Эрназаров Дилмурод Зухриддиновичнинг

фалсафа доктори (PhD) диссертацияси ҳимояси ҳақида эълон

I. Умумий маълумотлар.

Диссертация мавзуси, ихтисослик шифри (илмий даража бериладиган фан тармоғи номи): «Ўзбекистонда давлат ижтимоий сиёсати самарадорлигини оширишда нодавлат нотижорат ташкилотларнинг роли», 23.00.02–Сиёсий институтлар, жараёнлар ва технологиялар (сиёсий фанлар).

Диссертация мавзуси рўйхатга олинган рақам: B2017.1.PhD/Siyos13.

Илмий раҳбар: Қўчқоров Ваҳоб Хошимович, сиёсий фанлар доктори, доцент.

Диссертация бажарилган муассаса номи: Ўзбекистон Республикаси Президенти ҳузуридаги Давлат бошқаруви академияси.

ИК фаолият кўрсатаётган муассаса номи, ИК рақами: Ўзбекистон Миллий университети, DSc29.08.2017.S.01.08.

Расмий оппонентлар: Жўраев Нарзулла Қосимович, сиёсий фанлар доктори, профессор; Рахманов Аъзамжон Режапович, юридик фанлар доктори, профессор.

Етакчи ташкилот: Тошкент кимё-технология институти.

Диссертация йўналиши: назарий ва амалий аҳамиятга молик.

II. Тадқиқотнинг мақсади: Ўзбекистон ижтимоий сиёсатининг трансформациясига нодавлат нотижорат ташкилотларининг таъсири ва фаолиятини функционал танқидий-таҳлилий жиҳатдан ўрганиш.

III.Тадқиқотнинг илмий янгилиги:

ижтимоий сиёсатда номарказлашув жараёнининг тезлашуви, вертикал ва горизонтал муносабатлар тизимидаги прогрессив ўзгаришлар фақат ахборотлашган жамият шароитида юз бериши исботланган;

аҳолига ижтимоий хизматлар кўрсатишда ижтимоий шерикликнинг трипартизм шаклидан келгусида “полипартизм” шаклига ўтилиши ҳамда консенсус манфаатлар мувозанатининг энг мақбул воситаси экани очиб берилган;

ННТнинг ижтимоий инновациялари давлат ижтимоий сиёсатида аҳолини ижтимоий ҳимоялашнинг пассив объектидан, прогрессив шахсга айлантириши асосланган;

ижтимоий муҳофазанинг янги тизимида ижтимоий хизматлар бозори сегментациясининг шаклланиши, ижтимоий сиёсатнинг либераллашуви, жамиятда ўта қашшоқликни тугатиш ва кам таъминланган аҳоли сонини кескин камайтириши каби ўзига хос хусусиятлари очиб берилган.

IV. Тадқиқот натижаларининг жорий қилиниши.

Ўзбекистонда давлат ижтимоий сиёсати самарадорлигини оширишда нодавлат нотижорат ташкилотларининг ролини ошириш юзасидан ишлаб чиқилган амалий таклиф ва тадқиқот натижалари асосида:

ННТнинг ижтимоий хизматлар соҳасидаги ижтимоий инновацияларни ишлаб чиқиш, уларнинг кўплаб ваколат, мажбуриятларга эга бўлиши ва давлат, бизнес вакиллари билан рақобат қила олиши ҳақидаги хулосаларидан Ўзбекистон Республикаси Олий Мажлиси Қонунчилик палатасининг Фан, таълим, маданият ва спорт масалалари қўмитаси депутатлари томонидан “Кексалар, ногиронлар ва аҳолининг бошқа ижтимоий ҳожатманд тоифаларига ижтимоий хизматлар тўғрисида”ги Ўзбекистон Республикаси Қонунининг ишлаб чиқилишида фойдаланилган (Ўзбекистон Республикаси Олий Мажлиси Қонунчилик Палатасининг 2016 йил 8 ноябрдаги 04/5-05 948-сон маълумотномаси). Натижада мазкур қонун лойиҳасида “ижтимоий хизматлар” тушунчасининг мазмун-моҳиятини очиб беришга хизмат қилган;

Ўзбекистон нодавлат нотижорат ташкилотлари миллий ассоциацияси томонидан ННТ фаолиятига волонтёрларни кенг жалб қилиш ва уларнинг меҳнатидан самарали фойдаланиш механизмларини ишлаб чиқиш; ННТнинг ОАВ вакиллари билан ҳамкорлигини янада кучайтириш; хусусий секторнинг “ижтимоий масъулиятини” янада ошириш юзасидан берилган амалий таклифлар инобатга олинди. (Ўзбекистон Республикаси Нотижорат ташкилотлари миллий ассоциациясининг 2017 йил 10 ноябрдаги 04-06/390-01-сон маълумотномаси). Натижада Ўзбекистонда “волонтёрлик” тушунчасини тарғиб қилиш, ёшларни волонтёрлик фаолиятига кенг жалб қилиш юзасидан амалий тавсиялар ишлаб чиқилган;

фуқароларнинг ўзини ўзи бошқариш органлари томонидан уюшмаган ёшлар билан ишлашни ташкил этиш, улар учун махсус мотивацияларни ишлаб чиқиш, уларни ижтимоий фойдали меҳнатга жалб қилиш орқали кўмакка муҳтож ёлғиз кексалар, пенсионер, ногиронлар, имконияти чекланган шахсларга ижтимоий хизматлар кўрсатиш ҳамда қўллаб-қувватлаш борасида илмий асосланган таклиф ва тавсиялардан Фуқароларнинг ўзини ўзи бошқариш органлари фаолиятини мувофиқлаштириш бўйича Республика Маркази томонидан фойдаланилган (Фуқароларнинг ўзини ўзи бошқариш ўрганлари фаолиятини мувофиқлаштириш бўйича Республика кенгашининг 2017 йил 12 декабрдаги 02-01/1082-сон маълумотномаси). Берилган таклифлар маҳаллаларда уюшмаган ёшлар билан ишлашнинг замонавий механизмлари, усулларини ишлаб чиқишга хизмат қилган.