Ҳамидова Наргиза Қосимовнанинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Болаларда гименолепидоз кечишининг клиник–иммунологик хусусиятлари», 14.00.36 – Аллергология ва иммунология; 14.00.10 - Юқумли  касалликлар (тиббиёт фанлари).
Диссертация мавзуси рўйхатга олинган рақам: В2021.3.PhD/Tib2183.
Илмий раҳбарлар: Нарзуллаев Нуриддин Умарович, тиббиёт фанлар доктори (DSc), доцент; Мирзоева Меҳринисо Ризоевна, тиббиёт фанлар доктори (DSc), доцент.
Диссертация бажарилган муассаса номи: Абу Али ибн Сино номидаги Бухоро давлат тиббиёт институти.
ИК фаолият кўрсатаётган муассаса (муассасалар) номи, ИК рақами: Бухоро давлат тиббиёт институти, DSc.04/30.04/2022.Tib.93.01.
Расмий оппонентлар: Мусаходжаева Дилорам Абдуллаевна, биология фанлари доктори, профессор; Косимова Раъно Ибрагимовна, тиббиёт фанлари доктори, профессор.
Етакчи ташкилот: Иркутск давлат тиббиёт университети (Россия Федерацияси).  
Диссертация йўналиши: назарий ва амалий аҳамиятга молик.
II. Тадқиқотнинг мақсади: болаларда гименолепидоз касаллигининг клиник- иммунологик хусусиятларини аниқлаш ҳамда шу асосда даволашнинг оқилона схемаларини ишлаб чиқишдан иборат бўлган.
III. Тадқиқотнинг илмий янгилиги:
илк бор гименолепидоз ташҳисланган болаларда касалликнинг озиш, ўсишдан қолиш, терида қичишиш, асабга боғлиқ ихтиёрсиз ҳаракатлар каби клиник кўринишлари билан иммун ва цитокин статуслари асосий кўрсаткичлари орасида тўғри пропорционал боғлиқлик борлиги исботланган;
гименолепидоз кузатилган беморлар иммун ва цитокин статусларини баҳолаш асосида қонда CD3+-, CD4+-, CD8+-, CD16+-лимфоцитлар, ИРИ, қон зардобида IL-4, ИФН-γ каби параметрлар иммунодиагностиканинг муқобил мезонлари сифатида кўрсатилиши асосланган;
ушбу паразитар касаллик билан касалланган болаларни анъанавий даволаш мажмуига иммунал иммунокоррекцияловчи препаратининг киритилиши касаллик кечиши, унинг клиник кўринишлари пасайиши, организм иммун ва цитокин статусларидаги иккиламчи иммунодефицитни бартараф этиб, ушбу кўрсаткичларнинг меъёрлашувига олиб келганлиги аниқланган;
гименолипедоз кузатилган болаларни даволаш бўйича анъанавий терапия ва иммунокоррекцияловчи препарат ишлатиш бўйича ишлаб чиқилган алгоритм тавсия этилган мажмуавий терапияни оптималлаштириш ва даволаш самарадорлигини ишонарли даражада ошиши исботланган.
IV. Тадқиқот натижаларининг жорий қилиниши. 
Болаларда гименолепидоз кечишининг клиник-иммунологик хусусиятлари бўйича олинган илмий натижалар асосида:
гименолепидоз билан зарарланган болаларда иммун статусини аниқлаш  бўйича тадқиқотнинг илмий натижалари асосида ишлаб чиқилган «Гименолепидоз билан зарарланган болаларда иммун ва цитокин ҳолатини баҳолаш усули» номли услубий тавсиянома тасдиқланган (Соғлиқни сақлаш вазирлигининг 2022 йил 26 майдаги 8н-р/515-сон маълумотномаси). Мазкур услубий тавсиянома гименолепидоз билан зарарланган болалар периферик қонида ҳужайравий, гуморал ва цитокин кўрсаткичларининг ҳолатини баҳолаш имконини берган;
олинган натижалар амалий соғлиқни сақлашга жумладан, Бухоро вилоят болалар юқумли касалликлар шифохонаси, Когон туман тиббиёт бирлашмаси амалий фаолиятига тадбиқ этилган (Соғлиқни сақлаш вазирлигининг 2022 йил 16 июндаги 8н-з\300-сон маълумотномаси). Жорий қилинган натижалар болаларда гименолепидозни эрта ташҳислаш, патогенетик даволашни оптималлаштириш имконини берган, касаллик асоратларини камайтирган.