Рўзматов Иззатбек Бахтиёровичнинг
фалсафа доктори (PhD) диссертацияси ҳимояси ҳақида эълон
I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Чақалоқларда омфалоцелени ташхислаш ва жарроҳлик даволаш усулини такомиллаштириш», 14.00.35–Болалар хирургияси (тиббиёт фанлари).
Диссертация мавзуси рўйхатга олинган рақам: B2017.3.PhD/Tib381.
Илмий раҳбар: Эргашев Бахтиёр Бердалиевич,тиббиёт фанлари доктори.
Диссертация бажарилган муассаса номи: Тошкент педиатрия тиббиёт институти.
ИК фаолият кўрсатаётган муассасалар номи, ИК рақами: Академик В.Воҳидов номидаги Республика ихтисослаштирилган хирургия илмий-амалий тиббиёт маркази ва Тошкент тиббиёт академияси, DSc.27.06.2017.Tib.49.01.
Расмий оппонентлар: Эргашев Насриддин Шамсиддинович, тиббиёт фанлари доктори, профессор; Шамсиев Азамат Мухиддинович, тиббиёт фанлари доктори, профессор.
Етакчи ташкилот: Абу Али Ибн Сино номидаги Тожикистон давлат тиббиёт университети.
Диссертация йўналиши: амалий аҳамиятга молик.
II. Тадқиқотнинг мақсади:чақалоқларда омфалоцеле диагностикаси ва хирургик даво усулларини такомиллаштириш асосида даво натижаларини яхшилаш.
III. Тадқиқотнинг илмий янгилиги:
чақалоқларда қорин олд девори турли нуқсонларида вицеро-абдоминал диспропорцияни коррекция қилишнинг хирургик жиҳатларини оптималлаштирувчи катта ўлчамли омфалоцеленинг даволаш усули ишлаб чиқилган;
висцеро-абдоминал диспропорция даражаси, чурра ўлчамлари, соматоневрологик фон ва ёндош нуқсонлар оғирлигига боғлиқ равишда омфалоцеле кечишининг оғирлигини баҳолаш мезонлари аниқлаштирилган;
бошқа туғма аномалиялар орасида омфалоцеленинг қиёсий ўрни белгиланган ҳамда ёндош нуқсонлар ва қорин олд девори нуқсони ўлчамлари ўртасидаги боғлиқлик исботланган;
анте- ва постнатал тадқиқотлар асосида қорин олд девори ривожланиш нуқсонлари ва омфалоцелега энг кўп ёндошлик қилувчи бошқа туғма нуқсонлар билан болалар туғилишининг хавф омиллари аниқланган;
ҳомиладорликни сақлаб қолиш ёки тўхтатишга кўрсатмаларни аниқлаштиришга ёрдам берувчи омфалоцелега ёндош аномалиялар оғирлигини прогностик баҳолаш учун антенатал скринингнинг ультратовуш жиҳатлари очиб берилган.
IV. Тадқиқот натижаларининг жорий қилиниши.
Чақалоқларда омфалоцелени ташхислаш ва хирургик даволашни яхшилашга бағишланган тадқиқот бўйича олинган илмий натижалар асосида:
«Чақалоқларда катта ўлчамдаги омфалоцелени даволаш усули»га Интеллектуал мулк агентлигининг ихтирога патенти олинган (№IAP 05314, 2016 йил). Тавсия этилган усул катта ўлчамдаги омфалоцелени даволашнинг бевосита натижаларини яхшилаш ва амалиётдан кейинги асоратлар частотасини қисқартириш имконини берган;
«Чақалоқларда омфалоцелени ташхислаш ва даволаш усулини танлаш» услубий тавсияномаси тасдиқланган (Соғлиқни сақлаш вазирлигининг 2018 йил 20 июндаги 8н-д/151-сон маълумотномаси). Таклиф этилган тавсиялар омфалоцелени ташхислаш сифатини яхшилаш, қорин олд девори ривожланиши аномалияларини барвақт антенатал аниқлаш мезонларини оптималлаштириш имконини берган;
чақалоқларда омфалоцелени ташхислаш ва хирургик даволашни яхшилашга бағишланган тадқиқотнинг олинган илмий натижалари соғлиқни сақлаш амалий фаолиятига, хусусан, Республика перинатал марказининг Неонатал хирургия маркази, Тошкент шаҳри 1-сон болалар касалхонасининг болалар хирургияси бўлими амалий фаолиятига (Соғлиқни сақлаш вазирлигининг 2018 йил 20 июндаги 8н-д/151-сон маълумотномаси) татбиқ этилган. Олинган натижаларни соғлиқни сақлаш амалиётига татбиқ этиш омфалоцелени барвақт антенатал ташхислаш имкониятини ошириш, даволашнинг бевосита ва узоқ муддатдаги натижаларини яхшилаш, амалиётдан кейинги асоратлар частотасини 52,1% дан 30,9% гача ва ўлим кўрсаткичини 43,8% дан 20% гача камайтириш имконини берган.
