Бобоев Ойбек Райимовичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Сигирларда эндемик бўқоқнинг этиопатогенези ва гуруҳли профилактикаси», 16.00.01 - Ҳайвонлар касалликлари диагностикаси, терапияси ва хирургияси (ветеринария фанлари).
Диссертация мавзуси рўйхатга олинган рақам: B2019.4.PhD/V2.
Илмий раҳбар: Бакиров Бахтияр, ветеринария фанлари доктори, профессор.
Диссертация бажарилган муассаса номи: Самарқанд давлат ветеринария медицинаси, чорвачилик ва биотехнологиялар университети.
ИК фаолият кўрсатаётган муассаса номи, ИК рақами: Самарқанд давлат ветеринария медицинаси, чорвачилик ва биотехнологиялар университети, DSc.06/30.12.2019V.12.01.
Расмий оппонентлар: Эшбуриев Бахтияр Маматқулович, ветеринария фанлари доктори, профессор; Маматов Шавкат Содиқович, ветеринария фанлари номзоди.
Етакчи ташкилот: Ветеринария илмий-тадқиқот институти.
Диссертация йўналиши: назарий ва амалий аҳамиятга молик.
II. Тадқиқотнинг мақсади республикамизнинг қорамолчиликка ихтисослашган фермер хўжаликлари шароитидаги зотли қорамолларда эндемик бўқоқнинг сабаблари ва ривожланиш механизмини ўрганиш, даволаш ва гуруҳли олдини олиш усулларини такомиллаштиришдан иборат.
III. Тадқиқотнинг илмий янгилиги:
илк бор республиканинг Самарқанд, Қашқадарё ва Бухоро вилоятлари шароитларидаги зотли қорамоллар орасида эндемик бўқоқ касаллигининг тарқалиши аниқланган, шунингдек, касалликнинг алиментар-эндемик ҳамда геоэкологик сабаблари илмий асосланган;
клиник ва морфометрик ўзгаришлар динамикаси, қондаги морфологик, биокимёвий, ферментатив ҳамда гормонал-тироидал ўзгаришлар асосида зотли қорамолларда эндемик бўқоқнинг эртачи ташҳис усули ишлаб чиқилган;
таркибидаги йод миқдори 20% га оширилган фаоллаштирилган йодланган ош тузи ва 10% ли қалқонсимон без экстрактини тайёрлаш технологияси ишлаб чиқилган ва уларнинг сигирларда қалқонсимон без фаолиятига таъсири илмий асосланган, профилактик миқдори ва қўллаш тартиби ишлаб чиқилган;
“Blattin Premium” премиксининг сигирларларда қалқонсимон без фаолиятига таъсири илмий асосланган, профилактик миқдори ва ишлатиш тартиби ишлаб чиқилган;
зотли сигирларда эндемик бўқоқнинг фаоллаштирилган йодланган ош тузи, 10% ли қалқонсимон без экстракти ва “Blattin Premium” премиксини қўллашга асосланган гуруҳли олдини олиш усули ишлаб чиқилган.
IV. Тадқиқот натижаларининг жорий қилиниши.
Сигирларда эндемик бўқоқнинг этиопатогенези ва гуруҳли профилактикаси бўйича олиб борилган илмий тадқиқот натижалари асосида:
«Сигирларда эндемик бўқоқни даволаш ва олдини олиш  бўйича тавсиялар» тасдиқланиб, Самарқанд, Қашқадарё ва Бухоро вилоятлари қорамолчилик фермер хўжаликларига жорий қилинган (Ветеринария ва чорвачиликни ривожлантириш давлат қўмитасининг 2022 йил 04 апрелдаги 02/23-116-сон маълумотномаси). Ушбу тавсияларни қўллаш ҳисобига сигирларда эндемик бўқоқни даволаш ва олдини олишда юқори самарадорликка эришилган;
сигирларда эндемик бўқоқнинг олдини олишда таркибидаги йод микдори 20% га оширилган йодланган ош тузи, 10% ли қалқонсимон без экстракти ва «Blattin Premium» универсал минерал премиксини қўллаш усули ишлаб чиқилган ва жорий этилган (Ветеринария ва чорвачиликни ривожлантириш давлат қўмитасининг 2022 йил 04 апрелдаги 02/23-116-сон маълумотномаси). Ушбу гуруҳли профилактика усули бошқа муқобил олдини олиш вариантларига қараганда энг самарали олдини олиш усули эканлиги аниқланган;
сигирларда эндемик бўқоқнинг олдини олиш учун тавсия этилган воситалар ва уларни қўллаш усули Самарқанд, Қашқадарё ва Бухоро вилоятлари қорамолчилик фермер хўжаликларига жорий этилган (Ветеринария ва чорвачиликни ривожлантириш давлат қўмитасининг 2022 йил 04 апрелдаги 02/23-116-сон маълумотномаси). Натижада такомиллашган олдини олиш усулини қўллаш орқали ҳар бош сигир ҳисобига ўртача 5 471 000 сўм иқтисодий самара олишга эришилган ва бунда ҳаражатлар қоплами 4,3 сўмни ташкил этган.