий Морера теоремаси ва соҳа чегарасида интегралланувчи функцияларни голоморф давом эттириш  гиперсиртлардаги интеграл операторлар алгебрасини таснифлаш имконини берган.