Иногамджанов Давруг Давроновичнинг

фалсафа доктори (PhD) диссертацияси ҳимояси ҳақида эълон

I. Умумий маълумотлар.

Диссертация мавзуси, ихтисослик шифри (илмий даража бериладиган фан тармоғи номи): «Бир қатламли тўқималар хусусиятларини прогнозлаш», 05.06.02–Тўқимачилик материаллари технологияси ва хомашёга дастлабки ишлов бериш (техника фанлари).

Диссертация мавзуси рўйхатга олинган рақам: B2017.4.PhD/T525.

Илмий раҳбар: Даминов Аскарали Давлатович, техника фанлари доктори, профессор.

Диссертация бажарилган муассаса номи: Тошкент тўқимачилик ва енгил саноат институти.

ИК фаолият кўрсатаётган муассаса (муассасалар) номи, ИК рақами: Тошкент тўқимачилик ва енгил саноат институти, DSc.27.06.2017.Т.08.01.

Расмий оппонентлар: Муқимов Мирабзал Мираюбович, техника фанлари доктори, профессор; Ахунбабаев Охунжон Абдурахмонович, техника фанлари доктори, катта илмий ходим.

Етакчи ташкилот: Наманган муҳандислик-технология институти.

Диссертация йўналиши: амалий аҳамиятга молик.

II. Тадқиқотнинг мақсади: бир қатламли тўқималар хусусиятларини ўрилиш омилига функционал боғлиқликда прогнозлашнинг назарий методларини такомиллаштиришдан иборат.

III. Тадқиқотнинг илмий янгилиги:

танда ва арқоқ ипларининг якка тўқув қопламаси ва тўқув ўрилиши раппорти доирасидаги силжиш катталигининг тўқима фазавий тузилишига боғлиқлиги ипларнинг бир-бирини эгиб ўтишида қўшган ҳиссасини ҳисобга олган ҳолда аниқланган;

танда ва арқоқ ипларининг тўқув қопламаси доирасидаги силжишини уларнинг сурилиш даражаси ҳамда тўқиманинг тузилиш фазасига функционал боғлиқликда аниқлаш учун аналитик ифодалар ишлаб чиқилган;

раппорт доирасида ипларнинг силжиш даражасини тўқима тузилиш фазасининг таъсирини ҳисобга олган ҳолда баҳолашнинг миқдорий мезони – тўқув ўрилишида ипларни силжиш коэффициенти, уни аниқлаш усули ишлаб чиқилган ва ушбу коэффициентни автоматик тизимда ҳисобловчи дастурий маҳсулот яратилган;

ипларнинг тўқув ўрилишида силжиш кўрсаткичини ўрилиш доирасида танда ва арқоқнинг кесишиш сонига боғлиқ ҳолда ҳисоблашнинг аналитик ифодаси ишлаб чиқилган;

ипларни тўқув ўрилишидаги силжиш коэффициентини тўқималарнинг бир қатор физик-механик хусусиятларига адекват корреляцияси экспериментал тажрибалар натижасида аниқланган.

IV. Тадқиқот натижаларининг жорий қилиниши.

Бир қатламли тўқималар хусусиятларини прогнозлаш усулларини янада ривожлантириш бўйича олинган натижалар асосида:

раппорт доирасида ипларнинг силжиш даражасини тўқима тузилиш фазасининг таъсирини ҳисобга олган ҳолда баҳолашнинг миқдорий мезони – тўқув ўрилишида ипларни силжиш коэффициентини аниқлаш усулини ҳисоблаш дастурий маҳсулоти “Ўзтўқимачиликсаноат” тизими­нинг “Jamstyle Master” МЧЖ тўқимачилик корхонасига жорий қилинган (“Ўзтўқимачиликсаноат” уюшмасининг 2018 йил 26 апрелдаги ДМ-174-сон маълумотномаси). Натижада ипларни силжиш даражасини тўқиманинг фазавий тузилиш тартибига боғлиқ ҳолда ҳисоблаб, тўқув маҳсулотини лойиҳалаш ва уни юқори тезликка эга бўлган Jakob Muller – 1200 рапирали тўқув дастгоҳида ишлаб чиқариш имкони яратилган;

янги турдаги ўри­лишларни лойиҳалашда ўрилишлар силжиш кўр­саткичларини ҳисоблашнинг автоматик тизими “Ўзтўқимачиликсаноат” тизими­ корхоналари, хусусан, “Ajab Etiketka” МЧЖда жорий қилинган (“Ўзтўқимачиликсаноат” уюшмасининг 2018 йил 26 апрелдаги ДМ-174-сон маълумотномаси).  Натижада корхонада Dornier – 1300 (Германия) тўқув дастгоҳларининг турли хил дессинаторлик ечимлари асосида ишлаб чиқарилаётган бир қатламли тўқима тасмаларининг ассортиментини янгилашга кетадиган вақт ва сарф-харажатларни камайтириш имконияти яратилган;

тўқув ўрилишларини силжиш коэффициентини ҳисоблаш усули “Ўзтўқимачиликсаноат” тизими­ корхоналари, хусусан, “Jamstyle Master” ва “Ajab Etiketka” МЧЖларида жорий қилинган (“Ўзтўқи­ма­чи­ликсаноат” уюшмаси­нинг 2018 йил 26 апрелдаги ДМ-174-сон маълумотномаси). Натижада тўқувчилик­да бир қатламли тўқималарни лойиҳалаш ва ишлаб чиқаришда хомашё ва энергоресурслар сарфи ҳамда қўл меҳнатини камайтириш имкони яратилган.