Рузибаев Акмал Рашидовичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Дистанцион ва контакт литотрипсия инфекцион-яллиғланиш асоратларининг профилактикаси», 14.00.31 – Урология (тиббиёт фанлари)
Диссертация мавзуси рўйхатга олинган рақам: В2020.2. PhD/Tib1297.
Илмий раҳбар: Акилов Фархад Атауллаевич, тиббиёт фанлари доктори, профессор
Диссертация бажарилган муассаса номи: Тошкент тиббиёт академияси.
ИК фаолият кўрсатаётган муассаса номи, ИК рақами: академик В.Воҳидов номидаги Республика ихтисослаштирилган хирургия илмий-амалий тиббиёт маркази, DSc.04/30.12. 2019.Tib.49.01.
Расмий оппонентлар: Гайбуллаев Асилбек Асадович, тиббиёт фанлари доктори, профессор; Ахмедов Рустам Носирович, тиббиёт фанлари доктори.
Етакчи ташкилот: «Академик И.П.Павлов номидаги Биринчи Санкт-Петербург давлат тиббиёт университети» Федерал давлат бюджет олий таълим муассасаси (Россия Федерацияси).
Диссертация йўналиши: амалий аҳамиятга молик
II. Тадқиқотнинг мақсади: ташрихдан кейинги инфекцион-яллиғланишли асоратларнинг частотаси ва оғирлик даражасини камайтириш орқали дистанцион ҳамда контакт литотрипсия натижаларини яхшилашдан иборат.
III. Тадқиқотнинг илмий янгилиги қуйидагилардан иборат:
дистанцион литотрипсияда сийдик йўллари инфекцияси ва уни қўзғатувчиси турига, конкрементнинг жойлашуви, ўлчамлари ҳамда зичлигига, шунингдек семизлик ва қандли диабет касаллиги мавжудлигига, жинсга,  боғлиқ ҳолда инфекцион-яллиғланишли асоратлар ривожланишининг асосий предикторлари аниқланган;
эндоскопик контакт литотрипсияда сийдик йўллари инфекциясининг ҳамда патоген флоранинг тури, тошга кириб бориш йўли, операция вақтининг давомийлиги, ташрих вақтидаги ва ташрихдан кейинги турли ҳил асоратларни ҳисобга олган ҳолда инфекцион-яллиғланишли асоратларни ривожланишининг ҳавф омиллари аниқлаштирилган;
ўткир асоратланган пиелонефрит ва уросепсиснинг ривожланиши экстракорпорал зарба-тўлқинли литотрипсиянинг сийдик найидаги 8 ммдан катта ўлчамдаги ёки зичлиги юқори бўлган тошни майдалаш, шунингдек инфекция фонида бартараф этилмаган обструкция каби жиҳатлари билан боғлиқлиги исботланган;
дистанцион литотрипсиядан кейин асоратлар ривожланишини истисно қилишга, эндоскопик контакт литотрипсиядан кейин эса уларнинг частотаси ва оғирлик даражасини пасайтиришга имкон берган асоратланган пиелонефрит ва уросепсис ривожланишининг ажратилган ҳавф омиллари клиник аҳамияти очиб берилган.
IV. Тадқиқот натижаларининг жорий қилиниши.
Дистанцион ва контакт литотрипсиянинг инфекцион-яллиғланишли асоратларини олдини олиш бўйича олинган илмий натижалар асосида:
«Уролитиаз эндоскопик хирургиясининг инфекцион-яллиғланишли асоратларини олдини олиш чора-тадбирлари» номли услубий тавсиянома тасдиқланган («Академик В.Вохидов номидаги РИХИАТМ» ДМ Эксперт кенгашининг 2023 йил 02 мартдаги 2х/4-сон маълумотномаси). Таклиф этилган тавсиялар эндоскопик контакт литотрипсиядан кейинги инфекцион-яллиғланишли асоратларни ривожланишининг олдини олиш бўйича чора-тадбирларни такомиллаштиришга, бу эса асоратланган пиелонефритнинг частотаси ва оғир кечиш холатларини сезиларли даражада камайтиришга ва уросепсис ривожланишини истисно қилишга имкон берган;
сийдик-тош касаллигини даволаш натижаларини яхшилаш бўйича олинган илмий натижалар соғлиқни сақлашнинг амалий фаолиятига, хусусан, “Республика ихтисослаштирилган урология илмий-амалий тиббиёт маркази” давлат муассасасига ҳамда Республика ихтисослаштирилган урология илмий-амалий тиббиёт маркази Хоразм филиалига жорий этилган («Академик В.Вохидов номидаги РИХИАТМ» ДМ Эксперт кенгашининг 2023 йил 02 мартдаги 2х/4-сон маълумотномаси). Тадқиқот натижаларини амалиётга жорий этиш инфекцион-яллиғланишли ҳамда бошқа мумкин бўлган ташрих вақтидаги, ташрихдан кейинги асоратларни олдини олиш чоралари кўрилгани ҳисобига экстракорпорал зарба-тўлқинли литотрипсиясидан кейинги асоратланган пиелонефрит ривожланиш частотасини камайтиришга, эндоскопик контакт литотрипсиядан кейин эса, унинг частотасини 18,6% дан 8,6% гача пасайтиришга ва беморларнинг шифохонада бўлиш давомийлигини 9,13 дан 6,42 кунгача қисқартиришга имкон берган.