Юлдашев Мухсинжон Акрамжонович
фалсафа доктори (PhD) диссертацияси ҳимояси ҳақида эълон

I.    Умумий маълумотлар.
Диссертация мавзуси, ихтисослик шифри (илмий даража берадиган фан тармоғи номи): «Ғалтакли экиш аппарати билан жиҳозланган сабзавотчилик сеялкасининг конструксиясини такомиллаштириш ва параметрларини асослаш», 05.07.01 – Қишлоқ хўжалиги ва мелиорация машиналари. Қишлоқ хўжалиги ва мелиорация ишларини механизациялаш (техника фанлари).
Диссертация мавзуси рўйхатга олинган рақам: B2023.1.PhD/Т3505.
Илмий раҳбарнинг Ф.И.Ш., илмий даражаси ва унвони: Рустамов Рахматали Мурадович, техника фанлари доктори, профессор.
Диссертация бажарилган муассаса номи: Наманган муҳандислик-қурилиш институти.
ИК фаолият кўрсатаётган муассаса номи, ИК рақами: Наманган муҳандислик-қурилиш институти, PhD.03/30.12.2019.Т.90.01.
Расмий оппонентларнинг Ф.И.Ш., илмий даражаси ва унвони: Мансуров Мухторжон Тохиржонович, техника фанлари доктори, профессор; Ибрагимов Адирасули Абдикаримович, техника фанлари доктори, катта илмий ходим.
Етакчи ташкилот номи: Андижон қишлоқ хўжалиги ва агротехнологиялар институти.
Диссертация йўналиши: назарий ва амалий аҳамиятга молик.
II.    Тадқиқотнинг мақсади текис дала майдонига сабзавот экинлари уруғларини экадиган ва суғориш эгатларини очадиган сабзавотчилик сеялкасининг конструксиясини такомиллаштириш орқали экиш сифатини ошириш ва харажатларни камайтиришдан иборат.
III.     Диссертация тадқиқотининг илмий янгилиги қуйидагилардан иборат:
бир йўла текис дала юзасига сабзавот экинлари уруғларини экадиган ва суғориш эгатларини очадиган, нов кўринишидаги уруғ ўтказгич билан жиҳозланган сеялканинг конструксияси уруғларни белгиланган агротехник талаблар даражасида экилишини ҳисобга олган ҳолда ишлаб чиқилган;
сабзавотчилик сеялкаси уруғ қутисининг ҳажми, баландлиги ва кенглигини аниқлаш имконини берадиган аналитик боғланишлар сабзавот экинлари уруғларининг физик-механик хусусиятлари, экиш меёрлари, уруғларни қути тубидаги ҳаракат қонунлари ва қути деворларининг қиялик бурчакларини инобатга олган ҳолда ишлаб чиқилган;
нов кўринишидаги уруғ ўтказгичда сабзавот уруғларини думалаб ёки сирпаниб ҳаракатланишини таъминлайдиган ишқаланиш коеффициентининг чегаравий шартини белгиловчи математик ифода уруғ шаклини инобатга олувчи коеффициент, массаси, уруғ ўтказгичнинг ўрнатилиш бурчагини инобатга олган ҳолда ишлаб чиқилган;
сабзавотчилик сеялкасининг нов кўринишидаги уруғ ўтказгичини қиялик бурчаги, узунлиги ва дала юзасига нисбатан ўрнатилиш баландлигининг мақбул қийматларини аниқловчи математик ифода сабзавот уруғларини бир текис аниқликда экиш шартидан келиб чиқиб ва мақбул параметрлари тажриба усулида аниқланган.
IV.     Тадқиқот натижаларининг жорий қилиниши. Ғалтакли экиш аппарати билан жиҳозланган сабзавотчилик сеялкасининг конструксиясини такомиллаштириш ва параметрларини асослаш мавзусида олиб борилган тадқиқотлар бўйича олинган илмий натижалар асосида:
ғалтакли экиш аппарати билан жиҳозланган сабзавотчилик сеялкаси «Қишлоқ хўжалиги машинасозлиги конструкторлик – технологик маркази» МЧЖ га жорий этилган (Қишлоқ хўжалиги Вазирлигининг 2023-йил 23-мартдаги 06/22-05/1224-сон маълумотномаси). Натижада ғалтакли экиш аппарати билан жиҳозланган сабзавотчилик сеялкасининг конструксиясини ишлаб чиқиш имконияти яратилган;
ғалтакли экиш аппарати билан жиҳозланган сабзавотчилик сеялкаси Ўзбекистон Республикаси Қишлоқ хўжалиги вазирлиги тасарруфидаги фермер хўжаликларида, жумладан, Наманган вилояти Поп ва Чуст туманларидаги фермер хўжаликларида жорий этилган (Қишлоқ хўжалиги Вазирлигининг 2023-йил 23-мартдаги 06/22-05/12224-сон маълумотномаси). Натижада, сабзавотчилик сеялкаси қўлланганда мавжуд экиш машиналарига нисбатан ёнилғи сарфини 1,8 мартага ҳамда мехнат сарфини эса 2 мартага камайишига эришилган;