Турдиев Шахбоз Шермамат ўғлининг
фан доктори (DSc) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган тармоғи номи): «Ўзбекистондаги платиноидлар ҳамда нодир металларнинг минерал жойлашуви ва уларни ажратиб олиш технологиясини яратиш», 05.02.01 – Машинасозликда материалшунослик. Қуймачилик. Металларга термик ва босим остида ишлов бериш. Қора, рангли ва ноёб металлар металлургияси (техника фанлари).
Диссертация мавзуси рўйхатга олинган рақам: B2024.3.DSc/Т808.
Илмий маслаҳатчи: Ҳасанов Абдурашид Салиевич, техника фанлари доктори, профессор.
Диссертация бажарилган муассаса номи: Тошкент давлат техника университети «Фан ва тараққиёт» ДУК.
ИК фаолият кўрсатаётган муассасалар номи, ИК рақами: Тошкент давлат техника университети «Фан ва тараққиёт» ДУК, DSc.03/30.12.2019.K/T.03.01.
Расмий оппонентлар: Якубов Махмуджон Махамаджонович, техника фанлари доктори, профессор; Шарофиддинов Улуғбек Зиятович, техника фанлари доктори, профессор; Ахунджанов Рахматжан, геология минералогия фанлари доктори.
Етакчи ташкилот: Навоий давлат кончилик ва технологиялар университети.
Диссертация йўналиши: амалий аҳамиятга молик.
II. Тадқиқотнинг мақсади: Ўзбекистондаги платиноидлар ҳамда нодир металларнинг минерал жойлашуви ва уларни ажратиб олиш технологиясини ишлаб чиқишдан иборат.
III. Тадқиқотнинг илмий янгилиги:
олтиннинг теллуридли, платина металли, селенид-теллурид бирикмали ҳамда олтин ва кумушнинг соф шаклида минераллашуви аниқланган;
руда таркибида қимматбаҳо металлар ва платиноидларнинг минералогиясини аниқлаш билан, мис рудасини марказдан қочирма бойитишнинг оптимал параметрлари ишлаб чиқилган;
рудаларни флотация усулида бойитишда йиғувчи реагент сифатида МХ5125 ва 442Ф реагентларининг 5 г/т сарфи билан реагент режимини оптималлаштириш ва бойитма таркибида 20-23% гача мис мавжудлиги аниқланган;
нодир металлар ва платина гуруҳи металларини гравитация-флотация технологиясидан фойдаланган ҳолда юқори унум билан комплекс ажратиб олишнинг янги технологик схемаси ишлаб чиқилган ва бойитмада олтин миқдори 133 г/т ни ва кумушни миқдори 88,2 г/т ни ташкил этиши аниқланган;
гравитация-флотация комбинацияланган бойитиш схемаси орқали олинган бойитмаларни пирометаллургик эритиш технологияси билан платина гуруҳи металларининг хомаки мис фазасига юқори даражада ўтказишнинг оптимал параметрлари аниқланган;
платина гуруҳи металларининг пирометаллургик технология бўйлаб ҳаракатланиши материал баланси ишлаб чиқилган, бунда платина ва палладийни умумий ажратиб олиш даражасини ошириш билан платиноидларни минерал ҳосил бўлишидан токи тайёр маҳсулот ишлаб чиқаришгача бўлган жараёнлари мақбул параметрлари ишлаб чиқилган;
мис рудаларидан олинган пирит бойитмаларини сорбцион-цианлаш технологиясининг мақбул параметрлари ишлаб чиқилган, бунда олтин ва кумушни фаоллаштирилган кўмир билан сорбциялаш ва олтинни 80% дан юқори ажралиш даражаси билан ажратиб олиш ва десорбциялаш параметрлари аниқланган.
IV. Тадқиқот натижаларининг жорий қилиниши.
Ўзбекистонда платиноидлар ҳамда нодир металларнинг минерал жойлашуви ва уларни ажратиб олиш технологиясини ишлаб чиқиш бўйича олинган илмий натижалар асосида:
қимматбаҳо металларни ажратиб олиш технолгияси “ОКМК” АЖ шароитида амалиётга жорий этилган (“ОКМК” АЖнинг 19 июн 2024 йилдаги SL-000595-сонли маълумотномаси). Натижада, полиметалл мис рудаларидан платиноидлар ва нодир металларни юқори унум билан ажратиб олиш имконини берган;
янги ишлаб чиқилган технологик схема асосида “Олмалиқ КМК” АЖ мис эритиш заводида қимматбаҳо металлар ва платиноидларни комплекс ажратиб олиш технологияси амалиётга жорий этилган (“ОКМК” АЖнинг 19 июн 2024 йилдаги SL-000595-сонли маълумотномаси). Натижада, гравитация бойитмасидан 133 г/т олтин ва 88,2 г /т бўлган кумушни ажратиб олиш имконини берган;
платина гуруҳи металларини маъданлардан тайёр маҳсулот ишлаб чиқаришгача бўлган технологик жараёнларнинг ишлаб чиқилган моддий баланси “Олмалиқ КМК” АЖ мис эритиш заводида амалиётга жорий этилган (“ОКМК” АЖнинг 19 июн 2024 йилдаги SL-000595-сонли маълумотномаси). Натижада, платина ва палладийни техноген чиқиндилардан ажратиб олиш даражасини 84% дан ошириш имконини берган.