Косимова Малоҳатхон Каримовнанинг
фалсафа доктори (РhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Тупроққа ишлов берувчи ясси деталларни (лемех каби) контакт пайвандлаш усулида қайта тиклаш кўрсаткичларини асослаш”, 05.07.02 – «Қишлоқ хўжалиги ва мелиорация техникаларини ишлатиш, тиклаш ва таъмирлаш» (техника фанлари). 
Диссертация мавзуси рўйхатга олинган рақам: В2020.2.PhD/Т1671 
Илмий раҳбар: Худойбердиев Толибжон Солиевич, техника фанлари доктори, профессор.
Диссертация бажарилган муассаса (муассасалар) номи: Андижон машинасозлик институти, Андижон қишлоқ хўжалиги ва агротехнологиялар институти. 
ИК фаолият кўрсатаётган муассаса номи, ИК рақами: Андижон қишлоқ хўжалиги ва агротехнологиялар институти, PhD.05/30.06.2021.T.126.02
Расмий оппонентлар: Нуриев Карим Катибович, техника фанлари доктори, профессор; Турсунов Баҳодир Насибович, техника фанлари номзоди, доцент.
Етакчи ташкилот: Наманган муҳандислик-қурилиш институти.
Диссертация йўналиши: назарий ва амалий аҳамиятга молик.
II. Тадқиқотнинг мақсади қишлоқ хўжалик техникаларининг тупроққа ишлов берувчи ясси деталларининг (лемех каби) ишчи юзасига шакллантирилган композицион материалларни контакт пайвандлаб қоплаш усулини такомиллаштириш ва пайвандлаб қопланган деталларнинг ресурс кўрсаткичларини асослашдан иборат.
III.Тадқиқотнинг илмий янгилиги:
лемех материалининг ейилиш миқдорини тупроқнинг лемехга таъсир этадиган босимига, ишқаланиш йўлига, лемех ишчи юзасига пайвандлаб қопланган материалнинг қаттиқлиги, таркиби, таркибидаги қаттиқ қотишмалар миқдори кабиларга боғлиқ ҳолда ўзгариш қонуниятлари аниқланган;  
маълум таркибли шакллантирилган кукунсимон композицион материални ясси деталнинг ишчи юзасига контакт пайвандлаб қоплаш режимининг асосий параметрлари олинган пайванд қатламнинг физик-механик хоссаларини ҳисобга олган ҳолда асосланган; 
турли материаллар пайвандлаб қопланган намуналар устида лаборатория шароитида ўтказилган синовлар натижалари асосида ясси юзали деталларнинг ишчи юзасига пайвандлаб қоплаш учун унинг ресурсини янгисига нисбатан икки мартагача юқори бўлишини таъминлайдиган шакллантирилган кукунсимон материалнинг таркиби асосланган. 
IV. Тадқиқот натижаларининг жорий қилиниши. Тупроққа ишлов берувчи ясси деталларни (лемех каби) контакт пайвандлаб қоплаш усули ва пайвандлаб қопланган қатлам параметрларини асослаш бўйича ўтказилган тадқиқотлардан олинган натижалар асосида:
Пайвандлаб қопланган плуг лемехлари Андижон вилояти Асака туманидаги “Толибжон чорваси”, Марҳамат туманидаги “Унумдор ер соҳиби” ва “Норайлик Сафарали пахтазори”, Андижон туманидаги “Улуғбек илғор даласи” фермер хўжаликларининг далаларида синовлардан ўтган ва синовларнинг ижобий натижалари асосида ишлаб чиқаришга жорий этилган (Қишлоқ хўжалиги вазирлигининг 2022 йил 19 апрелдаги 07/24-04/2395-сон маълумотномаси). Натижада тупроққа ишлов берадиган машиналар ишчи органларининг ресурси 2…2,1 мартагача ортган ва бунинг ҳисобига эҳтиёт қисмлар сарфи 17...17,7% га камайишига эришилган;
қишлоқ хўжалик техникалари ясси деталларидан тайёрланган намуналарни абразив ейилишга синаш қурилмасининг конструкцияси яратилган (“Установка для испытаний материалов на абразивное изнашивание”,  Патент Uz FAP 01798.  2022.01.23). Натижада лаборатория тадқиқотларида ясси деталларнинг намуналарини ва ейилишга чидамли материаллар пайвандлаб қопланган намуналарни абразив муҳитда ейилишга синаш ва синов вақтини қисқартириш имкони яратилган.