Otemuratov Bayrambay Perdebaevichning
fan doktori (DSc) dissertatsiyasi himoyasi haqida e’lon

I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): «Ko‘p o‘lchamli kompleks analizda bir o‘lchamli golomorf davom ettirish xossasiga ega funksiyalar va chegaraviy Morera teoremasi», 01.01.01 – Matematik analiz (fizika-matematika fanlari).
Dissertatsiya mavzusi ro‘yxatga olingan raqam: B2020.2.DSc/FM152.
Dissertatsiya bajarilgan muassasa nomi: Qoraqalpoq davlat universiteti.
IK faoliyat ko‘rsatayotgan muassasa nomi, IK raqami: O‘zbekiston Milliy universiteti, DSc.03/30.12.2019.FM.01.01.
Ilmiy maslahatchi: Kitmanov Aleksandr Mechislavovich, fizika-matematika fanlari doktori, professor.
Rasmiy opponentlar: Raximov Abdug‘ofur Abdumajidovich, fizika-matematika fanlari doktori, professor; Imomkulov Sevdiyor Akramovich, fizika-matematika fanlari doktori; Djumabaev Davlatboy Xalilaevich fizika-matematika fanlari doktori.
Yetakchi tashkilot: Qarshi davlat universiteti.
Dissertatsiya yo‘nalishi: nazariy ahamiyatga molik.
II. Tadqiqotning maqsadi integrallanuvchi funksiyalar uchun ko‘p o‘lchamli Moreraning chegaraviy teoremalarini olish va bir o‘lchamli golomorf davom ettirish xossasiga ega integrallanuvchi funksiyalar uchun olingan natijalarni fuksiyalarni golomorf davom ettirish masalalariga qo‘llashdan iborat.
III. Tadqiqotning ilmiy yangiligi:
bir o‘lchamli golomorf davom ettirish xossasiga ega integrallanuvchi funksiyalar sinfi uchun Staut teoremasi umumlashtirilgan; 
berilgan ochiq to‘plamdan o‘tuvchi kompleks to‘g‘ri chiziqlar bo‘ylab bir o‘lchamli golomorf davom ettirish xossasiga ega `integrallanuvchi funksiyalar uchun Agranovskiy va Semenov teoremasining umumlashmasi olingan;
hosil qiluvchi ko‘phillik o‘smasidan o‘tuvchi kompleks to‘g‘ri chiziqlar oilasi bo‘ylab bir o‘lchamli golomorf davom ettirish xossasiga ega integrallanuvchi funksiyalar, Xardi sinfidagi funksiyagacha golomorf davom ettirilishi isbotlangan;
berilgan ochiq to‘plamdan o‘tuvchi kompleks to‘g‘ri chiziqlar bo‘ylab integrallanuvchi funksiyalar uchun Morera teoremasi isbotlangan;
kompleks egri chiziqlar bo‘ylab integrallanuvchi funksiyalar uchun Morera teoremasining ko‘p o‘lchamli analogi olingan;
klassik sohalarda integrallanuvchi funksiyalar uchun chegaraviy Morera teoremasining ko‘p o‘lchamli analoglari isbotlangan.
Tadqiqot natijalarining joriy qilinishi. Ko‘p o‘lchamli kompleks analizda bir o‘lchamli golomorf davom ettirish xossasiga ega funksiyalar va chegaraviy Morera teoremasi tadqiqoti jarayonida olingan ilmiy natijalar asosida:
Gartogs-Boxnerning klassik teoremasini umumlashtiruvchi bir o‘lchamli golomorf davom ettirish xossasiga ega integrallanuvchi funksiyalarni soha chegarasidan golomorf davom ettirish shartlari RFFIning «Ko‘p o‘lchamli kompleks analiz» mavzusidagi 18-51-41011 raqamli granti doirasidagi uzluksiz funksiyalar uchun olingan natijalarni kengaytirishda qo‘llanilgan (Sibir federal universitetining 2020 yil 25 maydagi 178-son ma’lumotnomasi, Rossiya). Ilmiy natijaning qo‘llanilishi Boxner-Martinelli integrali bilan ifodalanuvchi funksiyalarni golomorf davom ettirish haqidagi teoremalarni umumlashtirish imkonini bergan; 
soha chegarasida integrallanuvchi funksiyalarni golomorf davom ettirish «Noalgebraik tenglamalar sistemalari, ildizlarning darajali yig‘indilari va kompyuter algebrasi» mavzusidagi 15-01-00277 raqamli grantda soha chegarasidagi murakkabroq maxsus holatlar haqidagi masalalarni echishda qo‘llanilgan (Sibir federal universitetining 2020 yil 25 maydagi 176-son ma’lumotnomasi, Rossiya). Soha chegarasida integrallanuvchi funksiyalarni golomorf davom ettirish noalgebraik tenglamalar sistemasi nollarining darajalar yig‘indisini qurish imkoniyatini bergan;
chegaraviy Morera teoremalari «Ko‘p o‘lchamli integral almashtirishlar va ularning  kompleks analitik geometriya va differensial va ayirmalar tenglamalari nazariyasiga qo‘llanilishi» mavzusidagi 14-01-00544 raqamli grantda chegarada berilgan funksiyalar uchun Boxner-Martinelli integrali xossalarini o‘rganishda qo‘llanilgan (Sibir federal universitetining 2020 yil 25 maydagi 177-son ma’lumotnomasi, Rossiya). Natijada chegaraviy Morera teoremasi va soha chegarasida integrallanuvchi funksiyalarni golomorf davom ettirish  gipersirtlardagi integral operatorlar algebrasini tasniflash imkonini bergan.