Қосимов Аъзам Азимовичнинг
фалсафа доктори (PhD) диссертацияси ҳимояси ҳақида эълон
I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Болаларда билак суяклари қайта синиши (рефрактура) ва уларни даволаш хусусиятлари», 14.00.22–Травматология ва ортопедия (тиббиёт фанлари).
Диссертация мавзуси рўйхатга олинган рақам: B2017.4.PhD/Tib436.
Илмий раҳбар: Ходжанов Искандар Юнусович тиббиёт фанлари доктори, профессор.
Диссертация бажарилган муассаса номи: Республика ихтисослаштирилган травматология ва ортопедия илмий-амалий тиббиёт маркази.
ИК фаолият кўрсатаётган муассаса номи, ИК рақами: Республика ихтисослаштирилган травматология ва ортопедия илмий-амалий тиббиёт маркази, DSc 28.02.2018.Tib.62.01.
Расмий оппонентлар: Борзунов Дмитрий Юрьевич, тиббиёт фанлари доктори (Россия Федерацияси); Дурсунов Ахмад Маликшаевич, тиббиёт фанлари доктори.
Етакчи ташкилот: Тошкент педиатрия тиббиёт институти.
Диссертация йўналиши: амалий аҳамиятга молик.
II. Тадқиқотнинг мақсади: болаларда билак суяклари қайта синишларининг клиник-морфологик ўзгаришлари ва регенерация жараёнлари хусусиятларини таҳлил қилиш асосида даволаш натижаларини яхшилашдан иборат.
III. Тадқиқотнинг илмий янгилиги:
болаларда БСҚСлари клиник кўриниши қадоқ ҳосил бўлиш жараёнларига боғлиқ бўлиб, бунда остеорепарациянинг эрта босқичларида қадоқлардан қон қуйилишининг сезиларли кечиши ва қон элементлари тўқималарнинг битиш жараёнларида катализатор ролини бажариши, қадоқларнинг сўрилиш даврида эса қон қуйилишининг сустроқ кечиши ва остеорепарация жараёнларига таъсир кўрсатмаслиги исботланган;
экспериментал қуёнлар БСҚСларида БСларга нисбатан регенерациянинг эрта босқичлари қисқа кечиши, кейинги босқичларининг эса узайиши ва қадоқлар ҳосил бўлиши эндостал қатламининг ҳисобига содир бўлиши исботланган;
болалар БСҚСда клиник ва рентгенологик белгиларга ва суяклар фиксациясининг босқичма-босқич ечилишига асосланган даволаш тактикаси регенерация жараёнининг ўз вақтида кечишини таъминлаши исботланган;
болаларда БСҚСни сихли интрамедуляр + Илизаров аппарати қўлланилган комбинацион остеосинтез орқали суяк бўлаклари охирларини бир-бирига яқинлаштириш ва мустаҳкам ушлаб туриш натижасида синган соҳани равон битишини таъминланиши исботланган;
болаларда БСҚСда рефрактура локализацияси ва даволаш усулининг тури инобатга олинган ҳолда регенерация мустаҳкамлигини ошириш имконини берувчи иммобилизация муддатлари белгиланган;
болаларда БСҚСни даволаш тактикасини белгилаш имконини берувчи клиник ва рентгенологик белгиларга асосланган рефрактуранинг илк таърифи аниқланган.
IV. Тадқиқот натижаларининг жорий қилиниши.
Болаларда БСҚСларини ташхислаш ва даволаш бўйича ўтказилган тадқиқот натижалари асосида:
«Болалар суяклари рефрактураси (клиника, ташхислаш ва даволаш)» услубий тавсия-номаси тасдиқланган (Соғлиқни сақлаш вазирлигининг 2018 йил 12 мартдаги 8н-д/44-сон маъ-лумотномаси). Ушбу услубий тавсиянома болалар БСҚСни даволаш-ташхислаш тактикасини оптималлаштириш имконини берган;
болалар БСҚСни даволаш тактикасини танлаш алгоритми, суяклар синишини ташхислаш ва регенерация муддатига кўра даволаш тактикасини танлаш ҳамда даволаш натижаларини баҳолаш дастурлари ишлаб чиқилган (Соғлиқни сақлаш вазирлигининг 2018 йил 12 мартдаги 8н-д/44-сон маълумотномаси);
болаларда БСҚСни даволаш хусусиятларини ўрганиш натижасида олинган илмий натижалар соғлиқни сақлаш тизимига, жумладан Республика ихтисослаштирилган травматология ва ортопедия илмий-амалий тиббиёт маркази, Навоий вилоят болалар кўп тармоқли тиббиёт маркази клиникаси, Тошкент педиатрия тиббиёт институти клиникаси ва Тошкент шаҳри 2-сон болалар жарроҳлик шифохонаси амалиётига жорий этилган (Соғлиқни сақлаш вазирлигининг 2018 йил 12 мартдаги 8н-д/44-сон маълумотномаси). Болаларда БСҚСни даволашнинг яхши натижалари 2,5 баробарга ошган.
