Мухаммадиева Моҳинур Яхшибаевнанинг
фалсафа доктори (PhD) диссертацияси ҳимояси ҳақида эълон

I.Умумий маълумотлар
Диссертация мавзуси, ихтисослик шифри (илмий даража бериладиган фан тармоғи номи): “Коррупцияга қарши курашишда фуқаролик жамияти институтларининг ролини оширишнинг ташкилий-ҳуқуқий масалалари”, 12.00.12 – Коррупция муаммолари (юридик фанлар).
Диссертация мавзуси рўйхатга олинган рақам: В2021.1.PhD/Yu522.
Илмий раҳбар: Хожиев Эркин Туйғунович, юридик фанлар номзоди, профессор.
Диссертация бажарилган муассаса номи: Ўзбекистон Республикаси Ҳуқуқни муҳофаза қилиш академияси.
ИК фаолият кўрсатаётган муассаса номи, ИК рақами: Ўзбекистон Республикаси Ҳуқуқни муҳофаза қилиш академияси, DSc.31/31.12.2020.Yu.67.01.
Расмий оппонентлар: Исмоилов Баходир Исламович, юридик фанлар доктори, профессор; Наримонов Бегзод Абдувалиевич, ю.ф.ф.д. (PhD), доцент.
Етакчи ташкилот: Ўзбекистон Республикаси Коррупцияга қарши курашиш агентлиги.
Диссертация йўналиши: назарий ва амалий аҳамиятга молик.
II. Тадқиқотнинг мақсади коррупцияга қарши курашишда фуқаролик жамияти институтларининг ролини ошириш бўйича таклиф ва тавсиялар ишлаб чиқишдан иборат.
III. Тадқиқотнинг илмий янгилиги:
норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказиш жараёнига жамоатчилик, илмий ташкилотлар ва мустақил экспертларни кенг жалб қилиш тартибига оид таклиф ишлаб чиқилган;
қонун ҳужжатлари лойиҳаларини ишлаб чиқишнинг барча босқичларида, айниқса, ушбу лойиҳаларни қонунчилик ташаббуси субъектига киритиш, муҳим сиёсий, ижтимоий ва иқтисодий дастурлар ишлаб чиқиш жараёнида нодавлат нотижорат ташкилотлар ва фуқаролик жамиятининг бошқа институтлари иштирок этиши ҳамда қонунчилик ижроси устидан мониторинг олиб бориш механизмларини такомиллаштириш ҳуқуқий асослантирилган;
нодавлат нотижорат ташкилотлар ва фуқаролик жамиятининг бошқа институтларида кадрларни қўллаб-қувватлаш ва уларни давлат фуқаролик хизматига тайёрлаш орқали кадрлар захирасини шакллантириш чораларини кўриш бўйича таклифлар асослаб берилган;
давлат бошқаруви органларида коррупциявий омилларни бартараф қилиш мақсадида қонунчиликка коррупцияга оид ҳуқуқбузарликлар тўғрисида ваколатли давлат органларига ахборот бериш ҳамда коррупцияга қарши краудсорсинг воситаларни қўллашни киритиш асослаб берилган.
IV. Тадқиқот натижаларининг жорий қилиниши. Коррупцияга қарши курашишда фуқаролик жамияти институтлари ролини оширишга оид  тадқиқот иши бўйича олинган илмий натижалар асосида:
норматив-ҳуқуқий ҳужжатлар лойиҳаларини тайёрлашга оид таклифлардан Ўзбекистон Республикаси Президентининг 2021 йил 22 октябрдаги “Норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказишни янада такомиллаштириш чора-тадбирлари тўғрисида”ги ПҚ-5263-сон қарорининг 2-бандини ишлаб чиқишда фойдаланилган (Вазирлар Маҳкамаси Юридик таъминлаш бошқармасининг 2023 йил 25 январдаги 12/15-20-сон далолатномаси). Ушбу таклифнинг қабул қилиниши норматив-ҳуқуқий ҳужжатлар лойиҳаларини коррупцияга қарши экспертизадан ўтказиш жараёнига жамоатчилик, илмий ташкилотлар ва мустақил экспертларни кенг жалб қилиш тартибини белгилашга хизмат қилган;
қонун ҳужжатлари лойиҳаларини ишлаб чиқишнинг барча босқичларида, айниқса, ушбу лойиҳаларни қонунчилик ташаббуси субъектига киритиш тартибини такомиллаштиришга оид таклифлар Ўзбекистон Республикаси Президентининг 2021 йил 4 мартдаги “2021-2025 йилларда фуқаролик жамиятини ривожлантириш концепциясини тасдиқлаш тўғрисида”ги ПФ-6181-сон Фармони билан тасдиқланган “Йўл харитаси”нинг 19 ва 21-бандларини ишлаб чиқишга хизмат қилган (Вазирлар Маҳкамаси Юридик таъминлаш бошқармасининг 2021 йил 14 декабрдаги 12/21-54-сон далолатномаси). Ушбу таклифнинг қабул қилиниши муҳим сиёсий, ижтимоий ва иқтисодий дастурлар ишлаб чиқилишида фуқаролик жамияти институтларининг иштирок этиши ҳамда қонунчилик ижроси устидан мониторинг олиб бориш механизмларини такомиллаштиришга кўмаклашган;
давлат хизмати кадрлари захирасини шакллантириш мезонларига оид таклифлардан Вазирлар Маҳкамасининг 2021 йил 18 январдаги 23-сон қарори билан тасдиқланган “Ўзбекистонда ёшларга оид давлат сиёсатини 2025 йилгача ривожлантириш концепцияси”нинг 4-боб 9-бандини ишлаб чиқишда фойдаланилган (Вазирлар Маҳкамасининг Юридик таъминлаш бошқармасининг 2021 йил 14 декабрдаги
12/21-54-сон далолатномаси). Ушбу таклиф нодавлат нотижорат ташкилотлар ва фуқаролик жамиятининг бошқа институтларида кадрларни қўллаб-қувватлаш ва уларни давлат фуқаролик хизматига тайёрлаш ишида самарали кўмаклашган;
давлат органларида коррупциявий хавф-хатарларни бартараф этишга оид таклифлардан “Давлат бошқаруви органларида коррупциявий омилларни бартараф қилиш тўғрисида”ги Қонун лойиҳасини тайёрлашда фойдаланилган (Коррупцияга қарши курашиш агентлигининг 2022 йил 20 январдаги 03-06/196-сон маълумотномаси). Ушбу таклифларнинг қабул қилиниши коррупцияга оид ҳуқуқбузарликлар тўғрисида давлат органларига ахборот бериш, коррупцияга қарши краудсорсинг воситаларни қўллашга доир нормаларни шакллантиришга хизмат қилган.