Ibragimova Ma’mura Muxiddinovnaning
falsafa doktori (PhD) dissertatsiyasi himoyasi haqida e’lon
I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): «Kichik biznes va xususiy tadbirkorlik faoliyatini tarkibiy o‘zgarishlar asosida samaradorligini oshirish (Namangan viloyati misolida)», 08.00.15–Tadbirkorlik va kichik biznes iqtisodiyoti (iqtisodiyot fanlari).
Dissertatsiya mavzusi ro‘yxatga olingan raqam: B2017.3.PhD/Iqt312.
Ilmiy rahbar: Maxmudov Nosir Maxmudovich, iqtisodiyot fanlari doktori, professor.
Dissertatsiya bajarilgan muassasa nomi: Toshkent davlat iqtisodiyot universiteti.
IK faoliyat ko‘rsatayotgan muassasa nomi, IK raqami: O‘zbekiston Respublikasi Bank-moliya akademiyasi va Toshkent davlat iqtisodiyot universiteti, DSc.27.06.2017. I.15.
Rasmiy opponentlar: Tursunxadjaev Marat Lutfullaevich, iqtisodiyot fanlari doktori, professor; Isaev Ravshan Abduraxmonovich, iqtisodiyot fanlari nomzodi, dotsent.
Yetakchi tashkilot: Toshkent moliya instituti.
Dissertatsiya yo‘nalishi: nazariy va amaliy ahamiyatga molik.
II. Tadqiqotning maqsadi: kichik biznes va xususiy tadbirkorlik faoliyatini tarkibiy o‘zgarishlar asosida samaradorligini oshirishga qaratilgan ilmiy taklif va amaliy tavsiyalar ishlab chiqishdan iborat.
III. Tadqiqotning ilmiy yangiligi:
kichik biznes va xususiy tadbirkorlik faoliyati asosiy jihatlarini tavsiflovchi asosiy ko‘rsatkichlar orqali tarkibiy o‘zgarishlarning umumiy sifat hamda samaradorlik koeffisientlarini baholash usuli taklif etilgan;
viloyatda biznes muhit va infratuzilmani takomillashtirish asosida kichik biznes va xususiy tadbirkorlik faoliyati samaradorligini oshirish yo‘llari asoslangan;
kichik biznes va xususiy tadbirkorlik tarkibiy tuzilmasining ko‘p omilli o‘zgarishlariga muvofiq holda samarali qarorlar qabul qilish tizimini yo‘lga qo‘yish asosida samaradorlikni oshirish mexanizmi takomillashtirilgan;
Namangan viloyatida kichik biznes va xususiy tadbirkorlik faoliyatini rivojlantirishning 2021 yilga qadar prognoz ko‘rsatkichlari ishlab chiqilgan.
IV. Tadqiqot natijalarining joriy qilinishi.
Kichik biznes va xususiy tadbirkorlik faoliyatini tarkibiy o‘zgarishlar asosida samaradorligini oshirish bo‘yicha ilmiy natijalar asosida:
kichik biznes va xususiy tadbirkorlik faoliyatining asosiy jihatlarini tavsiflovchi, xususiy ko‘rsatkichlar orqali tarkibiy o‘zgarishlarning umumiy sifat hamda samaradorlik koeffisientlarini baholash usuli O‘zbekiston Savdo-sanoat palatasi Namangan viloyat hududiy boshqarmasi tomonidan 2017-2021 yillarga mo‘ljallangan biznes maqsadlarini belgilash hamda viloyatlarda kichik biznes va xususiy tadbirkorlikni rivojlantirish chora-tadbirlari to‘g‘risidagi hukumat qaror loyihalarini tayyorlashda foydalanilgan (O‘zbekiston Savdo-sanoat palatasi Namangan viloyati hududiy boshqarmasining 2018 yil 3 apreldagi SSP/N-01-397-son ma’lumotnomasi). Natijada viloyatda kichik biznes va xususiy tadbirkorlik faoliyati samaradorligini baholash aniqligi ortib, jumladan, «Bunyod» MChJ faoliyat samaradorligi ko‘rsatkichi sifatida 26 ming AQSh dollari miqdorida qo‘shimcha mahsulot eksport qilinishiga erishilgan;
viloyatda biznes muhit va infratuzilmani takomillashtirish asosida kichik biznes va xususiy tadbirkorlik faoliyati samaradorligini oshirish chora-tadbirlaridan Namangan viloyati hokimining 2017 yil 11 fevraldagi 60-son «O‘zbekiston Respublikasi Prezidentining «O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida»gi 2017 yil 7 fevraldagi PF-4947-sonli Farmonini viloyatda bajarilishini ta’minlash haqida»gi qarorini tayyorlashda foydalanilgan (Namangan viloyati hokimligining 2018 yil 2 apreldagi 02/12-1655-son ma’lumotnomasi). Natijada viloyatda kichik biznes va xususiy tadbirkorlik faoliyatini rivojlantirish, uning samaradorligini oshirish, aholi bandligi va daromadlarini ko‘paytirish orqali yalpi hududiy mahsulotning 4,2 foizga oshishiga imkon yaratgan;
kichik biznes va xususiy tadbirkorlik tarkibiy tuzilmasining ko‘p omilli o‘zgarishlariga muvofiq holda samarali qarorlar qabul qilish tizimini yo‘lga qo‘yish asosida samaradorlikni oshirish mexanizmi O‘zbekiston Savdo-sanoat palatasi Namangan viloyati hududiy boshqarmasi tomonidan hududiy dastur ishlab chiqishda foydalanilgan (O‘zbekiston Savdo-sanoat palatasi Namangan viloyati hududiy boshqarmasining 2018 yil 3 apreldagi SSP/N-01-397-son ma’lumotnomasi). Natijada faoliyati to‘xtatilgan «Lola-Uzor» O‘zbek-Xitoy qo‘shma korxonasi «Bunyod» MChJ nomi bilan qayta tashkil etilib, uning 2017 yildagi rentabellik ko‘rsatkichi 2016 yilga nisbatan oshgan hamda 42 ming AQSh dollari miqdorida mahsulot eksport qilinishiga erishilgan;
Namangan viloyatida tarkibiy o‘zgarishlar asosida kichik biznes va xususiy tadbirkorlik faoliyati samaradorligini oshirish bo‘yicha ilmiy taklif va amaliy tavsiyalari hamda KBXT faoliyatini rivojlantirishning 2021 yilga qadar prognoz ko‘rsatkichlaridan Namangan viloyati hokimining 2018 yil 25 yanvardagi 49-son «O‘zbekiston Respublikasi Prezidentining «2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini «Faol tadbirkorlik, innovatsion g‘oya va texnologiyalarni qo‘llab-quvvatlash yili»da amalga oshirishga oid Davlat dasturi to‘g‘risida»gi 2018 yil 22 yanvardagi PF-5308-son Farmoni ijrosi haqida»gi qarori loyihalarini tayyorlashda foydalanilgan (Namangan viloyati hokimligining 2018 yil 2 apreldagi 02/12-1655-son ma’lumotnomasi). Natijada viloyatda faoliyat yuritayotgan 20 dan ortiq korxona tomonidan 6269,4 ming AQSh dollar hajmida qo‘shimcha mahsulot eksport qilinishiga erishilgan.
